ឧត្តមសេនីយ៍ឯក ហ៊ុន ម៉ានិត នាំយកអាវភ្លៀង ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ជូនបញ្ជាការដា្ឋនកងទ័ពជើងគោក
ភ្នំពេញ៖ ឯកឧត្តម ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក នៃកងយោធពលខេមរភូមិន្ទ បាននាំយកអាវភ្លៀង ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនបញ្ជាការដា្ឋនកងទ័ពជើងគោក នាថ្ងៃទី១៦ ខែឧសភា ឆ្នាំ២០២៣ នៅបញ្ជាការដ្ឋានវិស្វកម្មកងទ័ពជើងគោក (ត្រាំខ្នា ស្រុកបាទី ខេត្តតាកែវ ) ។
នៅក្នុងរបាយការណ៍ស្វាគមន៍របស់ឯកឧត្តម ឧត្តមសេនីយ៍ឯក អ៊ុច វ៉ាន់ថា មេបញ្ជាការរង កងទ័ពជើងគោក មេបញ្ជាការ បញ្ជាការដ្ឋានវិស្វកម្មបានឲ្យដឹងថា ក្រោមការដឹកនាំ និងការចង្អុលបង្ហាញណែនាំពីសំណាក់ឯកឧត្តម នាយឧត្ដមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក កន្លងមកបណ្តាអង្គភាពចំណុះកងទ័ពជើងគោក ពិតជាបានអភិវឌ្ឍខ្លួន យ៉ាងគួរឱ្យកត់សម្គាល់ទាំងសមត្ថភាព ការអនុវត្តន៍ភារកិច្ច ពិសេសការរស់នៅប្រចាំថ្ងៃរបស់កងទ័ពកាន់តែប្រសើរ និយាយជារួម និងនិយាយដោយឡែក បញ្ជាការដ្ឋានវិស្វកម្មកងទ័ពជើងគោក បានបំពេញតួនាទីស្នូលរបស់ខ្លួនបានយ៉ាងសកម្ម និងប្រកបដោយទំនួលខុសត្រូវខ្ពស់ ដោយក្នុងនោះ បញ្ជាការដ្ឋានវិស្វកម្ម បានចូលរួមធ្វើជាសេនាធិការជូន ឯកឧត្តម មេបញ្ជាការកងទ័ពជើងគោក ទទួលបានលទ្ធផលល្អប្រសើរគូរជាទីមោទនៈ ។
នាយទាហាន នាយទាហានរង និងពលទាហាន បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ សូមគោរពថ្លែងអំណរអរគុណយ៉ាងជ្រាលជ្រៅដល់សម្តេចទាំងទ្វេរជានិច្ចកាលតែងតែគិតគូរពីសុខទុក្ខ សុខមាលភាពកងទ័ពជាប្រចាំ ។
ឧត្តមសេនីយ៍ឯក ហ៊ុន ម៉ានិត បាននាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិតជូនចំពោះ មេបញ្ជាការ មេបញ្ជាការរង នាយទាហាន នាយទាហានរង និងពលទាហាន នៃបញ្ជាការដ្ឋានកងទ័ពជើងគោក ។
ឧត្តមសេនីយ៍ឯក ហ៊ុន ម៉ានិត បានបន្ថែមថា ជានិច្ចកាល សម្តេចតេជោ និងសម្តេចគតិព្រឹទ្ធបណ្ឌិត តែងតែផ្តល់ និងចែកអំណោយជាអាវភ្លៀង អាវរងាចំនួន ០២លើកក្នុងមួយឆ្នាំ ជូនដល់បងប្អូនយើងពុំដែលអាក់ខានឡើយ ក្នុងនោះអាវភ្លៀង ០១លើកសម្រាប់រដូវភ្លៀង និងអាវរងា ០១លើក សម្រាប់រដូវត្រជាក់ជារៀងរាល់ឆ្នាំ។
ឧត្តមសេនីយ៍ឯក ហ៊ុន ម៉ានិត បានសំដែងនូវការកោតសរសើរ វាយតម្លៃខ្ពស់ ចំពោះគំរូវីរភាពដ៏អង់អាចក្លាហានរបស់កងកម្លាំងប្រដាប់អាវុធយើងដែលបានពុះពារឆ្លងកាត់គ្រប់ឧបសគ្គ បូជាទាំងកម្លាំងកាយ កម្លាំងចិត្ត ប្រាជ្ញា ស្មារតី និងបានលៈបង់ពលីជីវិតដើម្បីបុព្វហេតុការពារជាតិមាតុភូមិ និងប្រជាជន ។
ឯកឧត្តម ហ៊ុន ម៉ានិត បានមានប្រសាសន៍ថាកងកម្លាំងប្រដាប់អាវុធ ជាកម្លាំងដ៏សំខាន់ មិនអាចខ្វះបាន នៅក្នុងការរក្សា ការពារអធិបតេយ្យភាព បូរណភាពទឹកដី ជូនប្រទេសជាតិ និងប្រជាជន ត្រូវគោរព និងការពារ ជាតិ សាសនា ព្រះមហាក្សត្រ ការពារដាច់ខាតសុខសន្តិភាព និងចូលរួមជាមួយរាជរដ្ឋាភិបាលក្នុងការកសាង និងអភិវឌ្ឍន៏ជាតិឲ្យកាន់តែរីកចម្រើន ៕
