មន្ទីរបរិស្ថានខេត្តកណ្តាល រៀបចំទិវាអនាម័យបរិស្ថានជាតិ ២៣វិច្ឆិកា ឆ្នាំ២០២២ ក្រោមប្រធានបទ «មាតុភូមិយើង កាតព្វកិច្ចយើង ស្អាត និងបៃតង»
ភ្នំពេញ៖ មន្ទីរបរិស្ថានខេត្តកណ្តាល នៅព្រឹកថ្ងៃពុធទី២៣ ខែវិច្ឆិកា ឆ្នាំ២០២២ បានរៀបចំទិវាអនាម័យបរិស្ថានជាតិ ២៣វិច្ឆិកា ឆ្នាំ២០២២ ក្រោមប្រធានបទ «មាតុភូមិយើង កាតព្វកិច្ចយើង ស្អាត និងបៃតង» នៅសាលាបឋមសិក្សា-អនុវិទ្យាល័យ ហ៊ុន សែន វត្តពោធិ៍ ស្ថិតក្នុងភូមិព្រែកស្លែង ឃុំតាលន់ ស្រុកស្អាង ខេត្តកណ្តាល ក្រោមអធិបតីភាព លោក ជឺ គីមហៃ អភិបាលនៃគណៈអភិបាលស្រុកស្អាង និងលោក ថោរ សុភាព អនុប្រធានមន្ទីរបរិស្ថានខេត្តកណ្តាល។
ក្នុងនោះមានការចូលរួមមាន ពីសមាជិកក្រុមប្រឹក្សាស្រុកស្អាង លោកអភិបាលរងស្រុកស្អាង លោកអនុប្រធានមន្ទីរ និងមន្ត្រីនៃមន្ទីរបរិស្ថានខេត្តកណ្តាល លោក លោកស្រី មន្រ្តីរាជការ កងកម្លាំងទាំងបីរបស់រដ្ឋបាលស្រុកស្អាង លោក មេឃុំ ក្រុមប្រឹក្សាឃុំ ស្មៀន មេភូមិ អនុភូមិ ប្រជាការពារភូមិ សហភាពសហព័ន្ធយុវជនកម្ពុជា ក្នុងស្រុកស្អាង លោកនាយក នាយករង លោកគ្រូ អ្នកគ្រូ សិស្សកាកបាទក្រហម ក្មួយៗសិស្សានុសិស្ស នៃសាលាបឋមសិក្សា–អនុវិទ្យាល័យ ហ៊ុន សែន វត្តពោធិ៍ លោកគ្រូ អ្នកគ្រូ សាលាបឋមសិក្សាទួលស្ពឺ និងបឋមសិក្សា ហ៊ុន សែន ក្បាលកោះតូច សិប្បករ អាជីវករ និងបងប្អូនប្រជាពលរដ្ឋ អញ្ជើញចូលរួមចំនួន ២៥០នាក់ (ស្ត្រី ១១០នាក់)។
ទិវានេះប្រារព្ធធ្វើឡើងក្នុងគោលបំណងដ៏សំខាន់ គឺបំផុសចលនាអប់រំប្រជាពលរដ្ឋ ព្រះសង្ឃ កងកម្លាំងប្រដាប់អាវុធជាតិ មន្ត្រីរាជការគ្រប់លំដាប់ថ្នាក់ សិស្ស និស្សិតគ្រប់ភូមិសិក្សា រោងចក្រ សហគ្រាស សិប្បករ អាជីវករ ឱ្យចូលរួមធ្វើអនាម័យ កែលម្អសោភ័ណភាព ទីក្រុង ទីប្រជុំជន ជនបទ ភូមិឋាន ផ្ទះសំបែង វត្តអារាម សាលារៀន មន្ទីរពេទ្យ ផ្លូវសាធារណៈ រោងចក្រ សហគ្រាស ទីផ្សារ និងមជ្ឈមណ្ឌលសេដ្ឋកិច្ច សំដៅរួមចំណែកកសាងសង្គមកម្ពុជាមួយ មានបរិស្ថានល្អ ស្អាត បៃតង និងភាពស្រស់បំព្រង ហើយចំណុចសំខាន់ចំនួនពីរដែលត្រូវយកចិត្តទុកដាក់អនុវត្តគឺ៖
១. ត្រូវធ្វើអនាម័យខ្លួនប្រាណយើង ផ្ទះសំបែងយើង ភូមិឋានយើង និងអនាម័យតាមទីសាធារណៈ របស់យើង
២. បោះចោលសំរាមឱ្យត្រូវកន្លែង(ក្នុងធុងសំរាម) និងដាំដើមឈើ រុក្ខជាតិ ផ្កា ក្នុងមូលដ្ឋានរបស់យើង
នៅក្នុងពិធីនេះដែរ មន្ទីរបរិស្ថានខេត្តកណ្តាលបាននាំយកមកជាមួយនូវធុងសំរាមចំនួន១៦ រនាស់៤ ចូកសំរាម៥ អំបោសដងវែង៥ អំបោសដៃ៧ ធុងទឹក៣ បដាអប់រំបរិស្ថាន២ផ្ទាំង និងកូនឈើ ដើមរំដួល៤៥ដើម ជីកំប៉ុស្តិ៍៨ការ៉ុង សម្រាប់ដាំជានិមិត្តរូបនៅទីនេះ និងចែកជូន៖
១.សាលាឃុំតាលន់ បានធុងសំរាម២ រនាស់១ អំបោសថៃ១ ចូកសំរាម១
២.សាលាបឋមសិក្សានៅទីនេះ បានធុងសំរាម៧ រនាស់១ អំបោសដងវែង២ អំបោសដៃ៣ ចូកសំរាម២ ធុងទឹក១
៣.អនុវិទ្យាល័យនៅទីនេះ បានធុងសំរាម៧ រនាស់២ អំបោសដងវែង៣ អំបោសដៃ៣ ចូកសំរាម២ ធុងទឹក២ និងបដាអប់រំបរិស្ថាន២ផ្ទាំង
៤.សាលាបឋមសិក្សាទួលស្ពឺ បានកូនឈើ ដើមរំដួល ១០ដើម
៥.សាលាបឋមសិក្សា ហ៊ុន សែន ក្បាលកោះតូច បានកូនឈើ ដើមរំដួល ១០ដើមព្រមទាំងបានដាំកូនឈើ ដើមរំដួល ចំនួន២៥ដើម នៅក្នុងទីធ្លាសាលា និងធ្វើអនាម័យបរិស្ថាន នៅក្នុងតំបន់ប្រារព្ធពិធីផងដែរ៕
