ឯកឧត្តមរដ្ឋមន្ត្រី ប៊ិន ត្រឈៃ អញ្ជើញជួបសំណេះសំណាល និងសួរសុខទុក្ខថ្នាក់ដឹកនាំ និងមន្ត្រីរាជការនៃមន្ទីរផែនការខេត្តកណ្ដាល

ភ្នំពេញ៖ នៅព្រឹកថ្ងៃទី១៦ ខែកក្កដា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អមដោយសហការី នៃក្រសួងផែនការ បានអញ្ជើញជួបសំណេះសំណាល និងសួរសុខទុក្ខថ្នាក់ដឹកនាំ និងមន្ត្រីរាជការ នៃមន្ទីរផែនការខេត្តកណ្ដាល។

ពិធីនេះមានការអញ្ជើញចូលរួមពីសំណាក់លោក ប្រាក់ សារ៉ាត់ អភិបាលរងខេត្តកណ្ដាល តំណាងឯកឧត្តមអភិបាល នៃគណៈអភិបាលខេត្តកណ្តាល ព្រមទាំងថ្នាក់ដឹកនាំ និងមន្ត្រីរាជការនៃមន្ទីរផែនការខេត្ត ផងដែរ។

ជាកិច្ចចាប់ផ្ដើម លោក មីន ឈុន ប្រធានមន្ទីរផែនការខេត្តកណ្ដាល បានឡើងថ្លែងសុន្ទរកថាស្វាគមន៍ និងរបាយការណ៍ជូនគណៈអធិបតី និងអង្គពិធីទាំងមូល។

លោកប្រធានមន្ទីរ បានគោរពរាយការណ៍ជូនអំពីវឌ្ឍនភាពការងារ និងបញ្ហាប្រឈមនានា ក្នុងការអនុវត្តការងារប្រចាំថ្ងៃ របស់មន្ទីរផែនការខេត្តកណ្ដាល ជូនគណៈអធិបតី និងអង្គពិធី។

បន្ទាប់ពីរបាយការណ៍របស់លោកប្រធានមន្ទីរ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានឡើងថ្លែងមតិសំណេះសំណាល និងសួរសុខទុក្ខសមាជិក សមាជិកានៃអង្គពិធីទាំងមូល។

មានមតិសំណេះសំណាល ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោកប្រធានមន្ទីរ ព្រមទាំងថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តកណ្តាល។

ជាមួយគ្នានេះ ឯកឧត្តមរដ្ឋមន្ត្រី បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិបាល នីតិកាលទី៧ ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងអាទិភាពគន្លឹះ នៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល “មនុស្ស ផ្លូវ ទឹក ភ្លើង និងបច្ចេកវិទ្យា”។

ទន្ទឹមនឹងនេះ ឯកឧត្តមរដ្ឋមន្ត្រី បានចែករំលែកនូវបទពិសោធន៍ និងវឌ្ឍនភាពការងាររបស់ក្រសួងផែនការ ដែលសម្រេចបាននាអំឡុងពេលជាង១១ខែកន្លងមកនេះ ព្រមទាំងបានផ្ដល់នូវទស្សនៈវិស័យ និងអនុសាសន៍តម្រង់ទិស លើកទឹកចិត្តដល់ការកសាងសមត្ថភាពមន្ត្រីជំនាញ នៃមន្ទីរផែនការ។

មុននឹងបញ្ចប ឯកឧត្តមរដ្ឋមន្ត្រី បានអញ្ជើញជួបពិនិត្យ និងសំណេះសំណាលដោយផ្ទាល់ ជាមួយមន្ត្រីរាជការតាមការិយាល័យជំនាញនានារបស់មន្ទីរផែនការ ព្រមទាំងថតរូបអនុស្សាវរីយ៍ជាមួយថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តកណ្ដាល។ ពិធីនេះត្រូវបានរៀបចំឡើង ប្រកបដោយបរិយាកាសរីករាយ និងភាពស្និទ្ធស្នាលជាទីបំផុត ៕