ឯកឧត្តម ទូច ណារ៉ុថ និងឯកឧត្តម ស្វាយ សំអ៊ាង អញ្ជើញដឹកនាំកិច្ចប្រជុំស្តីពីការត្រួតពិនិត្យ និងជំរុញការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព»
ភ្នំពេញ៖ ឯកឧត្តម ទូច ណារ៉ុថ រដ្ឋលេខាធិការក្រសួងមហាផ្ទៃ និងឯកឧត្តម ស្វាយ សំអ៊ាង អភិបាលខេត្តស្ទឹងត្រែង នាព្រឹកថ្ងៃទី៥ ខែធ្នូ ឆ្នាំ២០២៣នេះ បានអញ្ជើញដឹកនាំកិច្ចប្រជុំស្តីពីការត្រួតពិនិត្យ និងជំរុញការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ។
កិច្ចប្រជុំនេះដែរក៏មានការអញ្ជើញចូលរួមពីសំណាក់ ឯកឧត្តមអនុរដ្ឋលេខាធិការ ក្រសួងមហាផ្ទៃ រួមនិងគណៈប្រតិភូអមដំណើរ, លោកឧត្តមសេនីយ៍ វរៈសេនីយ៍ នៃកងកម្លាំងប្រដាប់អាវុធទាំងបីប្រភេទ , លោកនាយក នាយកររងរដ្ឋបាលសាលាខេត្ត លោកអភិបាលនៃគណៈអភិបាលក្រុង ស្រុក, លោក លោកស្រី ប្រធានមន្ទីរ អង្គភាពជុំវិញខេត្ត, លោកអធិការនគរបាលក្រុង ស្រុក, លោកមេបញ្ជាការនៃមូលដ្ឋានកងរាជអាវុធហត្ថក្រុង ស្រុក, លោក លោកស្រី មេឃុំ ចៅសង្កាត់ , លោកនាយប៉ុស្តិ៍នគរបាលរដ្ឋបាលឃុំ សង្កាត់ទាំង៣៤ រួមនិងមន្ត្រីពាក់ព័ន្ធសំខាន់ៗ សរុបប្រមាណ ២០០នាក់ ។
ដោយអនុវត្តតាមខ្លឹមសារនៃលិខិតលេខ ៣៣៤៥ សជណ ចុះថ្ងៃទី២៤ ខែវិច្ឆិកា ឆ្នាំ២០២៣ របស់ក្រសួងមហាផ្ទៃ រដ្ឋបាលខេត្តស្ទឹងត្រែង បានរៀបចំនូវកិច្ចប្រជុំស្តីពីការត្រួតពិនិត្យ និងជំរុញការអនុវត្តគោល នយោបាយភូមិ ឃុំ សង្កាត់ មានសុវត្ថិភាព ស្ថិតក្នុងសមត្ថកិច្ចក្រសួងមហាផ្ទៃ នៅថ្នាក់ក្រោមជាតិ ក្នុងបរិយាកាស ប្រកបដោយអត្ថន័យ និងមានសារៈសំខាន់នាថ្ងៃនេះ ។
