តំណាងរាស្ត្រមណ្ឌលកំពង់ចាម អញ្ជើញសួរសុខទុក្ខ និងចែកអំណោយដល់គ្រួសាររងគ្រោះ ដោយអគ្គីភ័យឆេះផ្ទះ នៅស្រុកកំពង់សៀម

ភ្នំពេញ៖ តំណាងរាស្ត្រមណ្ឌលខេត្តកំពង់ចាម រួមមាន ឯកឧត្តម លន់ លឹមថៃ លេខាធិការគណៈកម្មការទី៣ នៃរដ្ឋសភា លោកជំទាវ ខុង ស៊ុនអេង សមាជិកាគណៈកម្មការទី៤ នៃរដ្ឋសភា លោកជំទាវ កុល ធារិន សមាជិកាគណៈកម្មការទី២ នៃ រដ្ឋសភា លោកជំទាវ ស្រី គឹមឆយ សមាជិកាគណៈកម្មការទី១ នៃរដ្ឋសភា និងឯកឧត្តម លី ថៃហាក់ តំណាង ឯកឧត្តម វេង សាខុន រួមជាមួយព្រះចៅអធិការវត្ត ព្រះសង្ឃចំនួន១២វត្ត ព្រមជាមួយមន្ត្រីរាជការនៅក្នុងស្រុកកំពង់សៀម នាថ្ងៃទី៩ ខែកុម្ភៈ ឆ្នាំ២០២៣ បានអញ្ជើញចុះសួរសុខទុក្ខ និងចែកអំណោយដល់គ្រួសាររងគ្រោះដោយអគ្គីភ័យឆេះផ្ទះកាលពីថ្ងៃទី៧ ខែកុម្ភៈ ឆ្នាំ២០២៣ នៅភូមិរលៀក ឃុំអំពិល ស្រុកកំពង់សៀម ខេត្តកំពង់ចាម កន្លងទៅនេះ។

ក្នុងឱកាសនោះ ឯកឧត្តម លន់ លឹមថៃ បានមានប្រសាសន៍សម្តែងការសោកស្តាយជាមួយក្រុមគ្រួសាររងគ្រោះដោយអគ្គីភ័យ ដែលបានបំផ្លាញលំនៅដ្ឋានឆេះអស់ទាំងស្រុងនេះ។ ព្រមជាមួយនឹងការចុះសួរសុខទុក្ខនោះផងដែរ ឯកឧត្តម បានពាំនាំនូវប្រសាសន៍ផ្តាំផ្ញើសួរសុខទុក្ខដោយក្តីអាណិតអាសូ ពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាល សម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋនៅគ្រប់ទីកន្លែង ដោយមិនប្រកាន់វណ្ណៈ ជាតិសាសន៍ និន្នាការនយោបាយអ្វីឡើយ។

បន្ទាប់មកឯកឧត្តមក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវតែមានការប្រុងប្រយ័តខ្ពស់ អំពីបញ្ហាគ្រោះអគ្គីភ័យនេះ ដែលអាចកើតមានគ្រប់ពេលវេលា។ ដូចនេះពេលដែលបងប្អូនចាកចេញពីផ្ទះត្រូវពិនិត្យនូវរាល់ឧបករណ៍ដែលងាយបង្កអោយកើតជាអគ្គីភ័យ។ ជាពិសេស រាល់ការតភ្ជាប់ចរន្តអគ្គិសនី ត្រូវរកអ្នកដែលមានជំនាញច្បាស់លាស់ ទើបអាចធានាបាននូវសុវត្ថិភាព។
ឯកឧត្តមក៏បានថ្លែងលើកទឹកចិត្តដល់ក្រុមគ្រួសារជនរងគ្រោះអោយខិតខំតស៊ូជាបន្តទៅទៀត ដើម្បីស្តាសេដ្ឋកិច្ចគ្រួសារអោយបានប្រសើរឡើងវិញ ជាពិសេសកុំមានការបាក់ទឹកចិត្ត និងបន្តខិតខំប្រឹងប្រែងបន្តទៀត។

នាឱកាសនោះ ឯកឧត្តម លន់ លឹមថៃ ក៏បានប្រគល់នូវអំណោយដល់គ្រួសាររងគ្រោះដោយអគ្គីភ័យនេះ រួមមាន អង្ករ មី ទឹកត្រី ទឹកស៊ីអ៊ីវ ត្រីខ ដែកស័ង្កសី និងសំភារៈប្រើប្រាស់ក្នុងផ្ទះផ្សេងៗជាច្រើនទៀត រួមជាមួយថវិកាចំនួន ៤.៦០០.០០០ រៀល ដែលកើតចេញពីកម្លាំងសាមគ្គីដ៏សប្បុរស ដើម្បីជួយដល់ជនរងគ្រោះ លើសពីនោះ ឯកឧត្តមក៏បានជូនថវិកាដល់លោកតាលោកយាយដែលចូលរួមចំនួន២០នាក់ ក្នុងម្នាក់ៗថវិកា១ម៉ឺនរៀលផងដែរ ៕