សម្តេចធិបតី ហ៊ុន ម៉ាណែត ឯកភាពចំពោះការប្រើពាក្យ «ផែនការសកម្មភាពដែលរស់រវើក» ដែលលើកឡើងដោយរដ្ឋមន្ត្រីការងារ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងគាំទ្រ និងឯកភាពចំពោះការប្រើពាក្យ “ផែនការសកម្មភាពដែលរស់រវើក” ដែលលើកឡើងដោយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ។
ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្តឆ្នាំ២០២៤ របស់ក្រសួងការងារ និងបណ្តុះបណ្តាលវិជ្ជាជីវៈ និងប្រកាសដាក់ឱ្យអនុវត្តផែនការសន្តិសុខសង្គម និងបណ្ដុះបណ្ដាលវិជ្ជាជីវៈ ឆ្នាំ២០២៤-២០២៨ នាថ្ងៃទី៨ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត បញ្ជាក់ថា «ខ្ញុំឯកភាព ជាមួយនឹងឯកឧត្តម ហេង សួរ ដែលប្រើពាក្យ ផែនការសកម្មភាព ដែលរស់រវើក មិនមែនផែនការសកម្មភាព ដែលសរសេរហើយ នៅលើក្រដាសហើយ ត្រូវតែអនុវត្ត ដូចបន្ទាត់នោះទេ» ។
សម្ដេចធិបតីបន្តថា ត្រូវដាក់ទិសដៅសមត្តកម្មជាគោល។ អ្វីនៅលើក្រដាស ត្រូវកែសម្រួលឱ្យស្របតាមសមត្តកម្មដែលយើងចង់បាន។ ពិតណាស់យើងត្រូវអនុវត្តន៍នៅក្នុងក្របខណ្ឌច្បាប់ ក្របខណ្ឌយុទ្ធសាស្ត្រកម្រិតមួយ ក៏ប៉ុន្តែកុំឱ្យវាងាប់ក្រឡា កុំឱ្យធ្វើអ្វីមួយផ្អែកតាមច្បាប់ ក៏មិនហ៊ានកែប្រែនៅក្នុងក្របខណ្ឌអនុវត្ត។
សម្តេចធិបតីបន្ថែមថា ពាក្យនេះសំខាន់ណាស់ ព្រោះពេលវេលាជាមាសពេជ្រ។ បើយើងចាំដល់ប្រជុំមួយឆ្នាំទើបកែសម្រួលផែនការ យើងខាតអស់ ១២ខែ។ នេះហើយទាមទារការវាយតម្លៃជាប់ជាប្រចាំ ហើយការតាមដានត្រួតពិនិត្យគឺជាការសំខាន់ណាស់។ ជួនកាលអ្វីដែលយើងដាក់កាលពីឆ្នាំនេះ វាផ្អែកទៅលើស្ថានភាពអតីតកាល និងបច្ចុប្បន្នកាល វាមិនស្របទៅនឹងសកម្មភាព ដើម្បីឆ្លើយតបទៅសកម្មភាពនៃអនាគតកាលនោះទេ។ ដូច្នេះត្រូវកែប្រែទៅតាមស្ថានភាពជាក់ស្ដែង ៕
