ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី០៦ ខែកុម្ភៈ ឆ្នាំ២០២៣នេះ បានអនុញ្ញាតឱ្យឯកឧត្តម អ៊ូអិណុ អាត់ស៊ូស៊ី (UENO Atsushi ) ឯកអគ្គរាជទូតជប៉ុនថ្មី ប្រចាំកម្ពុជា ចូលជួបសម្តែងការគួរសម។
សម្ដេចក្រឡាហោម ស ខេង បានថ្លែងនូវការស្វាគមន៍ និងដង្ហែរតាមព្រះករុណាជាអម្ចាស់ជីវិតលើត្បូងជាព្រះប្រមុខរដ្ឋ និងចូលរួមជាមួយ សម្ដេចតេជោ ជាប្រមុខរាជរដ្ឋាភិបាលកម្ពុជា សម្តែងនូវការអបអរសាទរចំពោះឯកឧត្ដម ដែលបានទទួលការតែងតាំងជាឯកអគ្គរាជទូតវិសាមញ្ញ និងពេញសមត្ថភាពប្រចាំកម្ពុជា។
សម្ដេចបានយកឱកាសនេះថ្លែងអំណរគុណចំពោះរដ្ឋាភិបាល និងប្រជាជនជប៉ុន ដែលតែងយកចិត្តទុកដាក់ជួយឧបត្ថម្ភគាំទ្រដល់ដំណើរការអភិវឌ្ឍរបស់កម្ពុជា ជាពិសេសទៅលើវិស័យសេដ្ឋកិច្ច និងសង្គមចាប់ពីក្រោយការចុះហត្ថលេខាលើកិច្ចព្រមព្រៀងទីក្រុងប៉ារីសរហូតមកដល់បច្ចុប្បន្ននេះ។
សម្តេចក្រឡាហោម ក៏បានជម្រាបជូនថា សមិទ្ធផលជាតិ ក៏ដូចជាជោគជ័យសំខាន់ៗ លើការអភិវឌ្ឍសង្គមដែលកម្ពុជាសម្រេចបានរហូតមកដល់ពេលនេះ ពិតជាមិនអាចកាត់ផ្តាច់ពីការចូលរួមចំណែកដ៏មានសារៈសំខាន់ ពីសំណាក់រដ្ឋាភិបាល និងប្រជាជនជប៉ុននោះឡើយ។
សម្ដេច បានសម្ដែងនូវការវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរអស់រយៈពេលជាច្រើនទសវត្សរ៍កន្លងមក ជាពិសេសមកដល់ពេលនេះប្រទេសទាំងពីរបានលើកកម្ពស់កម្រិតទំនាក់ទំនង ជាដៃគូយុទ្ធសាស្ត្រគ្រប់ជ្រុងជ្រោយ។
សម្ដេចក្រឡាហោម បានចាត់ទុកទំនាក់ទំនងនេះថា ជាផែនទីមួយដ៏មានសារៈសំខាន់ក្នុងការបន្តជំរុញដល់ការពង្រឹង និងពង្រីកកាន់តែខ្លាំងក្លាថែមទៀតនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។
ចំពោះក្រសួងមហាផ្ទៃ សម្ដេច បានជម្រាបជូនឯកឧត្តមឯកអគ្គរាជទូតថា សម្ដេចផ្ទាល់ជាមួយក្រុមឯកអគ្គរាជទូតជប៉ុនមុនៗ តែងតែមានកិច្ចសហប្រតិបត្តិការជាមួយគ្នាយ៉ាងល្អប្រសើរ ជាពិសេសទៅលើវិស័យដែលស្ថិតក្រោមការទទួលខុសត្រូវរបស់ក្រសួងមហាផ្ទៃ ទាំងវិស័យរដ្ឋបាលស៊ីវិល និងវិស័យសន្តិសុខ។
ជាការឆ្លើយតប ឯកឧត្ដម អ៊ូអិណុ អាត់ស៊ូស៊ី (UENO Atsushi ) ឯកអគ្គរាជទូតជប៉ុន បានថ្លែងអំណរគុណយ៉ាងជ្រាលជ្រៅចំពោះប្រសាសន៍លើកឡើងរបស់ សម្តេចក្រឡាហោម ស ខេង ដែលបានវាយតម្លៃចំពោះកិច្ចសហប្រតិបត្តិការដ៏ល្អ និងយូរលង់រវាងប្រទេសទាំងពីរកម្ពុជា ជប៉ុន។
ឯកឧត្ដម ក៏មានសេចក្ដីសោមនស្សរីករាយដោយទទួលព័ត៌មានពីសម្ដេច អំពីកិច្ចសហប្រតិបត្តិការល្អរវាងក្រសួងមហាផ្ទៃជាមួយនឹងបណ្ដាអគ្គរាជទូតជប៉ុនមុនៗទៅលើវិស័យរដ្ឋបាល ស៊ីវិល និងសន្តិសុខ។
ឯកឧត្តម បានជម្រាបជូនសម្ដេចក្រឡាហោមថា ឯកឧត្តមផ្ទាល់ ពិតជាមានសេចក្ដីសោមនស្សដែលត្រូវបានតែងតាំងមកបំពេញបេសកកម្មការទូតនៅព្រះរាជាណាចក្រកម្ពុជា ដែលជាប្រទេសមួយមានអារ្យធម៌ដ៏ល្អ និងក៏ជាប្រទេសដែលមានកិច្ចសហប្រតិបត្តិការ និងទំនាក់ទំនងដ៏ល្អរវាងគ្នា។
ឯកឧត្តម បានបង្ហាញការចូលរួមជាមួយ សម្ដេចក្រឡាហោម ក៏ដូចជាឯកភាពចំពោះការលើកឡើងរបស់សម្ដេច ទៅលើការលើកកម្រិតនៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ហើយចំពោះឯកឧត្តមផ្ទាល់ក៏មានសេចក្ដីរីករាយដែលបានចូលរួមចំណែកក្នុងដំណើរការកសាងសន្តិភាព ក៏ដូចជាដំណើរការអភិវឌ្ឍរបស់ប្រទេសកម្ពុជា។
ក្នុងឱកាសនោះដែរ ឯកឧត្តមអគ្គរាជទូត ក៏បានថ្លែងនូវការអបអរសាទរចំពោះរាជរដ្ឋាភិបាលកម្ពុជា ដែលបានធ្វើជាប្រធានអាស៊ានឆ្នាំ២០២២ កន្លងទៅ ប្រកបដោយជោគជ័យ ដែលឯកឧត្តម ចាត់ទុកថា ជោគជ័យនៃតួនាទីដ៏មានសារៈសំខាន់នេះ មួយផ្នែកក៏ដោយសារតែការចូលរួមដ៏មានសារៈសំខាន់របស់ សម្ដេចក្រឡាហោម ស ខេង ក្នុងការថែរក្សាសន្តិសុខ និងសុវត្ថិភាពបានយ៉ាងល្អប្រសើរដែលជាកត្តារួមចំណែកធ្វើឱ្យកិច្ចប្រជុំទទួលបានជោគជ័យ។
ឯកឧត្តម ក៏បានជូនពរដល់កម្ពុជា សូមបន្តទទួលបានជោគជ័យត្រចះត្រចង់ថែមទៀត នៅក្នុងការរៀបចំការប្រកួតនូវព្រឹត្តិការណ៍ស៊ីហ្គេមដែលកម្ពុជានឹងត្រូវធ្វើជាម្ចាស់ផ្ទះនាពេលឆាប់ៗខាងមុខនេះ។
ឯកឧត្តម ឯកអគ្គរាជទូត ក៏បានជម្រាបជូន សម្ដេចក្រឡាហោម ស ខេង អំពីដំណើរការនៃគម្រោងមួយចំនួនដែលជប៉ុនបានជួយគាំទ្រដល់កម្ពុជា ក្នុងនោះ មានជាអាទិ៍ គឺការជួយគាំទ្រដល់គម្រោងអភិវឌ្ឍន៍តាមបែបប្រជាធិបតេយ្យ ការជួយគាំទ្រដល់ការងារពាក់ព័ន្ធទៅនឹងការបោះឆ្នោតដែលជួយគាំទ្រតាមរយៈអង្គការចៃកា ការជួយគាំទ្រដល់ការពង្រឹងភាពជាដៃគូ រវាងរដ្ឋាភិបាល និងអង្គការសង្គមស៊ីវិលដែលគម្រោងនេះ នឹងជួយគាំទ្រតាមរយៈអង្គការUNDP និងគម្រោងពង្រឹងអភិបាលកិច្ចក៏ដូចជាតម្លាភាពនៃរដ្ឋបាលថ្នាក់ក្រោមជាតិ។
ជាការឆ្លើយតប សម្ដេចក្រឡាហោម ស ខេង បានថ្លែងអំណរគុណចំពោះការជួយគាំទ្ររបស់ជប៉ុនទៅលើគម្រោងនានា ដូចដែលបានលើកឡើង ក្នុងនោះ សម្តេចក្រឡាហោម បានកត់សម្គាល់ទៅលើការគាំទ្រសំខាន់ៗដែលមានជាអាទិ គឺការជួយរៀបចំនូវបញ្ជីឈ្មោះបោះឆ្នោតថ្មី ដែលសម្ដេចចាត់ទុកថានេះគឺជាកិច្ចការមួយដ៏មានសារៈសំខាន់ ហើយជាការជួយគាំទ្រមួយដ៏មានសារៈសំខាន់ដល់ដំណើរការរៀបចំការបោះឆ្នោតនៅកម្ពុជា។មួយវិញទៀត ការងារសំខាន់មួយទៀតនោះ ត្រូវបាន សម្ដេចក្រឡាហោម ស ខេង កត់សម្គាល់ថា ជាការជួយគាំទ្រដល់ដំណើរការរៀបចំការបោះឆ្នោតឃុំ សង្កាត់លើកដំបូងរបស់កម្ពុជា កាលពីឆ្នាំ២០០២ ដែលជាការចាប់ផ្ដើមដំណើរការកំណែទម្រង់វិមជ្ឈការ និងវិសហមជ្ឈការក្នុងការផ្ទេរអំណាចទៅដល់រដ្ឋបាលថ្នាក់ក្រោមជាតិ។
សម្ដេច ក៏សង្ឃឹមជឿជាក់ថា រាជរដ្ឋាភិបាលជប៉ុននឹងនៅតែបន្តគាំទ្រដល់កិច្ចការទាំងនេះជាពិសេសទៅលើការងារកំណែទម្រង់វិមជ្ឈការ និងវិសហមជ្ឈការដែលមកដល់ពេលនេះ រាជរដ្ឋាភិបាលកម្ពុជា បានឈានចូលដល់ដំណាក់កាលនៃការអនុវត្តនូវផែនការយុទ្ធសាស្ត្រជាតិដំណាក់កាលទី២ ហេីយសម្តេចសង្ឃឹមថា ជប៉ុននៅតែបន្តគាំទ្រទៅលើការបណ្តុះបណ្តាលធនធានមនុស្សសម្រាប់វិស័យរដ្ឋបាលថ្នាក់ក្រោមជាតិ។
ពាក់ព័ន្ធទៅនឹងការងាររៀបចំព្រឹត្តិការណ៍ស៊ីហ្គេមនៅកម្ពុជា សម្ដេចក្រឡាហោម ស ខេង បានអរគុណចំពោះការជូនពររបស់ឯកឧត្ដម ហើយក៏បានជម្រាបជូនដែរថាព្រឹត្តិការណ៍នេះគឺជាព្រឹត្តិការណ៍ដ៏មានសារៈសំខាន់សម្រាប់កម្ពុជាដែលនេះជាលើកទីមួយហើយដែលកម្ពុជា ទទួលជាម្ចាស់ផ្ទះនៃព្រឹត្តិការណ៍នេះហើយ។ សម្ដេច បន្ថែមថា ការថែរក្សានូវសន្តិសុខល្អប្រសើរគឺជាកិច្ចការមួយដ៏ចាំបាច់ ហើយក្រសួង រួមជាមួយនិងអាជ្ញាធរមានសមត្ថកិច្ចពាក់ព័ន្ធនឹងបន្តខិតខំអស់លទ្ធភាព ដើម្បីធ្វើកិច្ចការនេះឱ្យបានល្អប្រសើរ។
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏ជូនពរ ឯកឧត្តម អ៊ូអិណុ អាត់ស៊ូស៊ី (UENO Atsushi ) ឯកអគ្គរាជទូតជប៉ុនថ្មី ប្រចាំកម្ពុជា សូមទទួលបានជោគជ័យនៅក្នុងបេសកម្មដ៏ឧត្តុងឧត្តមរបស់ឯកឧត្តម នៅប្រទេសកម្ពុជា ហើយ សម្ដេច ក៏សង្ឃឹមជឿជាក់ថា តាមរយៈបេសកម្មរបស់ឯកឧត្តម នៅកម្ពុជា នឹងបន្ដរួមចំណែកដ៏ការពង្រឹងពង្រីកនូវទំនាក់ទំនងកិច្ចសហប្រតិបត្តិការរវាងប្រទេសទាំងពីរ កាន់តែខ្លាំងក្លាបន្ថែមទៀត៕
