ឯកឧត្តម ស៊ុន សុវណ្ណារិទ្ធិ អញ្ជើញចូលរួមក្នុងពិធីបញ្ចុះបឋមសិលាសាងសង់អគារសិក្សា១ខ្នង ស្ថិតក្នុងភូមិស្រែព្រីង ក្រុងកំពង់ឆ្នាំង
ភ្នំពេញ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមជាមួយឯកឧត្តម វ៉ែន រតនៈ សមាជិកក្រុមលេខាធិការសម្តេចតេជោ និងជាជំនួយការ ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងឯកឧត្តម ផាន់ ចាន់តារា សមាជិកក្រុមប្រឹក្សាខេត្ត តំណាងឯកឧត្ដម ឡុង ឈុនឡៃ ប្រធានក្រុមប្រឹក្សាខេត្ត នាព្រឹកថ្ងៃទី៣០ ខែវិច្ឆិកា ឆ្នាំ២០២២ បានអញ្ជើញចូលរួមក្នុងពិធីបញ្ចុះបឋមសិលាសាងសង់អគារសិក្សា១ខ្នង កម្ពស់៣ជាន់ ស្មើនឹង ១២បន្ទប់ ដែលជាអំណោយដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់សាលាបឋមសិក្សាអារញ្ញ ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។ ពិធីមានការនិមន្តពីព្រះសង្ឃ និងអញ្ជើញចូលរួមពីអភិបាលរងខេត្ត ថ្នាក់ដឹកនាំកងកម្លាំង មន្ទីរ អង្គភាព អភិបាលក្រុងកំពង់ឆ្នាំង លោកគ្រូ អ្នកគ្រូ ប្រជាពលរដ្ឋ និងសិស្សានុសិស្ស។
ក្នុងឱកាសនោះ ឯកឧត្តមអភិបាលខេត្ត រួមជាមួយឯកឧត្ដម វ៉ែន រតនៈ និងឯកឧត្ដម ផាន់ ចាន់តារា បានចែកជូនអំណោយរបស់សម្ដេចតេជោ នាយករដ្ឋមន្ត្រី ជូនដល់ប្រជាពលរដ្ឋជួបការលំបាកចំនួន ៣០០គ្រួសារ ដោយ១គ្រួសារទទូលបាន អង្ករ មី ត្រីខ និងថវិកាមួយចំនួន ព្រមទាំងបានឧបត្ថម្ភថវិកាជូនសាលាបឋមសិក្សាអារញ្ញ និងសិស្សានុសិស្សផងដែរ៕
