ឯកឧត្តម ហុក ពេជ្រហោះ ដឹកនាំសមាជិក សមាជិកា សាខាកាកបាទក្រហមខេត្តត្បូងឃ្មុំ ជួបសំណេះសំណាល សួរសុខទុក្ខ និងនាំយកអំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ផ្តល់ជូនប្រជាពលរដ្ឋរងគ្រោះ ដោយសារគ្រោះធម្មជាតិ ខ្យល់កន្ត្រាក់ ចំនួន ១២៦គ្រួសារ
ភ្នំពេញ៖ ឯកឧត្តម ហុក ពេជ្រហោះ អភិបាលរងខេត្តត្បូងឃ្មុំ តំណាង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណអភិបាលខេត្ត និងជាប្រធានគណកម្មាធិការសាខាកាកបាទក្រហមកម្ពុជាខេត្តត្បូងឃ្មុំ នាព្រឹកថ្ងៃទី២៣ ខែមេសា ឆ្នាំ២០២៣ បានដឹកនាំសមាជិក សមាជិកា សាខាកាកបាទក្រហមខេត្ត និងអាជ្ញាធរពាក់ព័ន្ធ ជួបសំណេះសំណាល សួរសុខទុក្ខ និងនាំយកអំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈសាខាកាកបាទក្រហមខេត្ត ទៅផ្តល់ជូនប្រជាពលរដ្ឋរងគ្រោះ ដោយសារគ្រោះធម្មជាតិ ខ្យល់កន្ត្រាក់ ចំនួន ១២៦គ្រួសារ ស្ថិតនៅឃុំទួលស្នួល និងឃុំឈូក ស្រុកក្រូចឆ្មារ ខេត្តត្បូងឃ្មុំ។
សូមជម្រាបជូនថា អំណោយដែលប្រគល់ជូនប្រជាពលរដ្ឋរងគ្រោះ ដោយគ្រោះធម្មជាតិ ខ្យល់កន្ត្រាក់
-ទីតាំងទី១ ក្នុងឃុំទួលស្នួល នៅបរិវេណវត្តជ័យមុនី (ហៅវត្តទួលថ្លុង) មានចំនួន ៦៤គ្រួសារ រួមមាន៖ រងគ្រោះធ្ងន់ ចំនួន ១០គ្រួសារ ទទួលបានថវិកា ៣០ម៉ឺនរៀល រងគ្រោះមធ្យមចំនួន ៤៣គ្រួសារ ទទួលបានថវិកា ១០ម៉ឺនរៀល និងរងគ្រោះស្រាល ចំនួន ១១គ្រួសារ ទទួលបានថវិការ ៥ម៉ឺនរៀល។
-ទីតាំងទី២ ក្នុងឃុំឈូក នៅបរិវេណ វត្តឧប្បលវត្តី (ហៅវត្តឈូក) មានប្រជាពលរដ្ឋរងគ្រោះដោយសារខ្យល់កន្ត្រាក់មានចំនួន ៣៧គ្រួសារ ដោយរងគ្រោះធ្ងន់ ចំនួន ០១គ្រួសារ ទទួលបានថវិកា ៣០ម៉ឺនរៀល និងរងគ្រោះស្រាល ចំនួន ៣៦គ្រួសារ ទទួលបានថវិការ ៥ម៉ឺនរៀល។
-ទីតាំងទី៣ នៅបរិវេណ វត្តតេជោសែន (ហៅវត្តក្របីកៀក) ឃុំឈូក មានចំនួន ២៥គ្រួសារ ដោយរងគ្រោះធ្ងន់ ចំនួន ០២គ្រួសារ ទទួលបានថវិកា ៣០ម៉ឺនរៀល និងរងគ្រោះស្រាល ចំនួន ២៣គ្រួសារ ទទួលបានថវិការ ៥ម៉ឺនរៀល។
សរុបទាំង ១២៦គ្រួសារ ក្នុងមួយគ្រួសារៗ ទទួលបានរួមមាន៖ អង្ករ២៥គីឡូក្រាម, ត្រីខ ១យូ, ទឹកត្រី ១យួរ, ទឹកស៊ីអ៊ីវ ១យួរ, មី ១កេស ៕
