ផ្ទះជាង ១៧០ខ្នងក្នុងទីក្រុងឆ្នេរមួយស្ថិតនៅភាគខាងត្បូងប្រទេសជប៉ុនត្រូវបានបំផ្លាញដោយអគ្គិភ័យ

តូក្យូ៖ បើតាមការចេញផ្សាយដោយទីភ្នាក់ងារសារព័ត៌មាន Reuters ទីភ្នាក់ងារពន្លត់អគ្គិភ័យនៅក្នុងប្រទេសជប៉ុន បានឱ្យដឹងនៅថ្ងៃពុធ ទី១៩ ខែវិច្ឆិកា ថាផ្ទះជាង ១៧០ខ្នងក្នុងទីក្រុងឆ្នេរមួយស្ថិតនៅភាគខាងត្បូងនៃប្រទេសត្រូវបានបំផ្លាញដោយអគ្គិភ័យពេញមួយយប់ និងមិនទាន់ត្រូវបានពន្លត់ទាំងស្រុងនៅឡើយទេ នៅព្រឹកថ្ងៃពុធនេះ។

តាមទីភ្នាក់ងារពន្លត់អគ្គិភ័យ និងគ្រប់គ្រងគ្រោះមហន្តរាយជប៉ុន មនុស្ស១៧៥នាក់រស់នៅក្នុងស្រុក Saganoseki នៃទីក្រុង Oita ស្ថិតនៅចម្ងាយ ៧៧០គីឡូម៉ែត្រ នៃភាគនិរតីទីក្រុងតូក្យូ បានជម្លៀសខ្លួន ទៅកាន់កន្លែងមានសុវត្ថិភាព បន្ទាប់ពីអគ្គីភ័យបានឆាបឆេះនៅម៉ោង ៥៖៤០នាទីល្ងាច កាលពីថ្ងៃអង្គារម្សិលមិញ (ម៉ោងនៅជប៉ុន)។ ទីភ្នាក់ងារដដែលឱ្យដឹងទៀតថាមនុស្សម្នាក់បានបាត់ខ្លួន ខណៈមូលហេតុ ដែលបណ្ដាលឱ្យអគ្គិភ័យកើតឡើងកំពុងស្ថិតនៅក្រោមការស៊ើបអង្កេត។

វីដេអូចេញផ្សាយដោយប្រព័ន្ធផ្សព្វផ្សាយជប៉ុន បានបង្ហាញពីផ្ទះជាច្រើនខ្នងត្រូវបានភ្លើងឆេះរាបដល់ដី ហើយផ្សែងនៅតែបន្តហ៊ុយចេញនៅឡើយ។ ភ្លើងឆេះក៏បានរាលដាលដល់ព្រៃនៅក្បែរខាងផងដែរ។

នាយករដ្ឋមន្ត្រីជប៉ុន លោកស្រី Sanae Takaichi បានលើកឡើងក្នុងការបង្ហោះលើបណ្ដាញទំនាក់ទំនងសង្គម X ថាឧទ្ធម្ភាគចក្រយោធាមួយគ្រឿងត្រូវបានបញ្ជូនឱ្យទៅជួយពន្លត់អគ្គិភ័យតាមសំណើរបស់ អភិបាលខេត្ត Oita៕