ឯកឧត្តម អ៊ាង សុផល្លែត ដឹកនាំប្រតិភូកម្ពុជាបន្តចូលរួមកិច្ចប្រជុំលើកទី៧ របស់គណៈកម្មាធិការបរិស្ថាន និងអភិវឌ្ឍន៍ នៃគណៈកម្មាធិការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិកអង្គការសហប្រជាជាតិ
ភ្នំពេញ៖ ឯកឧត្តម អ៊ាង សុផល្លែត រដ្ឋលេខាធិការ តំណាងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន នាព្រឹកថ្ងៃទី២ ខែធ្នូ ឆ្នាំ២០២២ បានដឹកនាំប្រតិភូកម្ពុជារួមមាន ឯកឧត្តម ប៉ាក សុខារ៉ាវុត អគ្គនាយកនៃអគ្គនាយកដ្ឋានគាំពារបរិស្ថាន និងមន្ត្រីនៃអគ្គនាយកដ្ឋានគោលនយោបាយនិងយុទ្ធសាស្ត្រ បន្តចូលរួមកិច្ចប្រជុំលើកទី៧ របស់គណៈកម្មាធិការបរិស្ថាន និងអភិវឌ្ឍន៍ នៃគណៈកម្មាធិការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិកអង្គការសហប្រជាជាតិ (UN ESCAP) តាមរយៈប្រព័ន្ធវីដេអូ ។
សម្រាប់ថ្ងៃនេះ ឯកឧត្តមរដ្ឋលេខាធិការ បានចូលរួមថ្លែងសុន្ទរកថានៅក្នុងព្រឹត្តិការណ៍អមនៃកិច្ចប្រជុំនេះ គឺវេទិកាថ្នាក់ដឹកនាំនៃសិក្ខាសាលាចែករំលែកចំណេះដឹង និងសម្រាប់យកទៅអនុវត្តបន្តស្តីពី «ចក្ខុវិស័យទីក្រុង និងកិច្ចសហប្រតិបត្តិការតំបន់» ដោយបានរំលេចអំពីការរីកចម្រើន និងការអភិវឌ្ឍទីក្រុងរបស់កម្ពុជា និងការយកចិត្តទុកដាក់ក្នុងការគ្រប់គ្រងគុណភាពខ្យល់ក្នុងទីក្រុងនៅកម្ពុជា។
សូមបញ្ជាក់ជូនផងដែរថា កិច្ចប្រជុំលើកទី៧នៃគណៈកម្មាធិការបរិស្ថាននិងអភិវឌ្ឍន៍ នៃUN ESCAP នេះត្រូវបានរៀបចំជដោយផ្ទាល់នៅទីស្នាក់ការអង្គការសហប្រជាជាតិប្រចាំទីក្រុងបាងកក ប្រទេសថៃ និងតាមរយៈប្រព័ន្ធវីដេអូ៕
