ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក ដឹកនាំកិច្ចប្រជុំបូកសរុបការងារ ដើម្បីអនុវត្តគម្រោង IWRM ជាមួយគណៈប្រតិភូក្រុមបេសកកម្មដៃគូអភិវឌ្ឍន៍
ភ្នំពេញ៖ នៅទីស្តីការក្រសួង នាព្រឹកថ្ងៃទី១៥ ខែមីនា ឆ្នាំ២០២៤ នេះ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំបូកសរុបលទ្ធផលចុងក្រោយរបស់គណៈប្រតិភូក្រុមបេសកកម្មដៃគូអភិវឌ្ឍន៍ក្នុងការចុះពិនិត្យជាក់ស្តែង ដើម្បីអនុវត្តន៍ប្រកបដោយប្រសិទ្ធភាពខ្ពស់និងមានស័ក្តិសិទ្ធភាព លើគម្រោងការគ្រប់គ្រងវិស័យធនធានទឹកដោយវិធានការចម្រុះ(IWRM) ក្រោមហិរញ្ញប្បទានពីធនាគារអភិវឌ្ឍន៍អាស៊ី(ADB) និងសហហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ក្នុងភូមិសាស្រ្តខេត្តពោធិ៍សាត់ និងខេត្តបាត់ដំបង។
ឯកឧត្តមរដ្ឋលេខាធិការមានប្រសាសន៍ឱ្យដឹងថា កិច្ចប្រជុំបូកសរុបនេះមានការចូលរួមពីអគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ អគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុលនៃក្រសួងសេដ្ឋកិច្ច និងហិរញ្ញវត្ថុ លោក Anthoney Robert Gill នាយករងនៃស្ថានតំណាងធនាគារអភិវឌ្ឍន៍អាស៊ីប្រចាំកម្ពុជា លោក Ryutaro Takaku ប្រធានក្រុមបេសកកម្មធនាគារអភិវឌ្ឍន៍អាស៊ីនិងសហការី លោកស្រី Bo Zhang សហប្រធានក្រុមបេសកកម្មធនាគារវិនិយោគហេដ្ឋារចនាសម្ព័ន្ធអាស៊ីនិងសហការី ឯកឧត្តមរដ្ឋលេខាធិការ អនុរដ្ឋលេខាធិការ អគ្គនាយក អគ្គលេខាធិការ លោក លោកស្រីអគ្គនាយករងនៃក្រសួងស្ថាប័នពាក់ព័ន្ធនានា ឯកឧត្តមអភិបាលរងនៃគណៈអភិបាលខេត្តពោធិ៍សាត់ និងខេត្តបាត់ដំបង លោកប្រធាន អនុប្រធានមន្ទីរធនធានទឹក និងឧតុនិយមពោធិ៍សាត់និងខេត្តបាត់ដំបង និងសហការីជាតិ អន្តរជាតិដែលអញ្ជើញមកពីអង្គភាពគ្រប់គ្រង និងអនុវត្តន៍គម្រោងរបស់ក្រសួងធនធានទឹក និងឧតុនិយម។
ជាមួយគ្នានេះ ឯកឧត្តមរដ្ឋលេខាធិការបញ្ជាក់ថា ដោយបានទទួលនូវកិច្ចសហប្រតិបត្តិការដ៏រឹងមាំពីសំណាក់ក្រសួងសេដ្ឋកិច្ច និងហិរញ្ញវត្ថុ ធនាគារអភិវឌ្ឍន៍អាស៊ី និងធនាគារវិនិយោគហេដ្ឋារចនាសម្ព័ន្ធអាស៊ី ក្រសួងធនធានទឹក និងឧតុនិយមបានប្តេជ្ញារួមគ្នាធ្វើការអនុវត្តន៍គម្រោងខ្នាតធំ IWRM ធ្វើការអភិវឌ្ឍន៍ និងធ្វើទំនើបកម្មលើហេដ្ឋារចនាសម្ព័ន្ធក្នុងការគ្រប់គ្រងវិស័យធនធានទឹក និងឧតុនិយមក្នុងខេត្តភូមិភាគពាយ័ព្យ ដើម្បីទប់ទល់នឹងការប្រែប្រួលអាកាសធាតុ និងហានិភ័យពីគ្រោះមហន្តរាយធម្មជាតិ មានដូចជា ជំនន់គ្រប់ប្រភេទនិងគ្រោះរាំងស្ងួត ដោយធានាយ៉ាងណាធ្វើការអនុវត្តន៍នូវគម្រោងនេះឱ្យបានទាន់ពេលវេលា៕
