ឧត្តមសេនីយ៍ទោ សោម ស៊ុន នាំថវិកា និងអំណោយរបស់ឧត្តមសេនីយ៍ឯក ហ៊ុន ម៉ាណែត ទៅចូលរួមបុណ្យសពពលរដ្ឋមានជីវភាពលំបាកខ្វះខាត នៅស្រុកស្ទោង
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និង សហការី នៅថ្ងៃទី១៩ ខែតុលា ឆ្នាំ២០២២ បាននាំយកថវិកានិងអំណោយរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកជំទាវ ពេជ ចន្ទមុន្នី ទៅចូលរួមក្នុងពិធីបុណ្យសពប្រជាពលរដ្ឋដែលមានជីវភាពលំបាកខ្វះខាត ឈ្មោះ សន ធួង ភេទស្រី អាយុ៤២ ដែលបានទទួលមរណភាពកាលពីថ្ងៃទី១៦ ខែតុលា ឆ្នាំ២០២២ ដោយរោគាពាធ និងបានបន្សល់ទុកនូវកូនកំព្រាម្តាយចំនួន៥នាក់ រស់នៅភូមិបេង ឃុំបន្ទាយស្ទោង ស្រុកស្ទោង ខេត្តកំពង់ធំ ។
ឧត្តមសេនីយ៍ទោ សោម ស៊ុន បានថ្លែងនូវការសោកស្តាយ អាឡោះអាល័យជាទីបំផុតចំពោះការបាត់បង់អាយុជីវិតលោកស្រី សន ធួង ដែលបានលាចាកលោកយើងនេះ និងបានបួងសួងសូមឱ្យវិញ្ញាក្ខន្ធលោកស្រី បានទៅកាន់សុគតិភពកុំបីឃ្លៀងឃ្លាតឡើយ។
ក្នុងឱកាសចូលរួមពិធីបុណ្យសពនេះ ឧត្តមសេនីយ៍ទោ សោម ស៊ុន និងសហការី បាននាំយកអំណោយរបស់ឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ ចន្ទមុន្នី ទៅចូលរួមឧបត្ថម្ភក្នុងពិធីបុណ្យសពរួមមាន៖អង្ករ រឿងឧបភពបរិភោគ និងថវិកាមួយចំនួនផងដែរ ។
ក្រុមគ្រួសារសពលោកស្រី សន ធួង និងប្រជាពលរដ្ឋ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះឯកឧត្តម ឧត្តមសេនីយ៍ឯក ហ៊ុន ម៉ាណែត និងលោកជំទាវព្រមទាំងឧត្តមសេនីយ៍ទោ សោម ស៊ុន និងសហការី ដែលបានយកចិត្តទុកដាក់ជួយឧបត្ថម្ភ ក្នុងពិធីបុណ្យសព ដែលកំពុងមានការខ្វះខាតនេះ៕
