ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញសំណេះសំណាលជាមួយអាជ្ញាធរដែនដី និងប្រជាពលរដ្ឋ នៅស្រុកមេសាង ខេត្តព្រៃវែង

ភ្នំពេញ៖ នៅព្រឹកថ្ងៃទី២៩ ខែមិថុនា ឆ្នាំ២០២៤ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា និងជាតំណាងរាស្ត្រមណ្ឌលខេត្តព្រៃវែង រួមជាមួយតំណាងរាស្ត្រមណ្ឌលខេត្តព្រៃវែង បានអញ្ជើញជួបសំណេះសំណាលជាមួយអាជ្ញាធរដែនដី និងប្រជាពលរដ្ឋ នៅក្នុងស្រុកមេសាង ខេត្តព្រៃវែង។

បន្ទាប់ពីបានស្ដាប់សេចក្ដីរាយការណ៍របស់ លោក កែវ ពិសី អភិបាលស្រុកមេសាង ដែលបានឡើងជម្រាបជូនពីស្ថានភាពទូទៅនៃការរស់នៅរបស់ប្រជាពលរដ្ឋនៅក្នុងស្រុកមេសាងរួចមក ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា តាងនាមឱ្យតំណាងរាស្ត្រទាំង១០រូប មកពីមណ្ឌលខេត្តព្រៃវែង ឯកឧត្តមកិត្តិសេដ្ឋាបណ្ឌិត សូមសម្តែងនូវការដឹងគុណ និងអរគុណយ៉ាងជ្រាលជ្រៅចំពោះប្រជាជនកម្ពុជាទូទាំងប្រទេស ដោយឡែកប្រជាជនខេត្តព្រៃវែង ពិសេសប្រជាជននៅក្នុងស្រុកមេសាងនេះ ដែលរយៈកាលកន្លងមក នៅក្នុងពេលបោះឆ្នោតជ្រើសតាំងតំណាងរាស្រ្ត នីតិកាលទី៧ លោកឪពុក អ្នកម្តាយ បងប្អូនជនរួមជាតិ ដែលមានអាយុចាប់ពី១៨ឆ្នាំឡើង បានអញ្ជើញទៅចូលរួមបោះឆ្នោតជូនគណបក្សប្រជាជនកម្ពុជា ឱ្យទទួលបានជោគជ័យប្លូកទឹកប្លូកដីទូទាំងប្រទេសបាន១២០ លើ ១២៥អាសនៈ ដោយឡែកមណ្ឌលខេត្តព្រៃវែងទទួលបាន ១០អាសនៈ លើ ១១អាសនៈ។

ឯកឧត្តមកិត្តិសេដ្ឋាបណ្ឌិត ជាម យៀប ក៏សូមជម្រាបអង្គពិធីជ្រាបដែរថាៈ កាលពីថ្ងៃអាទិត្យ ទី២៦ ខែឧសភា ឆ្នាំ២០២៤កន្លងទៅនេះ ក្រុមប្រឹក្សាឃុំ និងសង្កាត់ ទូទាំងប្រទេស ក៏ដូចជានៅខេត្តព្រៃវែងយើង បានអញ្ជើញទៅបោះឆ្នោតជ្រើសរើស ក្រុមប្រឹក្សារាជធានី ខេត្ត ក្រុង ស្រុក ខណ្ឌ ទូទាំងប្រទេស ដោយគណបក្សប្រជាជនកម្ពុជាទទួលជ័យជំនះ គួរជាទីមោទនភាពក្រៃលែង។ ជ័យជំនះគ្រប់សមរភូមិ ដែលគណបក្សប្រជាជនកម្ពុជា ទទួលបានគឺជាការខិតខំប្រឹងប្រែងបំពេញការងារបម្រើជាតិ មាតុភូមិ បម្រើប្រជាជន គ្រប់មូលដ្ឋាន ដោយសារតែយើងបានរៀបចំកម្មវិធីនយោបាយយើងបានត្រឹមត្រូវ និងល្អឥតខ្ចោះ ស្របតាមសភាពការណ៍ជាក់ស្តែង ដែលជាតិ និងប្រជាជនត្រូវការចាំបាច់ ព្រមទាំងស្របតាមសភាពការណ៍ក្នុងតំបន់ និងលើសកលលោកទៀតផង។

ថ្ងៃនេះ តាមរយៈឯកឧត្តម ផ្ទាល់ ថ្នាក់ដឹកនាំកំពូលៗ រដ្ឋសភា ព្រឹទ្ធសភានិងរាជរដ្ឋាភិបាល បានផ្តាំផ្ញើសួរសុខទុក្ខ និងនឹករលឹកបំផុត ព្រមទាំងសូមគោរពជូនពរដល់ប្រជាជនខេត្តព្រៃវែងទាំងមូល ពិសេសប្រជាជនស្រុកមេសាង សូមសមប្រកបដោយព្រះពុទ្ធពរទាំង៤ប្រការគឺ៖ អាយុ វណ្ណៈ សុខៈ និង ពលៈ កុំបីប្រែក្លាយទៅជាប្រការដទៃឡើយ។

ឯកឧត្តមកិត្តិសេដ្ឋាបណ្ឌិត ជាម យៀប ក៏បានលេីកពីប្រសាសន៍ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានមានប្រសាសន៍នៅក្នុងពិធីរំលឹកខួបអង្គមិន្ទិញថ្ងៃបង្កើតគណបក្សប្រជាជនកម្ពុជាបានប្តេជ្ញាការពារអោយបាននូវសុខសន្តិភាពពីការចង់បំផ្លាញពីពួកប្រឆាំងជ្រុលនិយម។ ទន្ទឹមនឹងនោះ ឯកឧត្តមកិត្តិសេដ្ឋាបណ្ឌិត បានបន្ថែមថា ព្រែកជីកហ្វូណនតេជោ គឺជាព្រែកជីកជាប្រវត្តិសាស្រ្តរបស់ប្រជាជនកម្ពុជា ពេលជីកបានហើយគឺមានន័យថា៖កម្ពុជា នឹងដកដង្ហើមដោយខ្លួនឯងក្នុងការធ្វើចរាចរទំនិញ ការធ្វើដំណើរ ការទទួលបានជលផលចម្រុះការប្រើប្រាសផ្លូវចុះឡើងជាសាធារណៈតាមផ្លូវទឹក-ផ្លូវគោកក្នុងការផ្លាស់ប្តូរផលិតផលផ្សេងៗពិសេសទំនិញកសិផលគ្រប់ប្រភេទជាដើម។ល។ ព្រែកជីកជាប្រវត្តិសាស្ត្រនេះ ឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានបណ្តោយប្រវែង ១៨០គីឡូម៉ែត្រ និងមានប្រជាជនរស់នៅអមសង្ខាងប្រមាណជិត ២លាននាក់។ គម្រោងជីកព្រែកជាប្រវត្តិសាស្ត្រនេះគឺព្រែកមានតាំងពីយូរយារាប់រយ-ពាន់ឆ្នាំមកហើយ នៅសល់តែ ៧គីឡូម៉ែត្រទៀតប៉ុណ្ណោះ ព្រែកជីកនេះ នឹងឆ្លាយទៅដល់សមុទ្រខ្មែរ នាវានឹងធ្វើចរាចរបានពីភ្នំពេញ ទៅកំពង់ផែសមុទ្រ ខេត្តព្រះសីហនុ មិនធ្វើចរាចរតាមបណ្តោយដងទន្លេមេកុង ទាំងស្រុងដូចកម្ពុជាធ្លាប់ធ្វើពីមុនៗមកនោះឡើយ។ ការដ្ឋាននឹងបើកអនុវត្តនៅថ្ងៃចន្ទ ទី០៥ ខែសីហា ឆ្នាំ២០២៤ ក្នុងរយៈពេល ៤៨ខែ ឬ៤ឆ្នាំ ដែលនឹងត្រូវចំណាយប្រាក់សរុប ១៧០០លានដុល្លារអាមេរិក។

ឯកឧត្តមកិត្តិសេដ្ឋាបណ្ឌិត បានជម្រាបជូនអង្គពិធី អំពីបច្ចុប្បន្នភាព នៃស្ថានការណ៍នយោបាយសង្គម-សេដ្ឋកិច្ច ព្រមទាំងស្ថានភាពទូទៅមួយចំនួនទៀត។ ឯកឧត្តមកិត្តិសេដ្ឋាបណ្ឌិត ក៏បានជម្រាបជូនអាជ្ញាធរដែនដី និងប្រជាពលរដ្ឋ អំពីតួនាទីភារកិច្ចសំខាន់ៗដែលរដ្ឋសភាត្រូវបំពេញ មានដូចជា ការងារនីតិកម្ម មុខងារតាមដានការអនុវត្តច្បាប់ មុខងារភាពជាតំណាងប្រជាពលរដ្ឋ និងការពង្រឹងពង្រីកវិស័យការទូតសភាជាមួយបណ្ដាប្រទេសជាមិត្តជិតឆ្ងាយទូទាំងពិភពលោក និង រដ្ឋសភាក្នុងអាណត្តិទី៧នេះ គឺដឹកនាំដោយសម្តេចមហារដ្ឋសភាធិការធិបតី ឃួន សុដារី ជាប្រធានរដ្ឋសភា គឺជាស្រ្តីទី១ ក្នុងប្រវត្តិសាស្រ្តកម្ពុជា ដែលបានទទួលនូវតំណែងដ៏ឧត្តុង្គឧត្តមនេះ។

ឯកឧត្តមកិត្តិសេដ្ឋាបណ្ឌិត ក៏បានមានប្រសាសន៍លើកឡើងពី រាជរដ្ឋាភិបាលកម្ពុជា ក្នុងនីតិកាលទី៧ នៃរដ្ឋសភាសព្វថ្ងៃ គឺដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីវ័យក្មេង មានសមត្ថភាពខ្ពង់ខ្ពស់ និងទេពកោសល្យដ៏ប៉ិនប្រសប់ ដើម្បីបន្តថែរក្សាសុខសន្តិភាព ឯកភាពជាតិ បូរណភាពទឹកដី ស្ថិរភាពនយោបាយ អភិវឌ្ឍសង្គមសេដ្ឋកិច្ចនិងវប្បធម៌ សំដៅលើកកម្ពស់ជីវភាពរស់នៅរបស់ប្រជាពលរដ្ឋនៅទូទាំងព្រះរាជាណាចក្រកម្ពុជា ឱ្យកាន់តែល្អប្រសើរឡើង ហើយក៏បានឆ្លុះបញ្ចាំង ពីការផ្ទេរអំណាចដោយរលូន និងសន្តិវិធី ដែលមិនធ្លាប់មាននៅក្នុងប្រវត្តិសាស្រ្ត នៃប្រទេសកម្ពុជា ៕