មេដឹកនាំអាមេរិក និងកូរ៉េខាងត្បូង ជួបសន្ទនាតាមទូរស័ព្ទ ពិភាក្សាពីលទ្ធផលនៃកិច្ចប្រជុំកំពូលរវាងអាមេរិកនិងចិន

សេអ៊ូល៖ តាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) នៅថ្ងៃអាទិត្យ បានជួបសន្ទនាតាមទូរស័ព្ទ ដើម្បីពិភាក្សាពីលទ្ធផលនៃកិច្ចប្រជុំកំពូលរវាងសហរដ្ឋអាមេរិក និងប្រទេសចិន។

តាមសេចក្តីថ្លែងការណ៍ លោក ត្រាំ បានចែករំលែកព័ត៌មានលម្អិតនៃជំនួបរបស់លោកជាមួយប្រធានាធិបតីចិន លោក ស៊ី ជិនពីង ជូនទៅកាន់លោក លី ដែលក្នុងនោះរួមមាន បញ្ហាទំនាក់ទំនងរវាងអាមេរិកនិងចិន កិច្ចព្រមព្រៀងសេដ្ឋកិច្ចនិងពាណិជ្ជកម្ម បញ្ហាឧបទ្វីបកូរ៉េ ព្រមទាំងស្ថានការណ៍នៅតំបន់មជ្ឈិមបូព៌ាផងដែរ។

ប្រធានាធិបតីកូរ៉េខាងត្បូង បានវាយតម្លៃថា មេដឹកនាំអាមេរិក និងចិន ពិតជាមានកិច្ចពិភាក្សាប្រកបដោយលក្ខណៈស្ថាបនាលើបញ្ហាឧបទ្វីបកូរ៉េ។

ក្នុងកិច្ចសន្ទនានោះ លោក ត្រាំ ក៏បានសង្កត់ធ្ងន់ថា លោកនឹងចូលរួមចំណែកស្វែងរកសន្តិភាព និងស្ថិរភាពនៅឧបទ្វីបកូរ៉េ តាមរយៈកិច្ចសហប្រតិបត្តិការយ៉ាងជិតស្និទ្ធជាមួយទីក្រុងសេអ៊ូល។

ជាការឆ្លើយតប លោក លី បានលើកឡើងថា ការរក្សាស្ថិរភាពទំនាក់ទំនងរវាងអាមេរិក និងចិន នឹងផ្តល់ប្រយោជន៍ដល់សន្តិភាព និងភាពរុងរឿងទាំងក្នុងតំបន់ និងពិភពលោកទាំងមូល។ លោកក៏បានបង្ហាញក្តីសង្ឃឹមក្នុងការឃើញសន្តិភាព និងស្ថិរភាពនៅមជ្ឈិមបូព៌ាត្រូវបានស្តារឡើងវិញក្នុងពេលឆាប់ៗនេះផងដែរ។

បន្ថែមពីនេះ មេដឹកនាំទាំងពីរក៏បានជជែកគ្នាអំពីការអនុវត្តកិច្ចព្រមព្រៀងពាណិជ្ជកម្មទ្វេភាគី ដែលបានចុះហត្ថលេខាកាលពីឆ្នាំមុនឱ្យប្រព្រឹត្តទៅដោយរលូនផងដែរ៕