ឯកឧត្តម ចាន់ ស៊ីណាត ដឹកនាំកិច្ចប្រជុំបូកសរុបលទ្ធផលនៃបេសកកម្មចុះពិនិត្យទីតាំងជាក់ស្តែងលើយុទ្ធសាស្ត្រប្រព័ន្ធរំដោះទឹក និងពង្វាងទឹក ក្នុងភូមិសាស្ត្រខេត្តចំនួន៦

ភ្នំពេញ៖ នៅសាលប្រជុំរំដួលនៃទីស្ដីការក្រសួង ឯកឧត្តម ចាន់ ស៊ីណាត រដ្ឋលេខាធិការ និងជាប្រធានសម្របសម្រួលការងារគ្រប់គ្រងធនធានទឹក និងឧតុនិយមខេត្តបន្ទាយមានជ័យ និងខេត្តឧត្តរមានជ័យ តំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំបូកសរុបលទ្ធផលនៃបេសកកម្មចុះពិនិត្យទីតាំងជាក់ស្តែងរបស់ស្ថាប័នទាំងបី រួមមាន ក្រសួងធនធានទឹក និងឧតុនិយម ក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) នៅតាមបណ្តាអាងស្ទឹងក្នុងភូមិសាស្ត្រខេត្តសៀមរាប បាត់ដំបង បន្ទាយមានជ័យ ឧត្តរមានជ័យ ប៉ៃលិន និងខេត្តពោធិ៍សាត់ ដើម្បីកសាងនូវយុទ្ធសាស្រ្តលើប្រព័ន្ធដោះទឹក និងពង្វាងទឹក ព្រមទាំងធ្វើការកែលម្អរួមគ្នាលើផែនការវិនិយោគរយៈពេលវែងក្នុងការគ្រប់គ្រងធនធានទឹក និងឧតុនិយមនៃព្រះរាជាណាចក្រកម្ពុជា។

សូមជម្រាបថា កិច្ចប្រជុំនេះមានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងធនាគារអភិវឌ្ឍន៍អាស៊ី (ADB) ឯកឧត្តម លោក លោកស្រី ជារដ្ឋលេខាធិការ អនុរដ្ឋលេខាធិការ អគ្គនាយក អគ្គលេខាធិការ អគ្គលេខាធិការរង អគ្គនាយករង ប្រធាន អនុប្រធាននាយកដ្ឋាន អង្គភាពចំណុះឱ្យក្រសួងធនធានទឹក និងឧតុនិយម តំណាងស្ថាប័នពាក់ព័ន្ធ ថ្នាក់ដឹកនាំខេត្តពាក់ព័ន្ធ ប្រធាន អនុប្រធានមន្ទីរធនធានទឹក និងឧតុនិយមខេត្តពាក់ព័ន្ធ មន្ដ្រីជាតិនិងអន្តរជាតិនៃអង្គភាពគ្រប់គ្រងនិងអនុវត្តគម្រោងរបស់ក្រសួងធនធានទឹក និងឧតុនិយម។

ឯកឧត្តមរដ្ឋលេខាធិការបានបញ្ជាក់ឱ្យដឹងថា កិច្ចប្រជុំនេះបានប្រព្រឹត្តទៅដោយរលូន និងសម្រេចបានលទ្ធផលដូចខាងក្រោម៖ ទី១)កសាងផែនការយុទ្ធសាស្រ្តក្នុងការដោះទឹក និងពង្វាងទឹកក្នុងក្របខ័ណ្ឌអាងស្ទឹង ដើម្បីឈានទៅកាត់បន្ថយនូវគ្រោះមហន្តរាយដែលកើតឡើងពីទឹកជំនន់ និងគ្រោះរាំងស្ងួត និងធានានូវសន្តិសុខទឹកក្នុងបណ្តាខេត្តដែលរួមមាន ខេត្តសៀមរាប បាត់ដំបង បន្ទាយមានជ័យ ឧត្តរមានជ័យ ប៉ៃលិន និងខេត្តពោធិ៍សាត់ នៃប្រទេសកម្ពុជានាពេលខាងមុខនេះ និងទី២)ធ្វើការកែលម្អលើផែនការវិនិយោគរយៈពេលវែងក្នុងការគ្រប់គ្រងធនធានទឹក និងឧតុនិយម បញ្ជាទឹក ប្រើប្រាស់ទឹក និងមជ្ឈមណ្ឌលជាតិគ្រប់គ្រងទិន្នន័យធនធានទឹកឱ្យមានលក្ខណៈទំនើបកម្មវិស្វកម្ម ហើយធន់នឹងការប្រែប្រួលអាកាសធាតុប្រកបដោយឯករាជ្យភាព និងឧត្តមភាព៕