រដ្ឋបាលខេត្តបាត់ដំបង ទទួលអង្ករ ចំនួន៣០០ តោនបន្ថែមទៀត និងថវិកា ចំនួន២០ម៉ឺនដុល្លារ របស់សម្តេចតេជោ ហ៊ុនសែន
ភ្នំពេញ៖ ឯកឧត្តម សុខ លូ អភិបាលខេត្តបាត់ដំបង និងឯកឧត្តម អ៊ុយ រី ប្រធានក្រុមប្រឹក្សាខេត្ត និងមន្ត្រីសំខាន់ៗសាលាខេត្ត នាព្រឹកថ្ងៃទី២៣ ខែតុលា ឆ្នាំ២០២២នេះ បានទទួលនូវអំណោយឧបត្ថម្ភបន្ថែមពីសម្តេចតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា ពីក្រុមការងាររបស់សម្តេចតេជោដោយផ្ទាល់ដៃ មកប្រគល់ជូនដល់អាជ្ញាធររដ្ឋបាលខេត្តបាត់ដំបង និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តនូវអង្ករចំនួន ៣០០តោន និងថវិកាចំនួន ២០ម៉ឺនដុល្លារបន្ថែមខណៈដែលរដ្ឋបាលខេត្ត បាននិងកំពុងតែបន្តចុះនាំយកអំណោយស្បៀងសង្គ្រោះបន្ទាន់ដើម្បីចែកជូនប្រជាពលរដ្ឋមួយចំនួនដែលរងនូវការប៉ះពាល់និងរងគ្រោះដោយជំនន់ទឹកភ្លៀងកន្លងមកនៅតាមបណ្តាស្រុកនានា របស់ ខេត្តជាបន្តបន្ទាប់តាមរយៈអំណោយរបស់សម្តេចប្រមុខរាជរដ្ឋាភិបាល ដែលបានផ្តល់មកឲ្យរដ្ឋបាលខេត្តបាត់ដំបងជាបន្តបន្ទាប់ដើម្បីបានចែកជូនប្រជាពលរដ្ឋរងគ្រោះទាំងនោះ។
កន្លងមករដ្ឋបាលខេត្តបានលើកសំណើស្នើសុំពូជស្រូវសរុបចំនួន ១,១៥២ពាន់៨២៨គីឡូក្រាមដែលប៉ះពាល់លើផ្ទៃដី១១ពាន់៥២៨ហិកតា សម្រាប់ចែកជូនប្រជាពលរដ្ឋចំនួន ១១ពាន់៥២៨គ្រួសារ ដែលកំពុងរងផលប៉ះ
ពាល់ដោយសារជំនន់ទឹកភ្លៀងនៅក្នុងខេត្ត។
សូមបញ្ជាក់ថា៖ កន្លងមក ផ្ទៃដីដែលបានរងគ្រោះដោយសារទឹកជំនន់ទឹកភ្លៀង បណ្ដាលឱ្យប៉ះពាល់ផ្ទៃដីដាំដុះស្រូវសរុប ៤៥,០១៥ហិកតា,ផ្ទៃដីដែលខូចខាតមានចំនួន២៦,៨០៥ហិកតាលើគ្រួសារសរុបប្រមាណជាង២ម៉ឺនគ្រួសារ។ គ្រួសារដែលខូចខាតស្រូវមានចំនួន ១១ពាន់
៥២៨គ្រួសារ។ដោយឡែកផ្ទៃដីដែលអាចធ្វើការស្តារឡើងវិញមានចំនួនសរុប១១ពាន់៥២៨ហិកតា។ហើយបងប្អូនរងគ្រោះទាំងនេះនិងត្រូវទទួលបានពូជស្រូវរួមទាំងអំណោយមួយចំនួនពីសម្តេចតេជោសែន ដោយផ្ទាល់ដៃផងដែរ។
នៅព្រឹកថ្ងៃទី២៤ ខែតុលាឆ្នាំ២០២២នេះបើតាមការឲ្យដឹងពីមន្ត្រីគ្រប់គ្រងគ្រោះមហន្តរាយខេត្តបាត់ដំបង អាជ្ញាធរនៃរដ្ឋបាលខេត្តបាត់ដំបង បានបន្តនាំយកអំណោយស្បៀងសង្គ្រោះបន្ទាន់មួយចំនួន ទៅចែកជូនបងប្អូនប្រជាពលរដ្ឋរងប៉ះពាល់និងរងគ្រោះដោយជំនន់ទឹកភ្លៀងកន្លងមកជាបន្តបន្ទាប់នៅតាមបណ្តាស្រុកនានាក្នុងខេត្ត។ ដែលគិតមកទល់ពេលនេះ ស្បៀងសង្គ្រោះទាំងនេះបានចែកជូនដោយផ្ទាល់ដៃដល់បងប្អូនរងគ្រោះទាំងនោះប្រមាណជិត៧ពាន់គ្រួសាររួចមកហើយ…។
ឯកឧត្តមអភិបាលខេត្ត និងតាងនាមអោយប្រជាពលរដ្ឋរងគ្រោះដោយទឹកជំនន់កន្លងមកក្នុងខេត្តបាត់ដំបង ក្នុងនេះឯកឧត្តមបានគោរពថ្លែង នូវ អំណរគុណយ៉ាងជ្រាលជ្រៅបំផុតចំពោះសម្តេចតេជោនិងសម្តេចកិត្តិព្រឹទ្ធបណ្ឌិតដែលបានផ្តល់បន្ថែមទៀតមកឲ្យខេត្តនូវអង្ករ៣០០តោន និងថវិកាចំនួន២០មុឺនដុល្លារដល់រដ្ឋបាលខេត្តតាមរយៈក្រុមការងាររបស់សម្តេចដោយផ្ផ្ទាល់បន្ថែមទៀត ដើម្បីសម្រាប់ដោះស្រាយបញ្ហាប្រឈម និងបញ្ហាកង្វល់ក្នុងខេត្ត៕