ធនាគារជាតិនៃកម្ពុជា៖ ការទូទាត់ប្រាក់រវាងកម្ពុជា-ចិន គឺជាការទូទាត់តាមប្រព័ន្ធអេឡិចត្រូនិក ស្កេន QR Code មិនមែនជាការចាយក្រដាសប្រាក់យ័នរបស់ចិននៅកម្ពុជាទេ
ភ្នំពេញ៖ លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជាលើកឡើងថា បានបញ្ជាក់ថា ការទូទាត់ប្រាក់រវាងកម្ពុជា-ចិន គឺជាការទូទាត់តាមប្រព័ន្ធអេឡិចត្រូនិក ស្កេន QR Code មិនមែនជាការចាយក្រដាសប្រាក់ យ័នរបស់ចិននៅកម្ពុជា ឬក្រដាសប្រាក់រៀលរបស់កម្ពុជានៅប្រទេសចិនឡើយ។
លោកជំទាវបានលើកឡើងបែបនេះ ក្នុងសន្និសីទមួយកាលពីថ្ងៃទី១៦ ខែកក្កដា ឆ្នាំ២០២៣។
លោកជំទាវបណ្ឌិត ជា សិរី បានលើកឡើងថា ការទូទាត់នេះនឹងជួយជំរុញឱ្យការ ប្រើ ប្រាក់រៀលមានការកើនឡើង និងមានកិត្យានុភាពនៅលើឆាកអន្តរជាតិ ព្រោះថា ពលរដ្ឋខ្មែរអាចទូទាត់ប្រាក់រៀលនៅបរទេសបាន។ ប៉ុន្តែត្រូវមានគណនីបាគង ជាប្រាក់ រៀលទើបអាចទូទាត់បាន។
លោកជំទាវ ទេសាភិបាលរងធនាគារជាតិនៃកម្ពុជា បានបញ្ជាក់ថា ការទូទាត់ ប្រាក់រវាងកម្ពុជា-ចិន មិនមែនជាការចាយក្រដាសប្រាក់យ័នរបស់ចិននៅកម្ពុជា ឬក្រដាស ប្រាក់រៀលរបស់កម្ពុជានៅប្រទេសចិនឡើយ តែជាការទូទាត់តាមរយៈប្រព័ន្ធ QR Code។
លោកជំទាវ ជា សិរី បានបញ្ជាក់យ៉ាងច្បាស់ថា “ខ្ញុំសូមបញ្ជាក់ម្ដងទៀតថា ការចាយនេះមិនមែនជាការចាយក្រដាសប្រាក់យ័នចិនលើទឹកដីកម្ពុជា ដូចក្រដាស ប្រាក់ដុល្លារឡើយ តែជាការចាយវាយតាមប្រព័ន្ធអេឡិចត្រូនិក ស្កេន QR Code ដូចគ្នា ចំពោះលុយដែលទទួលបានតាមប្រព័ន្ធអេឡិចត្រូនិកទៀតសោត ក៏ទទួលបានជាលុយរៀល មិនមែនលុយយ័នចិននោះឡើយ”។
ការទូទាត់ឆ្លងដែនរវាងប្រទេសកម្ពុជា និងចិននេះអាចគ្រោងនឹងដាក់ឱ្យប្រើ ប្រាស់ជាផ្លូវការនៅចុងឆ្នាំ២០២៣ ឬយ៉ាងយូរនៅដើមឆ្នាំ២០២៤ខាងមុខនេះ។ បច្ចុប្បន្ន នេះកម្ពុជាក៏បានសហប្រតិបត្តិការ ជាមួយប្រទេសថៃប្រកបដោយភាពជោគជ័យ ទាំង ទូទាត់នៅក្នុងប្រទេសថៃ និងការទូទាត់នៅកម្ពុជា បន្ដបន្ទាប់ទៅទៀតកម្ពុជានឹងបន្ដ សហការជាមួយប្រទេសឡាវ, ចិន, ឥណ្ឌា និងប្រទេសវៀតណាម។ លើសពីនេះទៀត ការទូទាត់នេះ អាចជួយទាក់ទាញទេសចរចិនមកលេងស្រុកខ្មែរ កាន់តែច្រើនបន្ថែមទៀតផងដែរ ដោយសារទេសចរចិនមិនចាំបាច់ដកលុយយ័ន យកមកដូរជាដុល្លារហើយមកចាយនៅកម្ពុជាធ្វើឱ្យមានហានិភ័យលើអត្រាប្តូរប្រាក់នោះទេ។
លោកជំទាវបន្ថែមថាថា ចំពោះការទូទាត់ឆ្លងដែនតាមប្រព័ន្ធអេឡិចត្រូនិកនេះ ពិតជាផ្ដល់ផលចំណេញ លើការជំរុញការប្រើប្រាស់ប្រាក់រៀលនៅកម្ពុជា ដោយសារ តែការសហការគ្នានេះ តម្រូវឲ្យមានគណនីជាប្រាក់រៀល មានន័យថា ទេសចរចិន អាចទូទាត់ប្រាក់មកកាន់អាជីវករកម្ពុជាបាន លុះត្រាតែអាជីវករកម្ពុជាមាន គណនីជាប្រាក់រៀល។ ធនាគារជាតិនៃកម្ពុជា បានលើកឡើងថា ការទូទាត់ប្រាក់រវាងកម្ពុជា-ចិន តាមរយៈស្កេន KHQR Code រវាងប្រព័ន្ធ Bakong និងក្រុមហ៊ុន UnionPay International របស់ចិន នឹងចូលរួមទាក់ទាញទេសចរចិនចូលមកទស្សនានៅកម្ពុជា និងលើកកិត្យា នុភាពលុយរៀលខ្មែរ។
ធនាគារជាតិនៃកម្ពុជា និងក្រុមហ៊ុន UnionPay International កាលពីពេលថ្មីៗនេះ បានចុះអនុស្សរណៈយោគយល់គ្នា (MoU) ដើម្បីជំរុញការទូទាត់ សងប្រាក់ឆ្លងដែនតាមប្រព័ន្ធ QR Code។ គួររំលឹកដែរថា ការឆ្លើយតបរបស់ធនាគារជាតិនៃកម្ពុជានេះ ធ្វើឡើងបន្ទាប់ពីមាន ការភាន់ច្រឡំពីការចរាចរប្រាក់យ័នចិននៅក្នុងប្រទេសកម្ពុជា ដូចប្រាក់ដុល្លារ៕
