សម្ដេចមហាបវរធិបតី៖ កម្ពុជា នៅតែមានការប្ដេជ្ញាចិត្តខ្ពស់ ក្នុងការអនុវត្តន៍កាតព្វកិច្ច ដែលមានចែងក្នុងអនុសញ្ញា ស្តីពីការហាមការប្រើប្រាស់ ការរក្សាទុក ការផលិត និងការផ្ទេរគ្រប់មីនប្រឆាំងមនុស្ស និងការបំផ្លាញគ្រាប់មីន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា កម្ពុជា នៅតែមានការប្ដេជ្ញាចិត្តខ្ពស់ ក្នុងការអនុវត្តន៍កាតព្វកិច្ច ដែលមានចែងក្នុងអនុសញ្ញា ស្តីពីការហាមការប្រើប្រាស់ ការរក្សាទុក ការផលិត និងការផ្ទេរគ្រប់មីនប្រឆាំងមនុស្ស និងការបំផ្លាញគ្រាប់មីន ហៅកាត់ថាអនុសញ្ញាអូតាវ៉ា ។

ក្នុងពិធីបើកសន្និបាតលើកទី៨០ របស់គណៈកម្មការសេដ្ឋកិច្ច និងសង្គមកិច្ច សម្រាប់អាស៊ី-ប៉ាស៊ីហ្វិក (the Economic and Social Commission for Asia and the Pacific- ESCAP) នៅទីក្រុងបាងកក ប្រទេសថៃ នាថ្ងៃទី២២ ខែមេសា ឆ្នាំ២០២៤ សម្តេចធិបតី​ ហ៊ុន ម៉ាណែត បានអំពាវនាវឱ្យមានកិច្ចខិតខំប្រឹងប្រែងរួមគ្នាដើម្បីលុបបំបាត់អាវុធដ៏គ្រោះថ្នាក់នេះ ក៏ដូចជាគាំទ្រ និងចូលរួមក្នុងព្រឹត្តិការណ៍ប្រវត្តិសាស្ត្រនេះ។

សម្តេចធិបតី​ ហ៊ុន ម៉ាណែត បានមានប្រសាសន៍ថា ក្នុងនាមជាប្រធានអនុសញ្ញាអូតាវ៉ាឆ្នាំនេះ កម្ពុជាចូលរួមជាអធិបតី និងជាម្ចាស់ផ្ទះនៃ កិច្ចប្រជុំត្រួតពិនិត្យឡើងវិញលើកទី៥ ដែលមានចំណងជើងថា “កិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន” នៅថ្ងៃទី ២៥-២៩ ខែវិច្ឆិកា ឆ្នាំ២០២៤ ។

សម្តេចធិបតី លើកឡើងថា សម្រាប់កម្ពុជា បញ្ហាបោសសម្អាតគ្រាប់មីន និងកាកសំណល់មិនទាន់ផ្ទុះ ដែលបន្សល់ពីសង្គ្រាម នៅតែជាឧបសគ្គសម្រាប់ការអភិវឌ្ឍទាំងមូល រួមទាំងការតភ្ជាប់គម្លាតប្រព័ន្ធឌីជីថល និងការទទួលបានសេវាអ៊ីនធឺណិតប្រកបដោយគុណភាព។ ដោយយល់ឃើញពីភាពចាំបាច់នៃបញ្ហានេះ សកម្មភាពមីនត្រូវបានបញ្ចូលជាគោលដៅអភិវឌ្ឍន៍ប្រកបដោយចីរភាពទី១៨ របស់កម្ពុជា។

សម្តេចធិបតី​ ហ៊ុន ម៉ាណែត ក៏បានថ្លែងអំណរគុណចំពោះ UN-ESCAP ដែលបានជួយដល់ប្រទេសកម្ពុជា ក្នុងការតាក់តែងគោលនយោបាយជាតិសកម្មភាពមីន ដែលនេះជាលើកដំបូងហើយដែល UN-ESCAP បានចូលរួមក្នុងសកម្មភាពមីន៕