ក្រសួងការងារ ប្រកាសព័ត៌មានស្ដីពី ការផ្សព្វផ្សាយព័ត៌មានមិនពិតជុំវិញការបើកប្រាក់ឈ្នួលដល់បងប្អូនកម្មករនិយោជិត នៃក្រុមហ៊ុន វ៉ាយ & ដាប់បែលយូ ហ្គាមេន (Y & W GARMENT CO., LTD.)
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសព័ត៌មានស្ដីពី ការផ្សព្វផ្សាយព័ត៌មានមិនពិតជុំវិញការបើកប្រាក់ឈ្នួលដល់បងប្អូនកម្មករនិយោជិត នៃក្រុមហ៊ុន វ៉ាយ & ដាប់បែលយូ ហ្គាមេន (Y & W GARMENT CO., LTD.)។
បើយោងតាមសេចក្តីប្រកាសព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា ក្រសួងការងារ និងបណ្តុះបណ្តាលវិជ្ជាជីវៈ សូមជម្រាបជូនដំណឹងដល់បងប្អូនកម្មករនិយោជិតនៃក្រុមហ៊ុន វ៉ាយ & ដាប់បែលយូ ហ្គាមេន (Y & W GARMENT CO., LTD.) ជ្រាបថា នារសៀលថ្ងៃទី១៩ នារសៀលថ្ងៃទី១៩ ខែមីនា ឆ្នាំ២០២៤នេះ មានការ បំផុសព័ត៌មានមិនពិតថា នៅព្រឹកស្អែក ថ្ងៃទី២០ ខែមីនា ក្រសួងនឹងធ្វើការបើកប្រាក់ឈ្នួល និងប្រាក់បំណាច់ ផ្សេងៗជូនបងប្អូនកម្មករនិយោជិត។ ក្រសួងសូមបញ្ជាក់ថា នេះជាព័ត៌មានមិនពិត និងសូមបងប្អូនកម្មករនិយោជិត កុំជឿលើការផ្សព្វផ្សាយ និងបំផុសព័ត៌មានមិនពិតនេះឱ្យសោះ។
បច្ចុប្បន្ននេះ ក្រសួងបានទទួលរួចហើយនូវដីការក្សាការពារ ហើយសាលាដំបូងរាជធានីភ្នំពេញក៏កំពុង បំពេញនីតិវិធីលក់ឡៃឡុងទ្រព្យសម្បត្តិ ដើម្បីបានថវិកាទូទាត់ជូនបងប្អូនកម្មករនិយោជិត។ ក្រោយពេលដែល តុលាការបានបញ្ចប់នីតិវិធី និងលក់ឡៃឡុងទ្រព្យសម្បត្តិក្រុមហ៊ុនបានថវិការួចរាល់ហើយនោះ ក្រសួងនឹងប្រកាស ជាសាធារណៈឱ្យបងប្អូនកម្មករនិយោជិតជ្រាប និងមកបើកប្រាក់ឈ្នួលនិងប្រាក់បំណាច់ផ្សេងៗជាក់ជាពុំខាន។
ក្រសួងការងារ និងបណ្តុះបណ្តាលវិជ្ជាជីវៈ សូមអំពាវនាវដល់បុគ្គលទាំងឡាយ ដែលមានបំណងចង់ជួយ ដល់បងប្អូនកម្មករនិយោជិតពិតប្រាកដ សូមសិក្សាស្វែងយល់អំពីច្បាប់ និងនីតិវិធីនៃការលក់ឡៃឡុង ឱ្យបាន ត្រឹមត្រូវ មុននឹងផ្សព្វផ្សាយព័ត៌មានដល់បងប្អូនកម្មករនិយោជិត ចៀសវាងបង្កឱ្យមានការយល់ខុស។
សូមបងប្អូនកម្មករនិយោជិតដែលមានការងារថ្មី មេត្តាបន្តធ្វើការជាធម្មតារហូតដល់មានការជូនដំណឹង ជាផ្លូវការពីក្រសួងក្នុងពេលឆាប់ៗខាងមុខនេះ។ ដោយឡែក សម្រាប់បងប្អូនកម្មករនិយោជិត ដែលមិនទាន់មានការងារធ្វើ សូមមកទទួលឱកាសការងារថ្មីពីទីភ្នាក់ងារជាតិមុខរបរ និងការងារ (NEA) ដែលប្រចាំការនៅមុខរោងចក្រ និងក្នុងតំបន់ ដែលបងប្អូនស្នាក់នៅ។ សូមបងប្អូនមេត្តាកុំរងចាំតែប្រាក់ខែចាស់ ហើយទុកឱកាសការងារថ្មី និងប្រាក់ខែថ្មីឱ្យរំលងហួស។ អ្វីដែលជាអត្ថប្រយោជន៍នៅរោងចក្រចាស់នឹងមិនបាត់បង់ឡើយ នៅពេលដែល នីតិវិធីតុលាការ និងការលក់ឡៃឡុងត្រូវបានបញ្ចប់នៅពេលខាងមុខ ៕
