នាយឧត្តមសេនីយ៍ សែម សុវណ្ណនី អញ្ជើញចុះពិនិត្យសិក្ខាកាម ២០០នាក់ មកពីចំណុះឱ្យបញ្ជាការដ្ឋានជើងគោក កំពុងធ្វើការហ្វឹកហ្វឺនលើជំនាញបោសសម្អាតមីន

ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព អមដំណើរដោយឯកឧត្តម លោកជំទាវ ជាអគ្គនាយករង និងប្រធាននាយកដ្ឋាន នៃមជ្ឈមណ្ឌលជាតិរក្សាសន្តិភាព នៅថ្ងៃទី១៩ ខែសីហា ឆ្នាំ២០២២ បានអញ្ជើញចុះទៅពិនិត្យសិក្ខាកាមចំនួន២០០នាក់ មកពីចំណុះឱ្យបញ្ជាការដ្ឋានជើងគោក កំពុងធ្វើការហ្វឹកហ្វឺនលើជំនាញបោសសម្អាតមីន នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ដែលយោធាចារ្យមកពីមជ្ឈមណ្ឌលជាតិរក្សាសន្តិភាព ដែលមានបទពិសោធន៍ខ្ពស់មកពីបេសកកម្មអង្គការសហប្រជាជាតិ និងនៅក្នុងប្រទេសជាច្រើនឆ្នាំ។

ឯកឧត្តម នាយឧត្តមសេនីយ៍ មានប្រសាសន៍ថា វគ្គហ្វឹកហ្វឺននេះ មានរយៈពេល៣សប្តាហ៍មកហើយ នៅ២សប្តាហ៍ទៀត នឹងត្រូវបញ្ចប់ សម្រាប់វគ្គទី១ រួចនឹងបន្តហ្វឹកហ្វឺន សម្រាប់សិក្ខាកាមកងទ័ព ២០០នាក់ផ្សេងទៀត។ ផែនការហ្វឹកហ្វឺនលើជំនាញបោសសម្អាតមីនសម្រាប់សិក្ខាកាមទ័ពចំណុះឱ្យបញ្ជាការដ្ឋានកងទ័ពជើងគោកមានចំនួន៤៧វគ្គទើបបញ្ចប់។ ឯកឧត្តម បានលើកឡើងថា ការហ្វឹកហ្វឺនលើជំនាញខាងលើនេះ សម្រាប់ចុះអនុវត្តបោសសម្អាតមីនជាក់ស្តែង នៅតំបន់ដែលមានមីន ឱ្យអស់ត្រឹមឆ្នាំ២០២៥ ទៅតាមផែនការ ជាមួយគ្នា និងប្រកាសភូមិឃុំ អស់មីនជាបន្តបន្ទាប។

ឯកឧត្តម សែម សុវណ្ណនី បានបញ្ជាក់ដែរថា បច្ចុប្បន្នគម្រោងបោសសម្អាតមីនរបស់សម្តេចតេជោ ហ៊ុន សែន នាយករដ្ឋមន្ត្រី បានដាក់ឱ្យប្រតិបត្តិករ ដូចជាប្រតិបត្តិករមជ្ឈមណ្ឌលជាតិរក្សាសសន្តិភាព ប្រតិបត្តិករកងទ័ពជើងគោក និងស្ថាប័ន ផ្សេងទៀត ត្រូវចុះប្រតិបត្តិការបោសសម្អាតមីន ដូច្នេះមជ្ឈមណ្ឌលជាតិធ្វើការហ្វឹកហ្វឺនដក់សិក្ខាកាមទ័ពជើងគោក ឱ្យមានសមត្ថភាព ដើម្បីចុះអនុវត្ត។

វគ្គហ្វឹកហ្វឺននេះ លើជំនាញដោះមីន ជំនាញផែនទី ជំនាញសង្គ្រោះបន្ទាន់ ជំនាញកម្ទេចគ្រាប់ និងបើកបររថយន្ត។ នៅពេលដែលសិក្ខាកាមបានបញ្ចប់វគ្គ មជ្ឈមណ្ឌលជាតិរក្សាសន្តិភាព នឹងបំពាក់សម្ភារៈបរិក្ខា និងរថយន្តផងដែរ ដើម្បីចុះទៅអនុវត្តការងារដែល នៅតំបន់ដែលមានមីន៕