លោកជំទាវបណ្ឌិត ជា សិរី៖ សុខភាពគ្រឹះស្ថានធនាគារ និងហិរញ្ញវត្ថុរបស់កម្ពុជា ឃើញថាប្រាក់ចំណេញធ្លាក់ចុះ ប៉ុន្ដែស្ថានភាពនៅរឹងមាំនៅឡើយ

ភ្នំពេញ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានលើកឡើងថា សុខភាពនៃវិស័យគ្រឹះស្ថានធនាគារ និងហិរញ្ញវត្ថុ នៅក្នុងប្រទេសកម្ពុជា នាពេលបច្ចុប្បន្ននៅតែមានភាពល្អប្រសើរ និងរឹងមាំ។

ក្នុងសន្និសីទសារព័ត៌មាន ស្តីពីស្ថានភាពវិស័យធនាគារនៅកម្ពុជា នាថ្ងៃទី៨ ខែតុលា ឆ្នាំ២០២៤ លោកជំទាវបណ្ឌិត ជា សិរី បានបញ្ជាក់ថា «ចំពោះការវាយតម្លៃ សុខភាពរបស់គ្រឹះស្ថានបច្ចុប្បន្ន ។ គ្រឹះស្ថានធនាគារ​យើង មានកំណើនខ្ពស់ ក្នុងរយៈពេលជាង១០ឆ្នាំចុងក្រោយ មានការកើនឡើងលឿនមែនទែន ហើយល្បឿនឥណទាន ក៏មានការកើនឡើង ចំណូលក៏មានការកើនឡើងខ្ពស់។ ប៉ុន្តែក្រោយមកដោយសារកូវីដ និងវិបត្តិសេដ្ឋកិច្ចបង្កឡើងដោយសង្គ្រោម ទើបបណ្តាលឱ្យសេដ្ឋកិច្ចពិភពលោកធ្លាក់ចុះ»។

លោកជំទាវបណ្ឌិត ជា សិរី បានថ្លែងថា មូលហេតុទាំងនេះហើយដែលធ្វើឲ្យការវិនិយោគទូទាំងពិភពលោក មិនតែនៅក្នុងប្រទេសកម្ពុជា មានការស្ទាក់ស្ទើរ និងកំពុងរង់ចាំមើលថា ស្ថានភាពវានឹងវិវត្ដទៅយ៉ាងម្ដេចបន្ដទៀត ជាពិសេសសហរដ្ឋអាមេរិក ក៏ជិតដល់ពេលបោះឆ្នោតថែមទៀត។

លោកជំទាវបណ្ឌិត ជា សិរី បានគូសបញ្ជាក់ថា «ស្ថានភាពនេះ ជាស្ថានភាពមួយ ដែលយើងគិតថា វានៅមានភាពមិនច្បាស់លាស់ច្រើន ដោយឡែក សុខភាពគ្រឹះស្ថាន ឃើញថា ប្រាក់ចំណេញមានការធ្លាក់ចុះ ប៉ុន្ដែស្ថានភាពនៅរឹងមាំនៅឡើយ» ៕