អ៊ីស្រាអែលបើកការវាយប្រហារដោយកាំជ្រួចនៅក្បែរព្រលានយន្តហោះក្រុងអាឡេប៉ូ ក្នុងប្រទេសស៊ីរី
បរទេស៖ កងទ័ពស៊ីរីបានលើកឡើងនៅក្នុងសេចក្តីថ្លែងការណ៍មួយថា អ៊ីស្រាអែលបានបើកការវាយប្រហារដោយមីស៊ីល នៅជិតអាកាសយានដ្ឋានអន្តរជាតិនៃទីក្រុង Aleppo ភាគខាងជើងប្រទេសស៊ីរី កាលពីថ្ងៃសៅរ៍។
សេចក្តីថ្លែងការណ៍បានឲ្យដឹងថា ការវាយប្រហារនេះត្រូវបានធ្វើឡើងដើម្បីកំណត់គោលដៅយោធានៅភាគខាងត្បូងទីក្រុងអាឡេប៉ូ ដែលបណ្តាលឱ្យមានការខាតបង់សម្ភារៈមួយចំនួន។
ក្រុមឃ្លាំមើលសិទ្ធិមនុស្សស៊ីរីបានបញ្ជាក់ថា កាំជ្រួចមួយគ្រាប់បានធ្លាក់នៅតំបន់អាកាសយានដ្ឋានអន្តរជាតិអាឡេប៉ូ ដោយមិនបង្កការខូចខាតដល់អាកាសយានដ្ឋាននោះទេ។
អ្នកឃ្លាំមើលសង្គ្រាមដែលមានមូលដ្ឋាននៅចក្រភពអង់គ្លេសបានបន្ថែមថាមានការផ្ទុះយ៉ាងខ្លាំងចំនួនប្រាំមួយនៅជិតអាកាសយានដ្ឋានយោធា al-Nayrab ភាគខាងកើតទីក្រុងអាឡេប៉ូ។
យោងតាមក្រុមសង្កេតការណ៍បានឱ្យដឹងថា កសិដ្ឋានរវាងភូមិ Al-Dhabiya និង Al-Sheikh Saeed នៅក្នុងតំបន់នេះត្រូវបានគេកំណត់គោលដៅ ដែលជាកន្លែងដែលត្រូវបានគេជឿថាជាឃ្លាំង និងទីស្នាក់ការកណ្តាលសម្រាប់កងជីវពលអ៊ីរ៉ង់។
ការវាយប្រហារនេះគឺជាការវាយប្រហារចុងក្រោយបង្អស់របស់អ៊ីស្រាអែលលើទីតាំងយោធាស៊ីរី។
នៅព្រឹកថ្ងៃដដែល ក្រុមសង្កេតការណ៍បាននិយាយថា យុទ្ធជនគាំទ្រអ៊ីរ៉ង់ ១៩ នាក់ រួមទាំងជនជាតិស៊ីរី ៤ នាក់ និងអ៊ីរ៉ាក់ ៦ នាក់ត្រូវបានសម្លាប់ ហើយយ៉ាងហោចណាស់ ១៨ នាក់ផ្សេងទៀតបានរងរបួសយ៉ាងធ្ងន់ធ្ងរនៅក្នុងការវាយប្រហារពាក់កណ្តាលអធ្រាត្ររបស់អ៊ីស្រាអែលទៅលើខេត្ត Deir al-Zour ភាគខាងកើតនៃប្រទេសស៊ីរី។
វាបានឲ្យដឹងថា ការវាយប្រហារបានកំណត់គោលដៅរបស់ពួកគេ និងក្បួនរថយន្តនៅក្នុង និងនៅជាយក្រុង Al-Bukamal ក៏ដូចជាទីបញ្ជាការយោធា ការដឹកជញ្ជូន និងឃ្លាំងរំសេវ នៅជិតព្រំដែនស៊ីរី-អ៊ីរ៉ាក់។
