សម្តេចតេជោ៖ ជាការគាប់ជូនដែរ ខ្ញុំក្លាយជានាយករដ្ឋមន្ត្រីនៅអាយុ៣២ឆ្នាំ និងក្លាយជាប្រធានព្រឹទ្ធសភា អាយុ៧២ឆ្នាំ មានលេខ២នៅខាងចុងដូចគ្នា
ភ្នំពេញ៖ សម្ដេចតេជោ ហ៊ុន សែន ប្រធានព្រឹទ្ធសភា បានរំលឹកថា កាលពី៥៤ឆ្នាំមុន សម្ដេចបានចូលព្រៃតស៊ូតាមការអំពាវនាវរបស់សម្ដេចព្រះនរោត្តម សីហនុ «ព្រះបរមរតនកោដ្ឋ» មកដល់វ័យ៣២ឆ្នាំ សម្ដេចបានក្លាយជានាយករដ្ឋមន្ត្រី ហើយមកដល់វ័យ៧២ឆ្នាំនេះក៏បានក្លាយជាប្រធានព្រឹទ្ធសភា គឺជារឿងគាប់ជូនមួយ ដែលមានលេខ២នៅខាងចុងដូចគ្នា ។
ក្នុងឱកាសព្រឹទ្ធសភាបើកសម័យប្រជុំលើកដំបូង សម្រាប់នីតិកាលទី៥ ក្រោមព្រះរាជាធិបតីភាពដ៏ខ្ពង់ខ្ពស់បំផុត របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាថ្ងៃទី៣ ខែមេសា ឆ្នាំ២០២៤ សម្ដេចតេជោ បានផ្ដាំផ្ញើដល់ថ្នាក់ដឹកនាំ សមាជិក សមាជិកាព្រឹទ្ធសភាទាំងឡាយ សូមថែរក្សាសុខភាពឱ្យបានផុតនីតិកាលដែលនឹងចូលមកដល់នៅឆ្នាំ២០៣០ ខណៈសម្ដេចតេជោផ្ទាល់នៅឆ្នាំ២០៣០នោះនឹងឈានចូលដល់វ័យ៧៨ឆ្នាំ។
សម្ដេចតេជោ ហ៊ុន សែន បញ្ជាក់ថា «វាជាការគាប់ជូនដែរ ថ្ងៃនេះ៥៤ឆ្នាំមុន ខ្ញុំកំពុងត្រៀមរៀបចំលួចលាក់ខោអាវចូលទៅព្រៃម៉ាក់គី តាមការអំពាវនាវរបស់សម្ដេចព្រះនរោត្តម សីហនុ ព្រះបរមរតនកោដ្ឋ ហើយនៅពេលដែលខ្ញុំចូលកាន់តំណែងជានាយករដ្ឋមន្ត្រីក្នុងវ័យ៣២ឆ្នាំ ថ្ងៃនេះចូលកាន់តំណែងជាប្រធានព្រឹទ្ធសភាក្នុងវ័យ៧២ឆ្នាំ អ៉ីចឹងចន្លោះ៤០ឆ្នាំ គាប់ជូនលេខ២នៅខាងចុងដូចគ្នា»។
គួរឲ្យដឹងផងដែរថា ចាប់ពីឆ្នាំ២០២៤នេះរហូតដល់ឆ្នាំ២០២៩ សម្ដេចតេជោ ហ៊ុន សែន នៅកាន់តំណែងជាប្រធានព្រឹទ្ធសភា៕
