គ្រួសារសពអតីតយុទ្ធជន ៤គ្រួសារ ក្នុងស្រុករលាប្អៀរ និងស្រុកទឹកផុស ទទួលបានថវិកាបេឡាមរណៈសង្គ្រោះ
ភ្នំពេញ៖ លោក វរសេនីយ៍ទោ ស្រី ម៉ាច មេបញ្ជាការរង តំបន់ប្រតិបត្តិការសឹករង កំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត នៅថ្ងៃទី៥ ខែមករា ឆ្នាំ២០២៣ បានដឹកនាំក្រុមការងារថ្នាក់ខេត្ត កងកម្លាំងទាំងបី សហការជាមួយអាជ្ញាធរមូលដ្ឋាន ចុះប្រគល់ថវិកាបេឡាមរណៈសង្គ្រោះ ចំនួន ១៦,០០០,០០០រៀល និង លិខិតចូលរួមរំលែកមរណទុក្ខ ជូនដល់គ្រួសារសពអតីតយុទ្ធជនចំនួន ៤គ្រួសារ ក្នុងនោះនៅក្នុងស្រុករលាប្អៀរ ៣គ្រួសារ និង ស្រុកទឹកផុស ១គ្រួសារ ។
លោកមេបញ្ជាការរង ក្នុងនាមតំណាង ឯកឧត្តម ប្រធានសមាគមខេត្ត បានពាំនាំប្រសាសន៍ផ្តាំផ្ញើ សួរសុខទុក្ខ និងចូលរួមរំលែកមរណៈទុក្ខជាមួយគ្រួសារសពអតីតយុទ្ធជនទាំង ៤គ្រួសារ ពីសំណាក់ សម្តេចតេជោ ប្រធានសមាគមអតីតយុទ្ធជនកម្ពុជា ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម អគ្គលេខាធិការសមាគម និង ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកង ទ័ពជើងគោក និងលោកជំទាវ ផងដែរ ។
លោកមេបញ្ជាការរង បានបន្តថា សម្តេចតេជោនាយករដ្ឋមន្ត្រី ប្រធានសមាគម តែងតែយកចិត្តទុកដាក់គិតគូរដល់សុខទុក្ខរបស់បងប្អូនអតីតយុទ្ធជនជានិច្ច ព្រោះបើគ្មានការចូលរួមលះបង់កម្លាំងកាយចិត្ត និងបូជាសាច់ស្រស់ឈាមស្រស់របស់បងប្អូនក្នុងសម័យសង្គ្រាមទេ ប្រទេសកម្ពុជាយើងក៏មិនមានសុខសន្តិភាព និងការអភិវឌ្ឍន៍ដូចសព្វថ្ងៃនេះដែរ ។
ក្រុមគ្រួសារសពអតីតយុទ្ធជន ទាំង៤គ្រួសារ បានថ្លែងអំណរគុណយ៉ាងជ្រាលជ្រៅចំពោះសម្តេចតេជោ នាយករដ្ឋមន្ត្រី ប្រធានសមាគមអតីតយុទ្ធជនកម្ពុជា ឯកឧត្តម អគ្គលេខាធិការសមាគម ឯកឧត្តម មេបញ្ជាការកងទ័ពជើងគោក លោកជំទាវ និងក្រុមការងារ ព្រមទាំងអាជ្ញាធរមូលដ្ឋាន ដែលជានិច្ចកាលតែងតែគិតគូរពីសុខទុក្ខប្រជាពលរដ្ឋ ជាពិសេសបងប្អូនអតីតយុទ្ធជន គ្រប់ទីកន្លែង គ្រប់កាលៈទេសៈ។
