ប្រធានក្រុមប្រឹក្សាខេត្តក្រចេះ ជំរុញដល់មន្ទីរទេសចរណ៍ខេត្ត ត្រូវបន្តយកចិត្តទុកដាក់ពង្រឹង ទីតាំងលេងកំសាន្តរមណីយដ្ឋានអាហារដ្ឋានឲ្យកាន់តែមានភាពល្អប្រសើរ

ភ្នំពេញ៖ នាព្រឹកថ្ងៃពុធ ១៤កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៤ ខែមករា ឆ្នាំ២០២៤ ឯកឧត្តម ហឿ សុីយ៉ែម ប្រធានប្រធានក្រុមប្រឹក្សាខេត្តក្រចេះ និងឯកឧត្តម ហេង សុថា អភិបាលរងខេត្ត បានអញ្ជើញដឹកនាំកិច្ចប្រជុំក្រុមប្រឹក្សាលើកទី ៥៦ អាណត្តិទី៣ ឆ្នាំទី៥ នៅព្រឹកថ្ងៃទី២៤ ខែមករា ឆ្នាំ២០២៤ នៅសាលប្រជុំក្រុមប្រឹក្សាខេត្ត។

ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត បានជំរុញដល់រដ្ឋបាលក្រុងក្រចេះ រួមនឹងប៉ុស្តិ៍នគរបាលរដ្ឋបាល ចៅសង្កាត់អូឬស្សី ក៏ដូចជាមន្ទីរសាធារណការ និងដឹកជញ្ជូនខេត្ត សូមចុះពិនិត្យ និងណែនាំដល់បងប្អូនប្រជាពលរដ្ឋដែលរស់នៅអមសងខាងផ្លូវខេត្ត ក្នុងសង្កាត់អូឬស្សី ក្រុងក្រចេះ ដែលបានដាក់តាំងទំនិញផ្សេងៗលក់ដូរនៅតាមមុខផ្ទះរបស់ខ្លួន សូមកុំដាក់តាំងទំនិញលើចិញ្ចើមផ្លូវដែលកំពុងស្ថាបនា ឆូសឆាយពង្រីកផ្លូវជា២កន្លង ដែលជាហេតុនាំអោយមានផលប៉ះពាល់ដល់ដំណើរការស្ថាបនាសាងសង់ ហើយវាបង្ហាញអោយឃើញពីភាពលក់ដូរគ្មានសណ្តាប់ធ្នាប់ គឺសូមដាក់តាំងលក់ដូរទំនិញរបស់ខ្លួមចូលអោយផុតពីតួរផ្លូវដែលកំពុងស្ថាបនា។

ដោយឡែកករណីបងប្អូនប្រជាពលរដ្ឋដែលចិញ្ចឹមសត្វគោ ហើយប្រលែងឲ្យដើរស៊ីស្មៅពាស់វាលពាសកាលតាមដងផ្លូវក្នុងសង្កាត់អូឬស្សី-សង្កាត់ក្រចេះ ឯកឧត្តមប្រធានក្រុមប្រឹក្សាខេត្ត បានជំរុញដល់ប៉ុស្តិ៍នគរបាលក្នុងមូលដ្ឋានក៏ដូចជាសាលាក្រុងត្រូវមានវិធានការចាប់សត្វគោនោះយកទៅរក្សាទុកនិងកោះហៅម្ចាស់ មកអប់រំ និងផាកពិន័យ ដែលបានប្រលែងសត្វគោរបស់ខ្លួនឲ្យដើរពាសវាលពាសកាល ពិសេសបានដើរតាមដងផ្លូវដែលជាហេតុបង្កឲ្យមានគ្រោះថ្នាក់ចរាចរណ៍ ដល់អ្នកធ្វើដំណើរផងដែរ។

ទន្ទឹមនឹងនោះដែរឯកឧត្តម ហឿ ស៊ីយ៉ែម បានរំលេចនៅភាពជោគជ័យរបស់រដ្ឋបាលខេត្ត ក៏ដូចជានៅតាមបណ្ដាមន្ទីរ-អង្គភាព បានខិតខំបំពេញការងារទៅតាមតួនាទីភារកិច្ចបានល្អប្រសើរក្នុងន័យរួមគ្នាបន្តសហការយ៉ាងស្អិតរមួតដើម្បីអភិវឌ្ឍន៍ខេត្តក្រចេះអោយមានការរីកចំរើន។ ជាមួយគ្នាផងដែរនោះ ឯកឧត្តមប្រធានក្រុមប្រឹក្សាខេត្ត បានរំលេចពីការងារវិស័យទេសចរណ៍ក្នុងខេត្តក្រចេះ និងបានជំរុញដល់មន្ទីរទេសចរណ៍ខេត្ត ត្រូវបន្តខិតខំយកចិត្តទុកដាក់ពង្រឹង ទីតាំងលេងកំសាន្តរមណីយដ្ឋានអាហារដ្ឋានឲ្យកាន់តែមានភាពល្អប្រសើរឡើង។

ឯកឧត្តមប្រធានក្រុមប្រឹក្សាខេត្ត បានគូសបញ្ជាក់ថា ក្រោយពីការបង្កើតនូវរាជរដ្ឋាភិបាល នីតិកាលទី៧ កំណែទម្រង់ វិមជ្ឈការ និងវិសហមជ្ឈការ នៅតែជាអាតិភាពក្នុងការបង្កើតប្រព័ន្ធរដ្ឋបាលថ្នាក់ក្រោមជាតិ ដែលឆ្លុះបញ្ចាំងនូវគោលការណ៍ជាគន្លឹះនានា នៃអភិបាលកិច្ចល្អ រួមមានគណនេយ្យភាព នីតិរដ្ឋ តម្លាភាព អាចឆ្លើយតបបានចំពោះបញ្ហាប្រឈមនានានៅមូលដ្ឋាន ប្រកបដោយប្រសិទ្ធភាព។

ជាមួយគ្នានោះដែរ ឯកឧត្តមប្រធានក្រុមប្រឹក្សាខេត្ត បានជំរុញដល់ថ្នាក់ដឹកនាំមន្ទីរ អង្គភាព អាជ្ញាធរក្រុង-ស្រុក គ្រប់កាលៈទេសៈដែលប្រជាពលរដ្ឋជួបការលំបាក ត្រូវយកចិត្តទុកដាក់ខ្ពស់ ក្នុងការដោះស្រាយរាល់បញ្ហាដែលបានកើតឡើង ឱ្យបានទាន់ពេលវេលា ប្រកបដោយប្រសិទ្ធភាព ត្រូវមានសាមគ្គីភាពផ្ទៃក្នុង និងមានស្មារតីទទួលខុសត្រូវក្នុងការបំពេញការងាររបស់ខ្លួន ស្របតាមគោលនយោបាយ ច្បាប់ និងលិខិតបទដ្ឋានគតិយុត្តពាក់ព័ន្ធ ៕