លោក ម៉ាកូ រូប៊ីអូ មានកិច្ចពិភាក្សាវិជ្ជមាន និងស្ថាបនាជាមួយរដ្ឋមន្ត្រីការបរទេសចិន លោក វ៉ាង យី ខណៈមហាអំណាចទាំងពីរបានព្យាយាមជំរុញរបៀបវារៈរបស់ពួកគេនៅអាស៊ី នៅពេលមានភាពតានតឹងជុំវិញគំនាបពន្ធរបស់រដ្ឋធានីវ៉ាស៊ីនតោន
គូឡាឡាំពួ៖ លោក ម៉ាកូ រូប៊ីអូ (Marco Rubio) រដ្ឋមន្ត្រីការបរទេសអាម៉េរិក បានឱ្យដឹងកាលពីថ្ងៃសុក្រទី១១កក្កដាថា លោកមានកិច្ចពិភាក្សាវិជ្ជមាន និងស្ថាបនាជាមួយរដ្ឋមន្ត្រីការបរទេសចិន លោក វ៉ាង យី ខណៈមហាអំណាចទាំងពីរបានព្យាយាមជំរុញរបៀបវារៈរបស់ពួកគេនៅអាស៊ី នៅពេលមានភាពតានតឹងជុំវិញគំនាបពន្ធរបស់រដ្ឋធានីវ៉ាស៊ីនតោន។
អ្នកការទូតកំពូលរបស់សហរដ្ឋអាម៉េរិក បានទៅប្រទេសម៉ាឡេស៊ីក្នុងដំណើរទស្សនកិច្ចអាស៊ីលើកដំបូង ចាប់តាំងពីចូលកាន់តំណែង ដោយស្វែងរកការសង្កត់ធ្ងន់លើការប្តេជ្ញាចិត្តរបស់សហរដ្ឋអាម៉េរិក ចំពោះតំបន់នៅក្នុងកិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាន ជាកន្លែងដែលប្រទេសជាច្រើនកំពុងប្រឈមនឹងពន្ធគយដ៏ច្រើនសន្ធឹកសន្ធាប់ ក្រោយការប្រកាសរបស់ប្រធានាធិបតីអាម៉េរិកនៅសប្តាហ៍នេះ។
លោក រូប៊ីអូ មានកិច្ចពិភាក្សាផ្ទាល់ជាលើកដំបូងជាមួយរដ្ឋមន្ត្រីការបរទេសចិន កើតឡើងបន្ទាប់ពីរដ្ឋធានីប៉េកាំង បានព្រមានរដ្ឋធានីវ៉ាស៊ីនតោនប្រឆាំងនឹងការដំឡើងពន្ធលើទំនិញរបស់ខ្លួនឡើងវិញនៅខែក្រោយ ហើយបានគំរាមសងសឹកប្រទេសដែលធ្វើកិច្ចព្រមព្រៀងជាមួយសហរដ្ឋអាម៉េរិក ដើម្បីកាត់ផ្តាច់ប្រទេសចិនចេញពីខ្សែច្រវាក់ផ្គត់ផ្គង់។
លោក វ៉ាង បាន រិះគន់ ក្រុង វ៉ាស៊ីនតោន យ៉ាង ខ្លាំង ក្នុង អំឡុង ពេល ពិភាក្សា ជាមួយ សមភាគី អាស៊ី ក្នុង ប្រទេស ម៉ាឡេស៊ី ដោយ ហៅ ពន្ធ របស់ សហរដ្ឋ អាម៉េរិក ថា ជា អាកប្បកិរិយា គំរាមកំហែង ឯកតោភាគី។ ប៉ុន្តែភាគីទាំងពីរបានពណ៌នាកិច្ចប្រជុំទ្វេភាគីរបស់ពួកគេថា ជាវិជ្ជមាន និងស្ថាបនា។ ហើយលោក រូប៊ីអូ បាននិយាយថា ឱកាសនៃជំនួបរវាងលោក ត្រាំ និងប្រធានាធិបតីចិន មានភាគរយខ្ពស់។
លោកបានប្រាប់អ្នកយកព័ត៌មានថា៖«យើងជាប្រទេសធំ មហាអំណាចទាំងពីរ ហើយតែងតែមានបញ្ហាដែលយើងមិនយល់ស្របគ្នា។ ខ្ញុំគិតថា មានផ្នែកខ្លះនៃកិច្ចសហប្រតិបត្តិការដែលមានសក្តានុពល ហើយខ្ញុំគិតថា វាជាកិច្ចប្រជុំប្រកបដោយការស្ថាបនា វិជ្ជមាន និងការងារជាច្រើនដែលត្រូវធ្វើ»។
បន្ថែមពីនោះ ប្រមុខការទូតអាម៉េរិកបានសង្កត់ធ្ងន់ថា ការអង្គុយទល់មុខលោក វ៉ាង មិនមែនជាការចរចាទេ ប៉ុន្តែជាការបង្កើតមូលដ្ឋានស្ថាបនា ដើម្បីបន្តការចរចា។
លោកបានកត់សម្គាល់ថា៖«លោក ត្រាំ ត្រូវបានគេអញ្ជើញឱ្យទៅធ្វើទស្សនកិច្ចនៅប្រទេសចិន ហើយបានបន្ថែមថា វាជាដំណើរទស្សនកិច្ចដែលគាត់ចង់ធ្វើ ដូច្នេះយើងនឹងធ្វើការស្វែងរកកាលបរិច្ឆេទត្រឹមត្រូវសម្រាប់រឿងនោះ ប៉ុន្តែខ្ញុំប្រាកដថា វានឹងកើតឡើងដោយសារតែប្រធានាធិបតីទាំងពីរចង់ឱ្យវាកើតឡើង»។
ទន្ទឹមនឹងនោះ ក្រសួងការបរទេសចិនបានឱ្យដឹងថា លោក វ៉ាង បានសង្កត់ធ្ងន់ថា ប្រទេសទាំងពីរគួរតែប្រែការឯកភាពដែលមេដឹកនាំរបស់ពួកគេសម្រេចបានទៅជាគោលនយោបាយ និងសកម្មភាព។ ភាគីទាំងពីរបានឯកភាពថា កិច្ចប្រជុំមានភាពវិជ្ជមាន ជាក់ស្តែង និងស្ថាបនា៕
