រដ្ឋមន្រ្តីក្រសួងបរិស្ថាន៖ ក្រសួងកំពុងអនុវត្តផែនការយុទ្ធសាស្រ្តដើម្បីឆ្លើយតបទៅនឹងការប្រែប្រួលអាកាសធាតុ សំដៅលើកកម្ពស់ការអភិវឌ្ឍប្រកបដោយអព្យាក្រឹតកាបូន នៅឆ្នាំ២០៥០

ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅថ្ងៃទី៦ ខែកញ្ញា ឆ្នាំ ២០២៣ បានអនុញ្ញាតឱ្យឯកឧត្តម UENO Atsushi ឯកអគ្គរាជទូត ជប៉ុនប្រចាំនៅព្រះរាជាណាចក្រកម្ពុជា និងសហការី ចូលជួបសម្តែងការគួរសម និងពិភាក្សាការងារ ស្តីពីកិច្ចការពារបរិស្ថាន និងការឆ្លើយតបទៅនឹងការប្រែប្រួលអាកាសធាតុ។

ឯកឧត្តម UENO Atsushi បានគូសបញ្ជាក់ថា ជប៉ុនសូមគាំទ្រយ៉ាងពេញទំហឹងលើយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលធានាបាននូវចីរភាពបរិស្ថាន និងការត្រៀមខ្លួនឆ្លើយតបទៅនឹងការប្រែប្រួលអាកាសធាតុ ព្រមទាំងលើកកម្ពស់សេដ្ឋកិច្ចបៃតង។ ឯកឧត្តមឯកអគ្គរាជទូតជប៉ុន បានជម្រាបជូន ឯកឧត្តមរដ្ឋមន្ត្រី នូវជំនួយឥតសំណងសម្រាប់អនុវត្តគម្រោង ការទប់ស្កាត់សំណល់ប្លាស្ទិកសមុទ្រនៅកម្ពុជា របស់ជប៉ុនដែលបានផ្តល់ជូនកម្ពុជា គឺតាមរយៈអង្គការអភិវឌ្ឍន៍សហប្រជាជាតិ (UNDP) ដំណាក់កាលទី១។ ឯកឧត្តម UENO Atsushi បានសន្យាបន្តគម្រោងដំណាក់កាលទី២ និងតាមរយៈភាពជាដៃគូ ជាមួយទីក្រុងអូសាកា ប្រទេសជប៉ុន និងផ្តល់ជូនក្រសួងបរិស្ថាននូវរថយន្តដឹកសំរាមបន្តទៀត ដើម្បីគ្រប់គ្រងសំណល់នៅតំបន់ជនបទ។

ជាការឆ្លើយតប ឯកឧត្តមបណ្ឌិត អ៊ាង សុផល្លែត បានសម្តែងការស្វាគមន៍ចំពោះកិច្ចសហប្រតិបត្តិការ រវាងកម្ពុជា ជប៉ុន ជាពិសេសជាមួយក្រសួងបរិស្ថាន។ ឯកឧត្តមរដ្ឋមន្រ្តីបានគូសបញ្ជាក់ថា ក្រសួងបរិស្ថាន បាននិងកំពុងអនុវត្តផែនការកំណត់ជាយុទ្ធសាស្រ្តដើម្បីឆ្លើយតបទៅនឹងការប្រែប្រួលអាកាសធាតុ សំដៅលើកកម្ពស់ការអភិវឌ្ឍប្រកបដោយអព្យាក្រឹតកាបូន នៅឆ្នាំ២០៥០។ ជាមួយគ្នានេះ ឯកឧត្តមរដ្ឋមន្រ្តីបានបញ្ជាក់អំពីកិច្ចការអាទិភាពរបស់ក្រសួង លើការងារគ្រប់គ្រងសំណល់ទីក្រុង និងជនបទ ការកាត់បន្ថយការប្រើប្រាស់ថង់ប្លាស្ទិក ការប្រើប្រាស់ធនធានកកើតឡើងវិញ ការដាំដើមឈើដើម្បីបង្កើនគម្របព្រៃ និងការលើកកម្ពស់ជីវភាពសហគមន៍ តំបន់ការពារ។

គួររំលឹកថា ក្រសួងបរិស្ថានបាននឹងកំពុងបើកយុទ្ធនាការជាមួយសិស្សានុសិស្សនៅតាមសាលារៀនទូទាំងប្រទេស ដើម្បីកាត់បន្ថយការប្រើប្រាស់ថង់ប្លាស្ទិក ៕