កម្ពុជា-រុស្ស៊ី ចុះហត្ថលេខា លើផែនការពិគ្រោះយោបល់ដែលជំរុញការលើកកម្ពស់ទំនាក់ទំនងជាមិត្តភាព និងកិច្ចសហប្រតិបត្តិការ រវាងប្រទេសទាំងពីរ

ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និង ឯកឧត្តម Sergey Lavrov រដ្ឋមន្ត្រីការបរទេសនៃ សហព័ន្ធរុស្ស៊ី នារសៀលថ្ងៃទី៥ ខែសីហា ឆ្នាំ២០២២ បានចុះហត្ថលេខា លើ «ផែនការនៃកិច្ចពិគ្រោះយោបល់ រវាងក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងក្រសួងការបរទេសនៃសហព័ន្ធរុស្ស៊ី សម្រាប់ឆ្នាំ ២០២២-២០២៤» ដែលនឹងរួមចំណែកពង្រឹងបន្ថែមទៀតទំនាក់ទំនងជាមិត្តភាព និងកិច្ចសហប្រតិបត្តិការ រវាងប្រទេសទាំងពីរ នៅក្នុងឱកាស នៃកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធនៅរាជធានីភ្នំពេញ។

រដ្ឋមន្ត្រីការបរទេសនៃព្រះរាជាណាចក្រកម្ពុជា និងសហព័ន្ធរុស្ស៊ី បានជួបប្រជុំចរចា ប្រកបដោយផ្លែផ្កា ហើយបានឯកភាពគ្នាលើកស្ទួយការអភិវឌ្ឍន៍បន្ថែមទៀតនូវចំណងមិត្តភាព ទំនាក់ទំនងជិតស្និទ្ធដ៏យូរអង្វែង ដូចដែលពេលវេលា បានបញ្ជាក់នាពេលកន្លងមក និងការគាំទ្រគ្នាទៅវិញទៅមករវាងព្រះរាជាណាចក្រកម្ពុជា និងសហព័ន្ធរុស្ស៊ី ស្របតាមតម្លៃជាមូលដ្ឋាន និងសេចក្តីប្រាថ្នារបស់ ប្រជាជននៃប្រទេសទាំងពីរ។

កម្ពុជា និងរុស្ស៊ី នឹងរក្សា ព្រមទាំងពង្រឹងកិច្ចសន្ទនានយោបាយ ទំនាក់ទំនងទៀងទាត់រវាងរដ្ឋាភិបាល សភា អាជ្ញាធរមូលដ្ឋាន និងគណបក្សនយោបាយ។ ភាគីទាំងពីរ នឹងបង្កើនកិច្ចសហប្រតិបត្តិការ ដែលជាផលប្រយោជន៍ ទៅវិញទៅមក ក្នុងវិស័យពាណិជ្ជកម្ម និងការវិនិយោគ វិទ្យាសាស្ត្រ និងបច្ចេកវិទ្យា វិស័យអប់រំ និងវប្បធម៌ វិស័យការពារជាតិ និងសន្តិសុខ ក៏ដូចជាបង្កើតនូវលក្ខខណ្ឌអំណោយផល សម្រាប់សកម្មភាពអង្គការ និងក្រុមហ៊ុន ក្នុងគ្រប់វិស័យ។

កម្ពុជា និងរុស្ស៊ី នឹងបន្តគោរពផលប្រយោជន៍ស្របច្បាប់របស់គ្នាទៅវិញទៅមក ក្នុងទំនាក់ទំនងទ្វេភាគី និងក្នុងក្របខណ្ឌនៃវេទិកាតំបន់ និងអន្តរជាតិ។

រដ្ឋមន្ត្រីការបរទេសទាំងពីរ បានឯកភាពគ្នាជំរុញការគាំទ្រគ្នាទៅវិញទៅមកលើបញ្ហាសំខាន់ៗ ក្នុងរបៀបវារៈ អន្តរជាតិ និងតំបន់ ដោយសង្កត់ធ្ងន់លើការពង្រឹងមជ្ឈភាពអាស៊ាន ក្នុងបរិបទនៃការដែលកំពុងរីកធំឡើង នៃអន្តរកម្ម ពហុភាគី ក្នុងតំបន់អាស៊ី ប៉ាស៊ីហ្វិក៕