ឆមាសទីមួយឆ្នាំ២០២៥ ការប្រមូលពន្ធ និងអាករ សម្រេចបាន៦០០៩ប៊ីលានរៀល មានការកើនឡើងបើធៀបនឹងរយៈពេលដូចគ្នាក្នុងឆ្នាំ២០២៤
ភ្នំពេញ៖ បើយោងតាមរបាយការណ៍ របស់អគ្គនាយកដ្ឋានគយនិងរដ្ឋាករកម្ពុជា បង្ហាញ កាលពី ល្ងាចថ្ងៃសុក្រថា ក្នុងឆមាស ទីមួយ នៃ ឆ្នាំ២០២៥ ការប្រមូលពន្ធ និងអាករ សម្រេចបាន៦០០៩ប៊ីលានរៀល មានការកើនឡើងបើធៀបនឹងរយៈពេលដូចគ្នាក្នុងឆ្នាំ២០២៤។
អគ្គនាយកដ្ឋានគយ លើកឡើងក្នុងកិច្ចប្រជុំបូកសរុបការងារប្រចាំឆមាសទី១ ឆ្នាំ២០២៥ និងទិសដៅអនុវត្តបន្តកាលពីថ្ងៃសុក្រទី១១កក្កដា ឆ្នាំ២០២៥ថា៖«សម្រាប់ឆមាសទី១ ឆ្នាំ២០២៥ ការប្រមូលពន្ធ និងអាករ សម្រេចបាន៦០០៩ប៊ីលានរៀល (ស្មើនឹងប្រមាណ១៤៧៨,២ដុល្លារអាម៉េរិក) មានកំណើនចំនួន១០៤២,១ប៊ីលានរៀល ឬត្រូវជាប្រមាណ២១ភាគរយ ប្រៀបធៀបនឹងចំណូលក្នុងឆមាសទី១ ឆ្នាំ២០២៤»។ ចំណូលដែលសម្រចបាននេះត្រូវជាប្រមាណ៥៨,៦ភាគរយ នៃផែនការច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥។
បើគិតជាសមាសភាគចំណូលតាម ប្រភេទពន្ធ និង អាករធៀបនឹងចំណូលសរុប អាករលើ តម្លៃ បន្ថែមមានប្រមាណ៤០,៧ភាគរយ, អាករពិសេសមានប្រមាណ ៣៥,១ភាគរយ, ពន្ធគយមានប្រមាណ១៥,៨ភាគរយ, អាករ បន្ថែម លើ ផលិតផល ប្រេងកាតមានប្រមាណ៣,៩ភាគរយ និងអាករ នាំចេញនិង កម្រៃផ្សេងៗមានប្រមាណ៤,៤ភាគរយ។
សមាសភាគនៃចំណូល តាមក្រុមទំនិញធៀបនឹងចំណូលសរុប យានយន្ត និងគ្រឿងចក្រមានប្រមាណ៣៦,២ភាគរយ, ក្រុមទំនិញចម្រុះមានប្រមាណ ៣២,២ភាគរយ, ប្រេងឥន្ធនៈនិងថាមពលមានប្រមាណ២៣,៧ភាគរយ, និងសម្ភារសំណង់ និងកម្រៃផ្សេងៗមានប្រមាណ៧,៩ភាគរយ។
ចំណែកឯទំហំពាណិជ្ជកម្មនាំចូលមានចំនួន១៦២៧៨,៩លានដុល្លារអាម៉េរិក កើនឡើងប្រមាណ១៨ភាគរយ ធៀបនឹងឆមាសទី១ឆ្នាំមុន។ រីឯទំហំពាណិជ្ជកម្មនាំចេញមានចំនួន ១៤៤១៨,៨លានដុល្លារអាម៉េរិក កើនឡើងប្រមាណ១៦,១ភាគរយ ធៀបនឹងឆ្នាំ២០២៤ ក្នុងនោះផលិតផលវិនិយោគ កាត់ ដេរមានកំណើន២២,១ភាគរយផងដែរ៕
