ឧត្តមសេនីយ៍ទោ សិទ្ធិ ឡោះ ជម្រុញដល់នគរបាលការិយាល័យជំនាញ ត្រូវផ្តល់សេវាសាធារណៈជូនប្រជាពលរដ្ឋឲ្យបានល្អ និងទាន់ពេលវេលា
ភ្នំពេញ៖ លោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ បានជម្រុញដល់នគរបាលការិយាល័យជំនាញ និងគ្រប់អធិការដ្ឋាននគរបាលក្រុង-ស្រុក ពិសេសនគរបាលប៉ុស្តិ៍រដ្ឋបាល ត្រូវផ្តល់សេវាសាធារណៈជូនប្រជាពលរដ្ឋឲ្យបានល្អ ទាន់ពេលវេលា។
ការជម្រុញពីសំណាក់លោកលោកឧត្តមសេនីយ៍ទោ សិទ្ធិ ឡោះ បែបនេះធ្វើឡើងនៅព្រឹកថ្ងៃទី១៨ ខែមិថុនា ឆ្នាំ២០២៤ ខណៈពេលអញ្ជើញដឹកនាំកិច្ចប្រជុំវិសាមញ្ញស្តីពីការងារចាំបាច់មួយចំនួន ដើម្បីពង្រឹងជំនាញ បច្ចេកទេស ក្នុងការអនុវត្តការងារប្រចាំថ្ងៃ ដល់លោក លោកស្រី ឧត្តមសេនីយ៍ វរសេនីយ៍ ស្នងការរង នាយការិយាល័យជំនាញ លោកអធិការគ្រប់ក្រុង-ស្រុក លោកមេបញ្ជាការវរនគរបាលការពារព្រំដែនគោកជាច្រើនរូប នៅ សាលប្រជុំស្នងការដ្ឋាននគរបាលខេត្ត។
លោកឧត្តមសេនីយ៍ទោ សិទ្ធិ ឡោះ បានថ្លែងថា អនុវត្តតាមបទបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានដាក់ចេញនូវផែនការដល់កងកម្លាំងនគរបាលរាជធានី-ខេត្ត ត្រូវពង្រឹងការទប់ស្កាត់ បង្ក្រាបបទល្មើសព្រហ្មទណ្ឌ បទល្មើសក្មេងទំនើង បទល្មើសជួញដូរគ្រឿងញៀន បទល្មើសជួញដួរផ្លូវភេទគ្រប់ទំរង់ បទល្មើសសេដ្ឋកិច្ចនិងទំនិញខូចគុណភាព ដោយប្រើវិធានការរដ្ឋបាល វិធានការបង្កា វិធានការច្បាប់ ត្រូវបន្តធ្វើដូចភ្លៀងរលឹម ដើម្បីធានាឲ្យបាននូវសន្តិសុខសណ្តាប់ធ្នាប់សង្គមជូនប្រជាពលរដ្ឋក្នុងមូលដ្ឋាន ។
ជាមួយគ្នានោះផងដែរ លោកឧត្តមសេនីយ៍ទោស្នងការ ក៏បានជម្រុញដល់នគរបាលការិយាល័យជំនាញ និងគ្រប់អធិការដ្ឋាននគរបាលក្រុង-ស្រុក ពិសេសនគរបាលប៉ុស្តិ៍រដ្ឋបាល ត្រូវផ្តល់សេវាសាធារណៈជូនប្រជាពលរដ្ឋឲ្យបានល្អ ទាន់ពេលវេលា ត្រូវបន្តពង្រឹងចុះផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាព បន្តអនុវត្តច្បាប់ និងផ្សព្វផ្សាយច្បាប់ចរចរណ៍ផ្លូវគោក សំដៅធ្វើយ៉ាងណាឲ្យអត្រាគ្រោះថ្នាក់មានកម្រិតទាបបំផុត ។មួយវិញទៀតចំពោះបញ្ហាទំនើង លោកអធិការ្រុង ស្រុក នីមួយៗត្រូវជម្រុញដល់នគរបាលប៉ុស្តិ៍រដ្ឋបាលធ្វើបញ្ជីឈ្មោះ មានរូបថតនិងលេខទូរស័ព្ទដើម្បីងាយស្រួលក្នុងការគ្រប់គ្រង៕
