បុរសម្នាក់បើករថយន្តកុងតឺន័រ រេចង្កូតបុកខឿនថ្មចែកផ្លូវ បណ្ដាលឲ្យបាក់បង្គោលភ្លើងបំភ្លឺផ្លូវមួយដើម និងផ្លាកប៉ាណូមួយដើមទៀត
ភ្នំពេញ៖ បង្គោលភ្លើងបំភ្លឺផ្លូវមួយដើមបានបាក់ និងបាក់ផ្លាកប៉ាណូមួយដើមទៀត បន្ទាប់ពីមាន បុរសម្នាក់បើករថយន្តកុងតឺន័រមួយគ្រឿង ក្នុងល្បឿនលឿនបានរេចង្កូតទៅបុកខឿនថ្មចែកផ្លូវពេញទំហឹង ហេតុការណ៏នេះកើតឡើង នៅវេលាម៉ោង១១និង១០នាទីយប់ថ្ងៃពុធ ទី៩ ខែសីហា ឆ្នាំ២០២៣នៅចំណុចមុខវត្តច្បារអំពៅ
តាមបណ្តោយផ្លូវជាតិលេខ១ ក្នុងសង្កាត់ ច្បារអំពៅទី១ ខណ្ឌច្បារអំពៅ រាជធានីភ្នំពេញ។
តាមប្រភពបានឲ្យដឹងថា នៅមុនពេលកើតហេតុ គេបានឃើញបុរសម្នាក់បើករថយន្ត កុងតឺន័រ ក្បាលពណ៍ខៀវ ពាក់ស្លាកលេខ ភ្នំពេញ 3E.3022 ធ្វើដំណើរតាមបណ្តោយផ្លូវជាតិ លេខ១ ទិសដៅពីលិចទៅកើតក្នុងល្បឿនលឿន ខណៈមកដល់ចំណុចកើតហេតុខាងលើស្រាប់ តែរេចង្កូតមកខាងឆ្វេងដៃជ្រុលទៅបុកខឿនថ្មចែកផ្លូវពេញទំហឹង បណ្ដាលឲ្យរថយន្តបង្កហោះឡើងលើខឿនថ្មចែកផ្លូវជ្រុលទៅបុកផ្លាកប៉ាណូបាក់អស់មួយដើម និង បាក់បង្គោលភ្លើងបំភ្លឺផ្លូវ ចំនួនមួយដើមទៀតខូចខាតយ៉ាងដំណំ ។
តែសំណាងល្អមិនបង្ករឲ្យអ្នកណាម្នាក់រងរបួសនោះទេ ។
ក្រោយពេលកើតហេតុ សមត្ថកិច្ចជំនាញបានចុះមកដល់ទីតាំងកន្លែងកើតហេតុរួចបានវាស់វែងនិងអូស រថយន្តបង្កទៅរក្សាទុកនៅការិយាល័យ ចរាចរណ៍ រាជធានីភ្នំពេញ រង់ចាំដោះស្រាយគ្នាតាមនិតិវិធីច្បាប់ ៕
