សេនានុព័ន្ធអង់គ្លេស ប្ដេជ្ញានឹងខិតខំប្រឹងប្រែងធ្វើយ៉ាងណា បង្កើនទំនាក់ទំនងកិច្ចសហរវាងកងទ័ពកម្ពុជា-អង់គ្លេស ឲ្យបានជិតស្និទ្ធ និងមានចីរភាពទៅមុខ
ភ្នំពេញ៖ នៅចំពោះមុខឯកឧត្ដមឧត្ដមសេនីយ៍ឯក ហ៊ុន ម៉ាណែត លោកវរសេនីយ៍ឯក JAMIE MURRAY សេនានុព័ន្ធនៃចក្រភពអង់គ្លេសប្រចាំកម្ពុជា បានប្ដេជ្ញាថាលោកនឹងខិតខំប្រឹងប្រែងធ្វើយ៉ាងណា បង្កើនទំនាក់ទំនងកិច្ចសហប្រតិបត្តិការ រវាងកងទ័ពនៃប្រទេសទាំងពីរឱ្យបានជិតស្និទ្ធ និងមានចីរភាពទៅមុខ ។
ក្នុងឱកាសអនុញ្ញាតឲ្យលោកវរសេនីយ៍ឯក JAMIE MURRAY ចូលជួបដើម្បីណែនាំខ្លួន និងពិភាក្សាការងារ នាថ្ងៃទី១ ខែធ្នូ ឆ្នាំ២០២២ នៅបញ្ជាការដ្ឋានកងទ័ពជើងគោក បានសម្តែងនូវការពេញចិត្ត ចំពោះការតែងតាំងសេនានុព័ន្ធ នៃចក្រភពអង់គ្លេសប្រចាំនៅកម្ពុជា ជាលើកដំបូងក្នុងរយៈពេលជាង ៥០ឆ្នាំកន្លងមកនេះ ដែលពិតជាបានឆ្លុះបញ្ចាំងអំពីឆន្ទៈ និងចក្ខុវិស័យរបស់ចក្រភពអង់គ្លេស ក្នុងការពង្រីកទំនាក់ទំនង រវាងប្រទេសទាំងពីរលើវិស័យការពារជាតិ។
ឆ្លៀតឱកាសនោះផងដែរ លោកឧត្តមសេនីយ៍ ក៏បានថ្លែងអំណរគុណចំពោះរាជរដ្ឋាភិបាល និងប្រជាជនអង់គ្លេស ដែលបានជួយឧបត្ថម្ភគាំទ្រកម្ពុជាក្នុងដំណាក់កាលស្វែងរកសន្តិភាពនាទសវត្សរ៍ឆ្នាំ១៩៩០ និងបន្តរហូតមកដល់បច្ចុប្បន្ន ជាពិសេសក្នុងវិស័យពាណិជ្ជកម្ម, អប់រំ, ការបោសសម្អាតមីន និងការប្រយុទ្ធក្នុងជំងឺកូវីដ-១៩ ជាដើម។
ជាការឆ្លើយតប លោកសេនានុព័ន្ធអង់គ្លេស បានសម្តែងនូវក្តីរីករាយប្រកបដោយកិត្តិយស ដែលទទួលបានការតែងតាំង ឱ្យបំពេញការងារការទូតយោធានៅកម្ពុជា ហើយលោកក៏បានបង្ហាញនូវក្តីសង្ឃឹមថា «ជាមួយនឹងបទពិសោធន៍ការងារ ជាយូរឆ្នាំដែលលោកមាន នៅក្នុងតំបន់អាស៊ីអាគ្នេយ៍ លោកនឹងខិតខំប្រឹងប្រែងធ្វើយ៉ាងណា បង្កើនទំនាក់ទំនងកិច្ចសហប្រតិបត្តិការ រវាងកងទ័ពនៃប្រទេសទាំងពីរឱ្យបានជិតស្និទ្ធ និងមានចីរភាពទៅមុខ» ៕
