តុលាការកូរ៉េខាងត្បូង អនុម័តការធ្វើបត្យាប័នស្ត្រី ដែលត្រូវបានចោទប្រកាន់ពីបទ «ឃាតកម្មលើវ៉ាលីស» របស់នូវែលសេឡង់
សេអ៊ូល៖តុលាការនៅក្នុងប្រទេសកូរ៉េខាងត្បូងបានអនុម័តលើការធ្វើបត្យាប័នស្ត្រីដែលប្រឈមមុខនឹងការចោទប្រកាន់ពីបទឃាតកម្មនៅក្នុងប្រទេសនូវែលសេឡង់ ពាក់ព័ន្ធនឹងករណីដែលសាកសពកុមារពីរនាក់ត្រូវបានរកឃើញនៅក្នុងវ៉ាលីដែលគេបោះបង់ចោល។
តុលាការជាន់ខ្ពស់ទីក្រុងសេអ៊ូលបានប្រាប់ CNN កាលពីថ្ងៃសុក្រថា ខ្លួនបានសំរេចថាស្ត្រីនោះអាចត្រូវបានធ្វើបត្យាប័ន ប៉ុន្តែថាមិនទាន់មានកាលបរិច្ឆេទសម្រាប់រឿងនេះនៅឡើយទេ ហើយថាការសម្រេចចិត្តចុងក្រោយឥឡូវនេះគឺធ្វើឡើងដោយក្រសួងយុត្តិធម៌។ស្ត្រីអាយុ ៤២ ឆ្នាំដែលប៉ូលីសជឿថាជាម្តាយរបស់កុមារទាំងពីរត្រូវបានចាប់ខ្លួននៅក្នុងខែកញ្ញានៅទីក្រុង Ulsan ភាគអាគ្នេយ៍ ប៉ុន្មានសប្តាហ៍បន្ទាប់ពីសាកសពរបស់កុមារត្រូវបានរកឃើញនៅក្នុងវ៉ាលីដែលទិញពីកន្លែងស្តុកទុកក្នុងប្រទេសនូវែលសេឡង់។យោងតាមប៉ូលីស ស្ត្រីរូបនេះកើតនៅប្រទេសកូរ៉េខាងត្បូង ប៉ុន្តែបានផ្លាស់ទៅរស់នៅប្រទេសនូវែលសេឡង់ “យូរមកហើយ” និងទទួលបានសញ្ជាតិមុនពេលត្រលប់មកវិញកាលពីប៉ុន្មានឆ្នាំមុន។
តុលាការក្រុងសេអ៊ូលបានប្រាប់ CNN ថា នាងបានបដិសេធការចោទប្រកាន់នេះ ប៉ុន្តែបានយល់ព្រមបញ្ជូនត្រឡប់ទៅប្រទេសនូវែលសេឡង់វិញ។ កន្លងមក ប៉ូលិសនូវែលសេឡង់បានស្នើឱ្យបញ្ជូនស្ត្រីរូបនោះត្រឡប់មកវិញក្រោមសន្ធិសញ្ញាបត្យាប័នរបស់ប្រទេសទាំងពីរ។
ប៉ូលីសនូវែលសេឡង់បានបើកការស៊ើបអង្កេតករណីមនុស្សឃាតកាលពីខែសីហា បន្ទាប់ពីគ្រួសារមួយនៅ South Auckland បានរាយការណ៍ថាបានរកឃើញសាកសពមនុស្សនៅក្នុងវ៉ាលីដែលពួកគេទិញនៅក្នុងការដេញថ្លៃតាមអ៊ីនធឺណិតពីកន្លែងស្តុកទុក។កុមារ ដែលទំនងជាមានអាយុចន្លោះពី ៥ ទៅ ១០ ឆ្នាំ ប្រហែលជាបានស្លាប់ប្រហែល ៣ ទៅ ៤ ឆ្នាំ នេះបើយោងតាមប៉ូលីសនូវែលសេឡង់។
នៅពេលនោះ ប៉ូលិសបានសង្កត់ធ្ងន់ថា ក្រុមគ្រួសារដែលទិញវ៉ាលីនោះមិនស្ថិតក្រោមការស៊ើបអង្កេតទេ។
