ឧបនាយករដ្ឋមន្ត្រី ហ៊ុន ម៉ានី៖ ការចូលរួមក្នុងយុទ្ធនាការជំរឿនរបស់គណៈគ្រប់គ្រង និងមន្រ្តីទាំងអស់ នឹងបង្ហាញពីស្មារតីគាំទ្រការងារកែទម្រង់រដ្ឋបាលសាធារណៈរបស់រាជរដ្ឋាភិបាល និងការទទួលខុសត្រូវរបស់អង្គភាពផ្ទាល់
ភ្នំពេញ៖ “ការចូលរួមក្នុងយុទ្ធនាការជំរឿនរបស់គណៈគ្រប់គ្រង និងមន្រ្តីទាំងអស់ នឹងបង្ហាញពីស្មារតីគាំទ្រការងារកែទម្រង់រដ្ឋបាលសាធារណៈរបស់រាជរដ្ឋាភិបាល និងការទទួលខុសត្រូវរបស់អង្គភាពផ្ទាល់ ដើម្បីសម្រេចទិសដៅរួមគ្នា ក្នុងការធ្វើបច្ចុប្បន្នភាពទិន្នន័យជាក់លាក់រួមមួយ សម្រាប់ជាមូលដ្ឋានក្នុងការប្រើប្រាស់ជារួម។” នេះជាប្រសាសន៍លើកឡើងរបស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនៅក្នុងពិធីប្រកាសបើកប្រកាសបើក «យុទ្ធនាការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធនៃគ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន នៅរាជធានីភ្នំពេញ» នៅវិទ្យាស្ថានជាតិអប់រំ កាលពីថ្ងៃទី១៦ ខែធ្នូ ឆ្នាំ២០២៥។
ថ្លែងក្នុងពិធីបើកយុទ្ធនាការនេះ ឯកឧត្តមឧបនាយករដ្ឋមន្រ្តី បានមានប្រសាសន៍បញ្ជាក់ថា ការគាំទ្រ និងការចូលរួមក្នុងការធ្វើជំរឿននេះ នឹងធ្វើឱ្យរាជរដ្ឋាភិបាលទទួលបានទិន្នន័យជាមូលដ្ឋាន សម្រាប់ការតាមដានបម្រែបម្រួលស្ថានភាពរបស់បុគ្គលិកអប់រំ និងបុគ្គលិកសុខាភិបាល, ការព្យាករណ៍អំពីទំហំតម្រូវការមន្ត្រីជាក់ស្តែង ដើម្បីដាក់ចេញគោលនយោបាយជាអាទិភាព ស្របតាមការវិវត្តនៃសង្គមជាតិ។ ទិន្នន័យទាំងអស់នេះ នឹងចូលរួមលើកកម្ពស់ការផ្តល់សេវាអប់រំ និងសេវាសុខាភិបាល ប្រកបដោយគុណភាព និងប្រសិទ្ធភាព ដែលជាវិធានការគន្លឹះ ក្នុងចំណោមវិធានការគន្លឹះទាំង៥ របស់រាជរដ្ឋាភិបាល។
លើសពីនេះ ឯកឧត្តមបានបញ្ជាក់ដោយសង្កត់ធ្ងន់ថា ស្ថិតក្នុងបរិការណ៍នៃការវាយប្រហារសារជាថ្មីម្តងទៀត តម្រូវឱ្យយើងមានការគិតគូររឹតតែច្បាស់ពីប្រព័ន្ធរដ្ឋបាលសាធារណៈរបស់កម្ពុជា ដើម្បីពង្រឹងសមត្ថភាពស្ថាប័ន និងមន្រ្តី បង្កើនការប្រកួតប្រជែង ព្រមទាំងពង្រឹងការគ្រប់គ្រង និងប្រើប្រាស់ថវិកាជាតិឱ្យចំគោលដៅ និងមានប្រសិទ្ធភាពខ្ពស់។ ការចូលរួមក្នុងការធ្វើជំរឿនរបស់ថ្នាក់ដឹកនាំ មន្រ្តីរាជការគ្រប់រូប ពិតជាមានសារៈសំខាន់ ក្នុងការកំណត់ឱ្យបានច្បាស់ពីចំនួនមន្រ្តីធ្វើការជាក់ស្តែង នៅតាមអង្គភាពរបស់ខ្លួន ដែលជាមូលដ្ឋានក្នុងការគ្រប់គ្រងបញ្ជីបៀវត្សឱ្យសមស្របជាមួយចំនួនមន្រ្តីជាក់ស្តែង និងអាចសន្សំថវិកា និងបង្វិលថវិកាសម្រាប់ការចំណាយផ្សេងទៀត។
“ការធ្វើជំរឿនមន្ត្រី មិនមែនជាការងារដាច់ដោយឡែករបស់ក្រសួងមុខងារសាធារណៈ ឬជាការទទួលខុសត្រូវរបស់ក្រសួងអប់រំ យុវជន និងកីឡា ឬក្រសួងសុខាភិបាល តែឯងនោះទេ តែជំរឿនជាការងាររួមរបស់យើងទាំងអស់គ្នា ដែលត្រូវមានការចូលរួមសហការពីអង្គភាពដែលត្រូវធ្វើជំរឿន។ ក្នុងន័យនេះ កិច្ចសហការរបស់គ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន ពិតជាមានសារៈសំខាន់ក្នុងការធានាភាពជោគជ័យនៃការធ្វើជំរឿន សំដៅទទួលបាន ទិន្នន័យរួមមួយ ដែលមានភាពគ្រប់ជ្រុងជ្រោយ សង្គតិភាព អាចជឿទុកចិត្តបានពីគ្រប់ភាគីពាក់ព័ន្ធទាំងអស់ សម្រាប់ការប្រើប្រាស់ជារួម នៅក្នុងប្រព័ន្ធរួមតែមួយនៃរដ្ឋបាលសាធារណៈរបស់រាជរដ្ឋាភិបាល។” ឯកឧត្តមបានបន្ថែម៕
