គណៈប្រតិភូសភាកម្ពុជា ចូលរួមមហាសន្និបាតសភា និយាយភាសាបារាំងតំបន់អាស៊ី-ប៉ាស៊ីហ្វិក លើកទី១០
ភ្នំពេញ៖ ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា បានអញ្ជើញដឹកនាំគណៈប្រតិភូសភានៃព្រះរាជាណាចក្រកម្ពុជា ចូលរួមមហាសន្និបាតសភានិយាយភាសបារាំងតំបន់អាស៊ី-ប៉ាស៊ីហ្វិកលើកទី១០ នៅទីក្រុងដាណា នៃសាធារណរដ្ឋសង្គមនិយមវៀតណាម ពីថ្ងៃទី២៨ដល់ថ្ងៃទី២៩ ខែវិច្ឆិកា ឆ្នាំ២០២២។
ពិធីបើកកិច្ចប្រជុំមហាសន្និបាតAPFតំបន់អាស៊ី-ប៉ាស៊ីហ្វិកលើកទី១០ បានប្រព្រឹត្តទៅនៅថ្ងៃទី២៨ ខែវិច្ឆិកា ឆ្នាំ២០២២ ក្រោមអធិបតីភាពរបស់ឯកឧត្តម ជិន ថាញ់មិន (Trần Thanh Mẫn) អនុប្រធានប្រចាំការនៃរដ្ឋសភានៃសាធារណរដ្ឋសង្គមនិយមវៀតណាម។
វត្តមានចូលរួមមហាសន្និបាតAPFតំបន់អាស៊ី-ប៉ាស៊ីហ្វិកលើកទី១០ មានសមាជិក សមាជិកាសភា និងតំណាងអង្គការអន្តរជាតិនានាចំនួនប្រមាណ៤០រូប មកពី ក្រុមសភាជាតិAPF ក្រុមសភាជាតិកម្ពុជា វៀតណាម ឡាវ ប៉ូលីនេស៊ី-ហ្រ្វង់សេ នូវែលកាឡេដូនី អគ្គលេខាធិការដ្ឋានរដ្ឋបាលAPF តំណាង អង្គការអន្តរជាតិនៃប្រទេសប្រើភាសាបារាំងប្រចាំតំបន់អាស៊ី-ប៉ាស៊ីហ្វិក ប្រធានទីភ្នាក់ងារឧត្តមសិក្សានៃអង្គការអន្តរជាតិនៃប្រទេសប្រើភាសាបារាំងប្រចាំតំបន់អាស៊ីប៉ាស៊ីហ្វិក តំណាងអង្គការសុខភាពពិភពលោកប្រចាំតំបន់អាស៊ី-ប៉ាស៊ីហ្វិក និងតំណាងមូលនិធិអង្គការសហប្រជាជាតិសម្រាប់ប្រជាជន (UNFPA)។
សមាសភាពគណៈប្រតិភូសភាកម្ពុជារួមមាន ឯកឧត្តម ប៉ុល លឹម អនុប្រធានគណៈកម្មការទី៤នៃព្រឹទ្ធសភា (សមាជិកក្រុមសភាជាតិកម្ពុជាAPF) ឯកឧត្តម យឹម លាត សមាជិកគណៈកម្មការទី២នៃរដ្ឋសភា (សមាជិកាក្រុមសភាជាតិកម្ពុជាAPF) (ប្រធានបណ្តាញសមាជិកសភាវ័យក្មេងនៃក្រុមសភាជាតិកម្ពុជាAPF) រួមជាមួយមន្រ្តីជំនាញ នៃអគ្គលេខាធិការដ្ឋានសភាកម្ពុជាផងដែរ។
បន្ទាប់ពីបានដំណើរការរយៈពេលពីរថ្ងៃ មហាសន្និបាតAPF តំបន់អាស៊ី-ប៉ាស៊ីហ្វិកលើកទី១០ បានសម្រេចនូវលទ្ធផលដូចខាងក្រោម៖
– បានអនុម័តរបៀបវារៈមហាសន្និបាតសភានិយាយភាសបារាំងតំបន់អាស៊ី-ប៉ាស៊ីហ្វិកលើកទី១០
– បានស្តាប់របាយការណ៍សកម្មភាពក្រុមជាតិនានានៃសភានិយាយភាសាបារាំងតំបន់អាស៊ី-ប៉ាស៊ីហ្វិក របាយការណ៍សកម្មភាពសភានិយាយភាសាបារាំងតំបន់អឺរ៉ុប និងរបាយការណ៍សកម្មភាពនៃអគ្គលេខាធិការដ្ឋាន រដ្ឋបាលសភានិយាយភាសាបារាំង
– បានកត់សម្គាល់ទុកនូវសកម្មភាព ដែលបាននឹងកំពុងដំណើរការរបស់អង្គការអន្តរជាតិនៃប្រទេសនិយាយភាសាបារាំង និងទីភ្ងាក់ងារឧត្តមសិក្សានៃប្រទេសនិយាយភាសាបារាំង
– បានស្តាប់ពីកង្វល់របស់ក្រុមសភាជាតិសមាជិកតំបន់ ស្តីពីបញ្ហាប្រឈមនៃការប្រែប្រួលអាកាសធាតុ និងផលប៉ះពាល់នៃវិបត្តិសុខភាព និងសេដ្ឋកិច្ចដែលបង្កឡើងដោយជម្ងឺរាត្បាតកូវីដ-១៩
– បានស្តាប់បទអន្តរាគមន៍តំណាងពិសេសរបស់មូលនិធិអង្គការសហប្រជាជាតិសម្រាប់ប្រជាជន និងតំណាងពិសេសរបស់ អង្គការសុខភាពពិភពលោក ដែលបានចែករំលែកបទពិសោធន៍ល្អៗ លើប្រធានស្តីពីការប្រែប្រួលអាកាសធាតុ និងការប្រយុទ្ធប្រឆាំងនឹងជម្ងឺរាតត្បាតកូវីដ-១៩
– បានគូសបញ្ជាក់នូវចាំបាច់នៃការពង្រឹងសហប្រតិបត្តិការ រវាងសភាសមាជិកសភានិយាយ ភាសាបារាំងនៃតំបន់អាស៊ីប៉ាស៊ី-ស៊ីហ្វិក ដើម្បីរួមគ្នាដោះស្រាយបញ្ហានៃការប្រែប្រួលអាកាសធាតុ និងវិបត្តិថ្មីៗ សម្រាប់ជាប្រយោជន៍រួមរបស់ ប្រទេសនិងប្រជាជនក្នុងតំបន់
– បានធ្វើបច្ចុប្បន្នភាពលក្ខន្តិកៈសភានិយាយភាសាបារាំងតំបន់អាស៊ី-ប៉ាស៊ីហ្វិក៖ បន្ថែមសមាជិកពីចំនួន៤ ទៅចំនួន៧ កំណត់រយៈពេលប្រជុំមហាសន្និបាតរៀងរាល់ពីរឆ្នាំម្តងតាមវេនវិលជុំរវាងអនុតំបន់អាស៊ី និងប៉ាស៊ីហ្វិក និងផ្លាស់តួនាទីប្រធានតំបន់ និងតួនាទីដទៃទៀតក្នុងគណៈកម្មាធិកាអចិន្រ្តៃយ៍នៃសភានិយាយភាសាបារាំងរៀងរាល់ពីរឆ្នាំម្តង
– សម្រេចរៀបចំកិច្ចប្រជុំមហាសន្និបាតសភានិយាយភាសាបារាំងតំបន់អាស៊ី-ប៉ាស៊ីហ្វិក លើកទី១១ នៅទីក្រុងនូមេអា នៃកោះនូវែលកាឡេដូនី នៅត្រីមាសទី៤ ឆ្នាំ២០២៤ ៕