រដ្ឋបាលខេត្តស្ទឹងត្រែង រៀបចំពិធីសូត្រមន្ត និងប្រារព្ធព្រះរាជពិធី ថ្វាយព្រះពរ ព្រះមហាក្សត្រ ក្នុងឱកាសព្រះរាជពិធីបុណ្យចម្រើនព្រះជន្មគម្រប់ ៧១ យាងចូល ៧២ព្រះវស្សា

ភ្នំពេញ៖ នាព្រឹកថ្ងៃទី១៣ ខែឧសភា ឆ្នាំ២០២៤  រដ្ឋបាលខេត្តស្ទឹងត្រែង បានរៀបចំពិធីសូត្រមន្ត និងប្រារព្ធព្រះរាជពិធី ថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសព្រះរាជពិធីបុណ្យចម្រើន ព្រះជន្មគម្រប់ ៧១ យាងចូល ៧២ព្រះវស្សា ក្រោមអធិបតីភាព ឯកឧត្ដម ឈាង ឡាក់ ប្រធានក្រុមប្រឹក្សាខេត្ត និងឯកឧត្ដម ស្វាយ សំអ៊ាង អភិបាលខេត្តស្ទឹងត្រែង ដោយមានការអញ្ជើញចូលរួមពី ឯកឧត្ដម លោកជំទាវ សមាជិកក្រុមប្រឹក្សាខេត្ត ឯកឧត្ដម អភិបាលរងខេត្ត កងកម្លាំងទាំង៣ មន្ទីរអង្គភាពជុំវិញខេត្ត និងមន្ត្រីរាជការក្នុងខេត្ត។

ក្នុងឱកាសនោះ ឯកឧត្ដម ស្វាយ សំអ៊ាង អភិបាលខេត្ត បានអានសារលិខិតថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសព្រះរាជពិធីបុណ្យចម្រើន ព្រះជន្មគម្រប់ ៧១ យាងចូល ៧២ព្រះវស្សា មានដូចខាងក្រោម៖

«នៅក្នុងវរោកាសដ៏មហានក្ខត្តឫក្សប្រពៃថ្លៃថ្លា ប្រកបដោយក្តីអភិរម្យមង្គលសោមនស្សរីករាយ នៃព្រះរាជ ពិធីបុណ្យចម្រើនព្រះជន្ម ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា គម្រប់ ៧១ព្រះវស្សា យាងចូល ៧២ព្រះវស្សា ដែលនឹងប្រព្រឹត្តទៅនាថ្ងៃទី១៤ ខែឧសភា ឆ្នាំ២០២៤ ខាងមុខនេះ ទូលព្រះបង្គំយើងខ្ញុំទាំងអស់គ្នាជាក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំង ប្រដាប់អាវុធគ្រប់លំដាប់ថ្នាក់ ព្រះសង្ឃ កម្មករ និយោជិត សិស្សនិស្សិត និងប្រជារាស្ត្រគ្រប់ជនជាតិទូទាំងខេត្តស្ទឹងត្រែងរបស់ព្រះអង្គ សូមព្រះបរមរាជានុញ្ញាតសម្តែងថ្វាយនូវអំណរសាទរឥតឧបមានិងសូមចូលរួមថ្វាយនូវ ព្រះសព្ទសាធុការពរជ័យ បវរសួស្តី សិរីវឌ្ឍនា វិបុលសុខ មហាប្រសើរគ្រប់ប្រការប្រកបដោយកត្តញ្ញូកតវេទិតាធម៌ យ៉ាងជ្រាលជ្រៅបំផុត ចំពោះព្រះមហាករុណាទិគុណ និងព្រះព្រហ្មវិហារធម៌របស់ព្រះករុណាថ្លៃវិសេស។

ស្ថិតក្នុងវរោកាសដ៏មហាមង្គលាភិរម្យអភិសិរីភទ្រដ៏វិសេសថ្លៃថ្លានេះ ទូលព្រះបង្គំយើងខ្ញុំទាំងអស់គ្នា សូមព្រះបរមរាជានុញ្ញាតលើកហត្ថប្រណមបួងសួងដល់ទេវតាថែរក្សាទឹកដីអង្គរដ៏បវរ នៃព្រះរាជាណាចក្រកម្ពុជា គុណបុណ្យព្រះរតនត្រ័យកែវទាំងបី ឫទ្ធិបារមី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាព្រះមហាស្វេតច្ឆត្រ បុណ្យបារមីនៃដួងវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ជាពិសេសបុណ្យបារមី ព្រះករុណាព្រះមហាវិរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ អភិបាលប្រោះព្រំនូវ ព្រះសព្ទសាធុការពរជ័យគ្រប់ប្រការថ្វាយចំពោះ ព្រះករុណាជាអម្ចាស់ជីវិតលើត្បូង និងសូមព្រះអង្គ មានព្រះរាជសុខភាពល្អបរិបូរ ព្រះបញ្ញាញាណភ្លឺថ្លា ព្រះកាយពលមាំមួន ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់នៅក្នុង ព្រះបរមសិរីរាជសម្បត្តិ ជាម្លប់ដ៏ត្រជាក់ត្រជំ ចម្រុងចម្រើន សម្បូរសប្បាយ ថ្កុំថ្កើងរុងរឿង ដល់ជាតិមាតុភូមិ និងប្រជានុរាស្ត្រជាទីស្នេហារបស់ព្រះអង្គជានិច្ចនិរន្តតរៀងទៅ។

សូម ព្រះករុណាជាអម្ចាស់ជីវិតលើត្បូង ទ្រង់ព្រះមេត្តាទទួលនូវអភិវន្ទនាការដ៏ខ្ពង់ខ្ពស់បំផុត និងទឹកចិត្ត ភក្តីភាពដ៏ស្មោះស្ម័គ្រអស់ពីដួងចិត្តពីទូលព្រះបង្គំយើងខ្ញុំទាំងអស់គ្នា»។

ជាមួយគ្នានេះ ឯកឧត្ដមអភិបាលខេត្ត បានមានប្រសាសន៍ថា សមិទ្ធផលជាច្រើន នៅលើទឹកដីខេត្តស្ទឹងត្រែង ដែលជាព្រះរាជអំណោយ ដ៏ថ្លៃថ្លាបំផុតរបស់ ព្រះករុណាជាអម្ចាស់ជីវិតលើត្បូង បាននឹងកំពុងបម្រើដល់ប្រយោជន៍ ក្នុងវិស័យពុទ្ធចក្រ និងអាណាចក្រ រួមមាន វត្តអារាម អគារសាលារៀន មន្ទីរពេទ្យ និងជាពិសេសជួសជុលឡើងវិញនូវស្តូបអនុស្សាវរីយ៍ដែលកសាងឡើងដោយ ព្រះករុណា ព្រះបរមរតនកោដ្ឋ ក្នុងអំឡុងឆ្នាំ១៩៦៦ ក្នុងស្រុកបុរីអូរស្វាយសែនជ័យ។

ឯកឧត្ដមអភិបាលខេត្ត បានបន្ថែមថា ទន្ទឹមនេះ ស្ថិតនៅក្នុងដំណាក់កាលដ៏លំបាកនានា ព្រះករុណាថ្លៃវិសេស តែងតែយក ព្រះរាជហឫទ័យទុកដាក់អំពីសុខទុក្ខប្រជារាស្ត្ររបស់ព្រះអង្គ និងបានប្រោសព្រះរាជទាន អំណោយផ្ទាល់របស់ព្រះអង្គ ជួយដល់ប្រជារាស្ត្រទីទ័លក្រជួបការលំបាកពីផលប៉ះពាល់ គ្រោះមហន្តរាយផ្សេងៗ និងរងគ្រោះពីការឆ្លងរាលដាលនៃជំងឺកូវីដ-១៩ ដោយបានព្រះរាជទានព្រះរាជអំណោយ ជាស្បៀងអាហារ និងសម្ភារៈចាំបាច់ ជាច្រើនដល់ប្រជារាស្ត្រ របស់ព្រះអង្គ និងអាជ្ញាធរ កងកម្លាំងប្រដាប់អាវុធ ក្នុងខេត្តស្ទឹងត្រែង ៕