កាកបាទក្រហមកម្ពុជា ខណ្ឌឬស្សីកែវ ចុះសាកសួរសុខទុក្ខ និងនាំយកអំណោយទៅផ្តល់ជូនបងប្អូនកម្មករ កម្មការិនីរោងចក្រដែលរងគ្រោះដោយសារអគ្គីភ័យចំនួន៨គ្រួសារ
ភ្នំពេញ៖ ក្រុមការងារអនុសាខាកាកបាទក្រហមកម្ពុជា ខណ្ឌឬស្សីកែវ ដឹកនាំដោយលោក ឯក ឃុនដឿន ប្រធានកិត្តិយសអនុសាខា នៅល្ងាចថ្ងៃទី២៦ ខែធ្នូ ឆ្នាំ២០២២បានចុះសាកសួរសុខទុក្ខ និងនាំយកអំណោយមនុស្សធម៌ទៅផ្តល់ជូនបងប្អូនកម្មករ កម្មការិនីរោងចក្រដែលរងគ្រោះដោយសារអគ្គិភ័យចំនួន៨គ្រួសារ កាលពីរសៀលថ្ងៃទី២៦ ខែធ្នូ ឆ្នាំ២០២២នេះ ស្ថិតនៅសង្កាត់គីឡូម៉ែតលេខ៦ ។
នាខណៈនោះ លោកប្រធានកិត្តិយសអនុសាខា បានពាំនាំនូវការចូលរួមសោកស្តាយពីឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ និងជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់គ្រួសាររងគ្រោះប្រកបដោយក្តីអាណិតអាសូរ ។
លោកសូមឱ្យគ្រួសាររងគ្រោះទាំងអស់មេត្តាកាត់ចិត្ត កុំអស់សង្ឃឹម ឱ្យតែនៅមានជីវិតរស់នៅ គឺបងប្អូនអាចប្រកបរបររកទទួលទាន ដើម្បីស្តារជីវភាពគ្រួសារឡើងវិញ ព្រមទាំងសូមអំពាវនាវក្រេីនរំលឹកបន្ថែមទៀតដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នជានិច្ចនូវភ្លេីងទៀន ធូប ចង្ក្រាន ហ្គាស និងវត្ថុផ្សេងៗដែលងាយឆាបឆេះ និងការតបណ្តាញអគ្គិសនីប្រើប្រាស់ត្រូវរកអ្នកជំនាញបច្ចេកទេសមកតឱ្យបានត្រឹមត្រូវ ដើម្បីចៀសវាងនូវគ្រោះអគ្គិភ័យដែលអាចកើតមានឡើងជាយថាហេតុ ។
អំណោយមនុស្សធម៌ដែលបានចែកជូនក្នុង១គ្រួសារៗទទួលបាន៖ អង្ករ៣០គីឡូក្រាម មី៨កញ្ចប់ ត្រីខ៤កំប៉ុង ទឹកត្រីទឹកសុីអុីវ៤ដប ជែលលាងដៃ១ដប ម៉ាស២៥បន្ទះ តែ១កញ្ចប់ អាវរងារ១ និងថវិកាចំនួន១១មុឺនរៀល៕
