មនុស្សជាង ៦២០,០០០នាក់រងផលប៉ះពាល់ដោយព្យុះទីហ្វុង Gaemi នៅក្នុងខេត្ត Fujian ភាគខាងកើតប្រទេសចិន

បរទេស៖ គិតត្រឹមម៉ោង៦ព្រឹកថ្ងៃសុក្រ មនុស្សប្រហែល ៦២៨,៦០០នាក់នៅក្នុងខេត្ត Fujian ភាគខាងកើតប្រទេសចិនបានរងផលប៉ះពាល់ដោយព្យុះទីហ្វុង Gaemi ដែលជាព្យុះទីហ្វុងទីបីក្នុងឆ្នាំនេះ ដោយមានប្រជាជនប្រហែល ២៩០,០០០នាក់បានផ្លាស់ទីលំនៅមកទល់ពេលនេះ។

ជាមួយនឹងល្បឿនខ្យល់អតិបរមា ១១៨.៨គីឡូម៉ែត្រក្នុងមួយម៉ោងនៅកណ្តាលរបស់វា ព្យុះទីហ្វុងបានបោកបក់ជាលើកទីពីរនៅក្នុងប្រទេសកាលពីល្ងាចថ្ងៃព្រហស្បតិ៍នៅឯស្រុក Xiuyu ក្នុងទីក្រុង Putian ខេត្ត Fujian។

ព្យុះទីហ្វុងត្រូវបានគេព្យាករណ៍ថានឹងផ្លាស់ទីទៅភាគពាយព្យក្នុងល្បឿនប្រហែល ២០គីឡូម៉ែត្រក្នុងមួយម៉ោង ជាមួយនឹងកម្លាំងចុះខ្សោយជាលំដាប់ ហើយត្រូវបានគេរំពឹងថានឹងទៅដល់ខេត្ត Jiangxi ប្រហែលនៅរសៀលថ្ងៃសុក្រ។

រងឥទ្ធិពលដោយព្យុះទីហ្វុងនេះ ចាប់ពីម៉ោង៦ព្រឹកថ្ងៃពុធ ដល់ម៉ោង៦ព្រឹកថ្ងៃសុក្រ ទីប្រជុំជនចំនួន ៧២កន្លែង ក្នុងតំបន់ចំនួន ១៥តំបន់ នៅទូទាំងខេត្ត Fujian បានកត់ត្រាទឹកភ្លៀងបង្គរលើសពី ២៥០មិល្លីម៉ែត្រ ហើយទីប្រជុំជនចំនួន ១២កន្លែង ក្នុងតំបន់ចំនួន ៩តំបន់ នៃតំបន់មានភ្លៀងធ្លាក់ខ្លាំងជាង ៤០០ មីល្លីម៉ែត្រ ដែលមានកម្រិតខ្ពស់បំផុត ៥១២,៨មិល្លីម៉ែត្រ នេះបើតាមអាជ្ញាធរឧតុនិយមក្នុងតំបន់។

អាជ្ញាធរក្នុងតំបន់បានឲ្យដឹងថា ព្យុះទីហ្វុង Gaemi បានចុះចតជាលើកដំបូងនៅពាក់កណ្តាលអធ្រាត្រថ្ងៃព្រហស្បតិ៍នៅតំបន់ Yilan ភាគខាងកើតកោះតៃវ៉ាន់ ដោយបានបណ្តាលឱ្យមនុស្ស ២នាក់ស្លាប់ និង ២០១នាក់រងរបួស។