ភ្នំពេញ៖ ព្រឹកថ្ងៃទី៣០ ខែសីហា ឆ្នាំ២០២៥ នៅសមាគមមិត្តភាពកម្ពុជា-ចិន មានរៀបចំកម្មវិធីទស្សនាភាពយន្តដែលមានចំណងជើងថា ប្រទេសខ្ញុំ បុព្វការីខ្ញុំ ក្រោមកិច្ចសម្របសម្រួលពីស្ថានទូតចិនប្រចាំកម្ពុជា។
ថ្លែងទៅកាន់អង្គពិធីដែលមានអ្នកចូលរួមសរុបចំនួន៨០រូបអញ្ជើញមកពីសមាគមមិត្តភាពកម្ពុជា-ចិន យុវជនគណបក្សប្រជាជនកម្ពុជា សហភាពសហព័ន្ធយុវជនកម្ពុជា សមាគមអ.ម.ត. សមាគមនិកាយចិនទៀជីវនៅកម្ពុជា និងសាកលវិទ្យាល័យទួនហ្វា លោកបណ្ឌិត ជា មុនីឫទ្ធិ សមាជិកគណៈប្រតិបត្តិសមាគមមិត្តភាពកម្ពុជា-ចិន បានរំលេចថា ព្រឹត្តិការណ៍នាថ្ងៃនេះបានផ្តល់គុណតម្លៃឱ្យយើងទាំងអស់គ្នាយល់កាន់តែស៊ីជម្រៅពីសន្តិភាពដែលទទួលបានកាលពី៨០ឆ្នាំមុន។ លោកបណ្ឌិតបានបន្ថែមថា ភាពយន្តនាថ្ងៃនេះជារួមគ្នាចារបន្ថែមនូវប្រវត្តិសាស្រ្ត៨០ឆ្នាំនៃជ័យជម្នះរបស់ប្រជាជាតិចិនចំពោះសង្គ្រាមប្រឆាំងនឹងការឈ្លានពានរបស់ជប៉ុន និងសង្គ្រាមលោកប្រឆាំងនឹងពួកហ្វាស៊ីស ហើយដែលប្រទេសចិនបានលាតត្រដាងការពិតជូនដល់ពិភពលោកដោយផ្តល់អំណះអំណាងច្បាស់លាស់ថាប្រទេសចិនមិនមែនជាប្រទេសប្រកាន់យុទ្ធសាស្ត្រសង្គ្រាមនោះឡើយ ប្រទេសចិនតាំងពីបុរាណកាលមកបានអះអាងដោយស្មោះត្រង់ថា «សន្តិភាព គឺជាគោលនយោបាយជាតិ» ហើយការលើកស្ទួយប្រាជ្ញាចិនស្តីពី«កិច្ចកសាងសហគមន៍ជោគវាសនារួមនៃមនុស្សជាតិ» ទើបជាគោលបំណងរបស់ប្រទេសចិនក្នុងការថែរក្សាសន្តិភាព និងបង្កើនវឌ្ឍនភាពនៃការអភិវឌ្ឍដើម្បីចែករំលែកផលប្រយោជន៍ឈ្នះ-ឈ្នះជាសកល។
លោក ឈិន ឆុង អគ្គទីប្រឹក្សាស្ថានទូតចិនបានថ្លែងថា ការណ៍ដែលយើងរំលឹកខួបនៃជ័យជម្នះដ៏មហិមា កាលពី៨០ឆ្នាំមុននេះ មិនមែនដើម្បីបន្តការសងសឹកនោះទេ ប៉ុន្តែជាសារដាស់តឿនមនុស្សផ្នត់គំនិត ឱ្យប្រាថ្នានិងប្រកាន់ខ្ជាប់នូវសន្តិភាព យកប្រវត្តិសាស្ត្រជាកញ្ចក់ឆ្លុះ ដើម្បីរួមគ្នាការពារ និងស្រឡាញ់សន្តិភាព រក្សាសណ្តាប់ធ្នាប់អន្តរជាតិក្រោយសង្គ្រាមដែលបានដោយលំបាក ប្រជាជនគ្រប់ជាតិសាសន៍បានរស់នៅដោយសុខសន្តិភាពជារៀងរហូត។ ចិននិងកម្ពុជា សុទ្ធតែជាប្រទេសដែលស្រឡាញ់សន្តិភាព។ ប្រជាជាតិចិន និងប្រជាជាតិខ្មែរ សុទ្ធតែមានហ្សែនសន្តិភាព មានការចងចាំពីសោកនាដកម្មនៃសង្គ្រាម និងមានក្តីសុបិន្តកសាងជាតិដែលមានសុខសន្តិភាពដូចគ្នា។ ឈរលើចំណុចចាប់ផ្តើមថ្មីនៃប្រវត្តិសាស្ត្រ ចិននិងកម្ពុជាត្រូវតែរួមដំណើរគ្នា អនុវត្តយ៉ាងសកម្មនូវកិច្ចកសាងសហគមន៍វាសនារួមសម្រាប់មនុស្សជាតិ រួមគ្នាធ្វើជាអ្នកការពារសន្តិភាពពិភពលោក អ្នកការពារយុត្តិធម៌អន្តរជាតិ និងជាដៃគូក្នុងការបន្តថាមពលវិជ្ជមាន និងរួមចំណែកថ្មីៗដល់សន្តិភាព វឌ្ឍនភាព និងការអភិវឌ្ឍរបស់មនុស្សជាតិ។
ក្រោយទស្សនាយ៉ាងយកចិត្តទុកដាក់ លោក លឹម អៀង សមាជិកសមាគមនិកាយចិនទៀជីវ បានថ្លែងថា ប្រទេសចិនបានក្លាយជាកម្លាំងសំខាន់មួយរបស់ពិភពលោកដែលបានចូលរួមបញ្ចប់សង្គ្រាមលោកលើកទីពីរ ហើយទីបំផុតកាលពី៨០ឆ្នាំមុន ប្រទេសចិនបានទទួលបានជ័យជម្នះទៅលើពួកយោធានិយមជប៉ុនដែលជាអ្នកឈ្លានពាន។ ជាលទ្ធផលប្រជាជាតិចិនមិនត្រឹមថែរក្សាបាននូវសមិទ្ធផលនៃអរិយធម៌អាយុ៥០០០ឆ្នាំរបស់ខ្លួនប៉ុណ្ណោះទេ ថែមទាំងបានការពារនូវបុព្វហេតុសន្តិភាពសម្រាប់មនុស្សជាតិផងដែរ។ ជ័យជម្នះដ៏គួរឲ្យកត់សម្គាល់នៃប្រជាជាតិចិននេះគួរទទួលបានមេដាយជើងឯកនៃការថែរក្សាសន្តិភាពជូនដល់ពិភពលោក ហើយប្រទេសចិនគឺជាសមាជិកស្ថាបនិករបស់អង្គការសហប្រជាជាតិ ហើយក៏ជាប្រទេសដំបូងគេបង្អស់ដែលបានចុះហត្ថលេខាលើធម្មនុញ្ញអង្គការសហប្រជាជាតិ។ ប្រទេសចិនតែងប្រកាន់ខ្ជាប់យ៉ាងរឹងមាំនូវប្រព័ន្ធអន្ដរជាតិដែលមានអង្គការសហប្រជាជាតិជាស្នូល ដែលជាបទដ្ឋានមូលដ្ឋានរបស់ខ្លួនក្នុងទំនាក់ទំនងអន្តរជាតិដោយទាញភ្ជាប់នូវគោលបំណង និងគោលការណ៍នៃធម្មនុញ្ញអង្គការសហប្រជាជាតិ ក៏ដូចជាតួនាទីស្នូលរបស់អង្គការនេះនៅក្នុងកិច្ចការអន្តរជាតិនានា៕
