រដ្ឋមន្ត្រីអប់រំ អញ្ជើញថ្លែងសុន្ទរកថា ក្នុងកិច្ចប្រជុំកំពូលនៃប្រមុខរដ្ឋ/រដ្ឋាភិបាលនៃក្រុម ៧៧ និងប្រទេសចិន នៅគុយបា
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចាប់ពីថ្ងៃទី១៥-១៦ កញ្ញា បានអញ្ជើញថ្លែងសុន្ទរកថាក្នុង កិច្ចប្រជុំកំពូលនៃប្រមុខរដ្ឋ និងរដ្ឋាភិបាលនៃក្រុម ៧៧ និងប្រទេសចិនស្តីពី “បញ្ហាប្រឈមនៃការអភិវឌ្ឍបច្ចុប្បន្ន៖ តួនាទីនៃវិទ្យាសាស្ត្រ បច្ចេកវិទ្យា និងនវានុវត្តន៍” នៅទីក្រុងហាវ៉ាណា ប្រទេសគុយបា។
ក្នុងកិច្ចប្រជុំនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចែករំលែកលើចំណុចមួយចំនួនអំពីគោលនយោបាយសំខាន់ៗរបស់ព្រះរាជាណាចក្រកម្ពុជា ទាក់ទង នឹងចក្ខុវិស័យ និងការអភិវឌ្ឍផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ដូចជា៖ កម្ពុជាបានរៀបចំ និងអនុវត្តផែនទីបង្ហាញផ្លូវស្តីពី វិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០៣០ ដែលបង្ហាញពីសសរស្តម្ភនៃការអភិវឌ្ឍរួមមាន៖
(១) ការកែលម្អអភិបាលកិច្ច (២) ការកសាងធនធានមនុស្ស(៣) ការពង្រឹងសមត្ថភាពស្រាវជ្រាវ និងគុណភាពនៃការស្រាវជ្រាវ (៤) ការបង្កើនកិច្ចសហប្រតិបត្តិការ និងបណ្តាញរវាងភាគីពាក់ព័ន្ធ និង (៥) ការជំរុញប្រព័ន្ធអេកូឡូស៊ី ដែលផ្តល់លទ្ធភាពសម្រាប់ការកសាងសមត្ថភាពស្រូបយកនៅក្នុងអាជីវកម្ម និងការទាក់ទាញការវិនិយោគនៅក្នុងផ្នែកវិទ្យាសាស្ត្រ បច្ចេកវិទ្យា និងនវានុវត្តន៍។
កម្ពុជាក៏បានរៀបចំផែនទីបង្ហាញផ្លូវជាក់លាក់ខាងផ្នែក EduTech, AgriTech, HealthTech និង Green Tech ដែលផែនទីបង្ហាញផ្លូវទាំងនេះនឹងជួយឱ្យកម្ពុជាសម្រេចបាននូវគោលដៅនៃផែនទីបង្ហាញផ្លូវស្តីពី វិទ្យាសាស្ត្រ បច្ចេកវិទ្យា និងនវានុវត្តន៍ នៅឆ្នាំ២០៣០៕
