ប្រមុខរាជរដ្ឋាភិបាល សរសើរក្រសួងមុខងារសាធារណៈ និងស្ថាប័នពាក់ព័ន្ធ ដែលរៀបចំការប្រលងជ្រើសរើស មន្ត្រីរាជការប្រកបដោយភាពត្រឹមត្រូវ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅថ្ងៃទី២៦ ខែកញ្ញា ឆ្នាំ២០២៤នេះ បានថ្លែងកោតសរសើរ ដល់ក្រសួងមុខងារសាធារណៈ និងអាជ្ញាធរពាក់ព័ន្ធ ដែលបានប្រឹងប្រែងរៀបចំ ការប្រលងជ្រើសរើស មន្ត្រីរាជការប្រកបដោយភាពត្រឹមត្រូវ ។

ក្នុងឱកាសអញ្ជើញប្រគល់​សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចសរុប ៣,៥៣០នាក់ នារី ១,៨២២នាក់ នាថ្ងៃទី២៦ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ខ្ញុំសូមសរសើរទៅដល់ក្រសួងមុខងារសាធារណៈ អង្គភាពប្រឆាំងអំពើពុករលួយ​ (ACU) ស្ថាប័នពាក់ព័ន្ធ ដែលខិតខំជំរុញការប្រកួតប្រជែង»។

សម្តេចធិបតី បានមានប្រសាសន៍ថថា ទិសដៅរាជរដ្ឋាភិបាល គឺរើសឲ្យត្រូវ រើសឲ្យសុក្រឹត ផ្តល់លទ្ធភាពឲ្យស្មើគ្នា ដើម្បីចម្រាញ់យកគុណភាព «អ្នកចេះជាប់ អ្នកមិនជាប់ក៏អស់ចិត្ដ អ្នកជាប់ ជាប់ដោយមោទន»។

សម្តេចធិបតី ហ៊ុន ម៉ាណែត បន្ថែមថា ការកំណែទម្រង់រដ្ឋបាលសាធារណៈ និងការជ្រើសរើសមន្ត្រី មានការប្រលងច្រើន គិតមកដល់ពេលនេះ ឃើញថា មានអ្នកដាក់ពាក្យជាង៨ម៉ឺននាក់។ សម្តេចធិបតី បានឲ្យដឹងផងដែរថា ការកំណែទម្រង់ស្ថាប័ន នៅខាងក្នុង និងការពង្រឹងនូវ ប្រសិទ្ធភាពស្ថាប័ន គឺត្រូវអាស្រ័យទៅលើ ការពង្រឹងធនធានមនុស្ស ជាពិសេសការរៀបចំជ្រើសរើសដំបូង និងការបំពាក់បំប៉នបន្ថែម ទៅដល់មន្ត្រីដែលមានស្រាប់។