វ៉ាស៉ីនតោន៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP លីបង់ និងអ៉ីស្រាអែល បានបើកកិច្ចចរចាជុំថ្មី នៅក្នុងទីក្រុងវ៉ាស៉ីនតោន នាថ្ងៃព្រហស្បតិ៍ ទី២៣ ខែមេសា ដោយទីក្រុងបេរូត គ្រោងស្នើឱ្យមានការពន្យារពេលបទឈប់បាញ់ ដែលត្រូវផុតកំណត់នៅប៉ុន្មានថ្ងៃខាងមុខនេះ ឱ្យដល់រយៈពេលមួយខែ។
លីបង់-អ៉ីស្រាអែល ដែលបានធ្វើសង្គ្រាមជាមួយគ្នា អស់រយៈពេលច្រើនទសវត្សរ៍ បានធ្វើកិច្ចប្រជុំម្តងហើយ ក្នុងទីក្រុងវ៉ាស៉ីនតោន កាលពីថ្ងៃទី១៤ ខែមេសា ក្នុងបំណងបញ្ចប់សង្គ្រាមជាង ៦សប្តាហ៍ រវាងក្រុមហេសបូឡា និងអ៉ីស្រាអែល។ សហរដ្ឋអាមេរិក បានប្រកាសបទឈប់បាញ់ ១០ថ្ងៃភ្លាមៗ បន្ទាប់ពីកិច្ចប្រជុំដំបូងនោះ ហើយវានឹងត្រូវផុតកំណត់នៅថ្ងៃអាទិត្យចុងសប្តាហ៍នេះ។
ដូចពេលជុំមុនៗដែរ រដ្ឋមន្ត្រីការបរទេសអាមេរិក លោក Marco Rubio នឹងនាំឯកអគ្គរដ្ឋទូតអ៉ីស្រាអែល លោក Yechiel Leiter ឯកអគ្គរដ្ឋទូតលីបង់ លោកស្រី Nada Hamadeh Moawad ឱ្យប្រជុំជាមួយគ្នា នៅចំពោះមុខឯកអគ្គរដ្ឋទូតអាមេរិកប្រចាំលីបង់ លោក Michel Issa។
មុនកិច្ចចរចា អ៉ីស្រាអែលនិយាយថា មិនមានការខ្វែងគំនិតខ្លាំងជាមួយលីបង់ទេ ហើយអំពាវនាវឱ្យធ្វើការរួមគ្នាប្រឆាំងក្រុមហេសបូឡា ដែលជាសម្ព័ន្ធមិត្តរបស់អ៉ីរ៉ង់៕
