សម្ដេចធិបតី៖ បេក្ខជនជាប់និទ្ទេស A ទាំងអស់ ទទួលបានលទ្ធផលល្អប្រសើរទៅបាន ដោយសារមានការចូលរួមពីតួអង្គសំខាន់ចំនួន៥
ភ្នំពេញ៖ ក្នុងពិធីសំណេះសំណាលជាមួយ បេក្ខជនជាប់និទ្ទេស A ទាំង ១,៦៩១នាក់ និងបេក្ខជននិទ្ទេស A ក្នុងការប្រឡងសញ្ញាបត្របច្ចេកទេសនិងវិជ្ជាជីវៈកម្រិត ៣ ចំនួន ១៨នាក់ ស្រី ១៤នាក់ នាព្រឹកថ្ងៃទី០៩ ខែមករា ឆ្នាំ២០២៤នេះ សម្ដេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុេជា បានលើកឡើងថា បេក្ខជនជាប់និទ្ទេស A ទាំង ១,៦៩១នាក់ អាចទទួលបានលទ្ធផលល្អប្រសើរនេះទៅបាន គឺដោយសារមានការចូលរួមខិតខំប្រឹងប្រែងពីគ្រប់ភាគីពាក់ព័ន្ធពិសេសតួអង្គ០៥សំខាន់៖
១⁃សិស្សានុសិស្សខ្លួនឯងផ្ទាល់
២⁃ការយកចិត្តទុកដាក់បង្រៀន ពីលោកគ្រូ អ្នកគ្រូ
៣⁃ការជួយជ្រោមជ្រែងពីមាតាបិតា-អាណាព្យាបាលរបស់សិស្សានុសិស្ស ទាំងអស់
៤⁃ការយកចិត្តទុកដាក់របស់ ក្រសួងអប់រំ យុវជន និង កីឡា
៥⁃ការចូលរួមរបស់មហាជន រួមទាំងក្រុមការងារគណបក្សប្រជាជនកម្ពុជាចុះជួយមូលដ្ឋាន ដែលបានខ្នះខ្នែងផ្តល់លទ្ធភាពបំពាក់បំប៉នសមត្ថភាព ដល់សិស្សានុសិស្សនៅមុនការប្រឡង ដើម្បីជួយក្មួយៗសិស្សានុសិស្ស ទទួលបានលទ្ធផលល្អក្នុងការសិក្សា និង ការប្រឡង ដោយជោគជ័យ រហូតទទួលបានជ័យលាភីនិទ្ទេស A នេះ។
គួររំលឹកថាលទ្ធផលនៃកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិចាប់ពីឆ្នាំ២០១៤ រហូតដល់ឆ្នាំ២០២៣ ដូចតទៅ៖
-ឆ្នាំ២០១៤ បេក្ខជនជាប់និទ្ទេស A ចំនួន ១១នាក់។
-ឆ្នាំ២០១៥ បេក្ខជនជាប់និទ្ទេស A ចំនួន ១០៨នាក់។
-ឆ្នាំ២០១៦ បេក្ខជនជាប់និទ្ទេស A ចំនួន ៤០៥នាក់។
-ឆ្នាំ២០១៧ បេក្ខជនជាប់និទ្ទេស A ចំនួន ៤២៤នាក់។
-ឆ្នាំ២០១៨ បេក្ខជនជាប់និទ្ទេស A ចំនួន ៤០៨នាក់។
-ឆ្នាំ២០១៩ បេក្ខជនជាប់និទ្ទេស A ចំនួន ៤៤៣នាក់។
-ឆ្នាំ២០២០ ដោយស្ថិតក្នុងដំណាក់កាលនៃការប្រយុទ្ធប្រឆាំង និងការរីករាលដាលជំងឺកូវីដ-១៩ ក្រសួងបានកំណត់ឱ្យបេក្ខជនជាប់ដោយស្វ័យប្រវត្តិ និងមិនកំណត់និទ្ទេស ។
-ឆ្នាំ២០២១ បេក្ខជនជាប់និទ្ទេស A ចំនួន ១,៧៥៧នាក់។
-ឆ្នាំ២០២២ បេក្ខជនជាប់និទ្ទេស A ចំនួន ១,០៥៨នាក់ (គិតទាំងបេក្ខជនអប់រំបច្ចេកទេស ៩នាក់)។
-ឆ្នាំ២០២៣ បេក្ខជនជាប់និទ្ទេស A ចំនួន ១,៦៩១នាក់ (គិតទាំងបេក្ខជនអប់រំបច្ចេកទេស ១៨ នាក់) ៕
