កូនខ្មែរដែលមានឈាមជ័រខ្មែរកម្ពុជាក្រោម ត្រូវបានតែងតាំងជា ទីប្រឹក្សាផ្ទាល់សម្តេចតេជោ ហ៊ុន សែន មានឋានៈស្មើរដ្ឋមន្ត្រី

ភ្នំពេញ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានសព្វព្រះរាជហឫទ័យត្រាស់បង្គាប់តែងតាំងឯកឧត្តម សាន សាង ជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា មានឋានៈស្មើរដ្ឋមន្ត្រី។

ព្រះរាជក្រឹត្យត្រាស់បង្គាប់តែងតាំងបានធ្វើឡើងនៅថ្ងៃទី១៣ ខែវិច្ឆិកា ឆ្នាំ២០២៤។ ឯកឧត្តម សាន សាង ជាកូនខ្មែរមានឈាមជ័រខ្មែរកម្ពុជាក្រោម កើតនៅខេត្តព្រះត្រពាំង។ ឯកឧត្តមបានប្រឡូកក្នុងឆាក នយោបាយជាមួយបក្សប្រឆាំងកាលពីដើមទសវត្សរ៍៩០។ លុះឆ្នាំ២០២៤ ឯកឧត្តម សាន សាង បាន សម្រេច ចូលរួមជីវភាពនយោបាយជាមួយគណបក្សប្រជាជនកម្ពុជា។

ឯកឧត្តម សាន សាង ជាស្ថាបនិកបង្កើតទូកង «ខ្មែរកម្ពុជាក្រោមមានជ័យ» នៅឆ្នាំ២០០២។ ក្រោយពេលចូលរួមជីវភាពនយោបាយជាមួយគណបក្សប្រជាជនកម្ពុជា ឯកឧត្តមក៏បានជួយរៀបចំ ដង្ហែ អង្គ កឋិន ទានទៅវត្តស្វាយសៀមថ្មី នៅទឹកដីខ្មែរកម្ពុជាក្រោម ដែលជាការផ្តួចផ្តើមដោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

ភ្ជាប់ការប្រាស្រ័យទាក់ទងតាមរយៈឯកឧត្តម សាន សាង, សម្តេចតេជោ ក៏បានសម្រេចជួយ ឧបត្ថម្ភ ដល់ទូកង «ខ្មែរកម្ពុជាក្រោមមានជ័យ» នៅឆ្នាំ២០២៤នេះ ហើយក៏ជួយធ្វើទូកងខ្នាតវែង មួយ គ្រឿង នៅឆ្នាំ២០២៥។

ការត្រាស់បង្គាប់តែងតាំងឯកឧត្តម សាន សាង ជាទីប្រឹក្សាសម្តេចតេជោ ហ៊ុន សែន បង្ហាញ ច្បាស់ពីការផ្តល់កិត្តិយសដ៏ខ្ពង់ខ្ពស់បំផុតជូនកូនខ្មែរកើតលើទឹកដីខ្មែរកម្ពុជាក្រោម ពីសំណាក់ព្រះមហាក្សត្រកម្ពុជា និងសម្តេចតេជោ ហ៊ុន សែន។ រឹតតែបង្ហាញទៀតថា ព្រះមហាក្សត្រ និងសម្តេចតេជោ មិនដែលរើសអើង ឬបំភ្លេចកូនខ្មែរកើតលើទឹកដីខ្មែរកម្ពុជាក្រោមនោះឡើយ។

តាមរយៈការផ្តល់តួនាទីជាទីប្រឹក្សាជូនឯកឧត្តម សាន សាង ជាទីប្រឹក្សា ជាឱកាសសម្តេចតេជោបានប្រាស្រ័យទាក់ទងផ្សាភ្ជាប់សុខទុក្ខ និងជួយដោះស្រាយបញ្ហានានារបស់បងប្អូនខ្មែរកម្ពុជាក្រោម ផងដែរ។

ជាកូនខ្មែរកម្ពុជាក្រោមមួយរូប ហើយមានអតីតភាពជាអ្នកនយោបាយប្រឆាំងទៅទៀត ឯកឧត្តម សាន សាង មិនធ្លាប់នឹកមមៃដល់ថាសម្តេចតេជោផ្តល់កិត្តិយសដ៏ធំធេងបែបនេះ ជូនដល់រូបលោក នោះឡើយ។

ឯកឧត្តម សាន សាង បានគោរពថ្លែងអំណរព្រះគុណព្រះមហាក្សត្រយ៉ាងជ្រាលជ្រៅបំផុត ដែលព្រះអង្គសព្វព្រះរាជហឫទ័យត្រាស់បង្គាប់តែងតាំងរូបលោកជាទីប្រឹក្សាសម្តេចតេជោ។ ឯកឧត្តម សាន សាង ក៏បានថ្លែងអំណរ សម្តេច តេជោ ហ៊ុន សែន ដែលបានក្រាបបង្គំទូលថ្វាយព្រះមហាក្សត្រ តែងតាំងរូបលោកជាទីប្រឹក្សាសម្តេច។

សម្រាប់ឯកឧត្តម សាន សាង ការបានតួនាទីទីប្រឹក្សាសម្តេចតេជោ ជារឿងក្តីរំភើបដ៏ជ្រាលជ្រៅមួយ តែអ្វីកាន់ តែរំភើបទៅទៀតនោះ គឺទឹកចិត្តសណ្តោសប្រណីធំទូលាយ របស់សម្តេចតេជោ មិនប្រកាន់ ទោស អូសដំណើរ ចំពោះអតីតភាពរបស់រូបលោក។

ក្នុងតួនាទីជាទីប្រឹក្សារបស់សម្តេចតេជោដែលជាឱកាសដ៏កម្រនេះ ឯកឧត្តម សាន សាង បានប្រកាសប្រឹងប្រែងឱ្យអស់លទ្ធភាពបំពេញការងារទាំងឡាយដែលសម្តេចតេជោដាក់ជូន។ ជាពិសេសនឹង ប្រឹងប្រែងធ្វើកិច្ចការមួយចំនួនដើម្បីជាឧត្តមប្រយោជន៍សម្រាប់បងប្អូនខ្មែរកម្ពុជាក្រោម ៕