កម្លាំងនគរបាល ចុះជួយប្រមូលផលស្រូវប្រជាពលរដ្ឋ ដែលកំពុងលិចលង់ដោយជំនន់ទឹកភ្លៀង នៅភូមិសាលាដែង ឃុំប្ញស្សីក្រោក
ភ្នំពេញ៖ កម្លាំងនគរបាលនៃអធិការដ្ឋាននគរបាលស្រុកមង្គលបូរី ចំនួន៧០នាក់ ដឹកនាំដោយលោកវរសេនីយ៍ឯក ស៊ិន ណារ៉ាក់ អធិការនគរបាលស្រុក នៅថ្ងៃទី៤ ខែកញ្ញា ឆ្នាំ២០២២ បានចូលរួមសហការជាមួយក្រុមការងារស្រុក ដឹកដោយលោក រ័ត្ន ដាស៊ីណង់ អភិបាលស្រុកមង្គលបូរី បានចុះជួយច្រូតកាត់ស្រូវប្រជាពលរដ្ឋ ដែលកំពុងលិចលង់ដោយជំនន់ទឹកភ្លៀង ចំនួន១ហិកតា ស្ថិតនៅភូមិសាលាដែង ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
លោកវរសេនីយ៍ ឯក ស៊ិន ណារ៉ាក់ អធិការនគរបាលស្រុកមង្គលបូរី បានឲ្យដឹងថា ទន្ទឹមនឹងកិច្ច ការងារស្នូល ថែរក្សាការពារសន្តិសុខ សណ្តាប់ធ្នាប់ សុវត្ថិភាពសង្គម ជូនប្រជាពលរដ្ឋ នៅក្នុងមូលដ្ឋាន លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ តែងតែជំរុញដល់កងកម្លាំងនគរបាល នៃអធិការដ្ឋាន ក្រុង ស្រុក ទាំង០៩ និងវរសេនាតូចការពារព្រំដែនគោកទាំង០៤ ត្រូវចុះធ្វើកិច្ចការងារសង្គម ជួយប្រជាពលរដ្ឋដែលរងគ្រោះដោយប្រការផ្សេងៗ ដូចជាគ្រោះធម្មជាតិទឹកជំនន់ ខ្យល់កន្ត្រាក់ និងគ្រោះរាំងស្ងួត ជាដើម ។
លោកអធិការបានបញ្ជាក់ថា ជាក់ស្តែងដូចជាថ្ងៃនេះ ប្រជាពលរដ្ឋ០១គ្រួសារ ឈ្មោះ ស៊ឹម ផុន រស់នៅភូមិសាលាដែង ឃុំឫស្សីក្រោក ស្រុកមង្គលបូរី គាត់មានស្រូវចំនួន១ហិតា រងគ្រោះដោយទឹកជំនន់ជន់លិច ដោយសារជំនន់ទឹកភ្លៀង ដែលម៉ាស៊ីនមិនអាចច្រូតកាត់បាន ហើយគាត់ខ្វះខាតកម្លាំងពលកម្ម ក្នុងការប្រមូលផលស្រូវពីទឹកជំនន់នេះ ។ លោកបានដឹកនាំកម្លាំងនគរបាល ស្រុកចំនួន៧០នាក់ ចូលរួមសហការជាមួយក្រុមការងារស្រុក ដឹកដោយលោក រ័ត្ន ដាស៊ីណង់ អភិបាលស្រុកមង្គលបូរី បានចុះជួយច្រូតកាត់ប្រមូលផលស្រូវពីទឹកជំនន់ បាន០១ហិកតាជូនគាត់ ។
ជាមួយគ្នានោះដែរ ម្ចាស់ស្រែបានថ្លែងអំណរគុណដល់អាជ្ញាធរស្រុក ក៏ដូចជាកងកម្លាំងនគរបាលស្រុកមង្គលបូរី ដែលបានឆ្លៀតពេលវេលាដ៏មានតម្លៃចុះជួយច្រូតកាត់ប្រមូលផលស្រូវពីទឹកជំនន់នេះ ដែលគ្រួសាររបស់គាត់កំពុងខ្វះខាតកម្លាំងពលកម្ម សកម្មភាពទាំងនេះ សបញ្ជាក់ឲ្យឃើញថា អាជ្ញាធរស្រុក កម្លាំងនគរបាល កើតចេញពីកូនចៅរបស់ប្រជាពលរដ្ឋ ដូច្នេះប្រជាពលរដ្ឋជួបទុក្ខលំបាក គឺមានអាជ្ញាធរ និងកងកម្លាំងប្រដាប់អាវុធ ជាអ្នកជួយ៕
