សម្តេចតេជោ ហ៊ុន សែន៖ មានរដ្ឋមន្ត្រីខ្លះ ពេលខ្ញុំបញ្ជូនសារចូលទៅក្នុងគ្រុប ជួនកាល ៧ថ្ងៃក្រោយ បានឆ្លើយទទួលបាន
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ថា មានរដ្ឋមន្ត្រីខ្លះនៅពេលដែលសម្តេច ផ្ញើសារចូលទៅក្នុងគ្រុបការងារ មានពេលខ្លះ ៧ថ្ងៃក្រោយ ទើបធ្វើការឆ្លើយតបនឹងសម្តេច ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ នាថ្ងៃទី២០ ខែមេសា ឆ្នាំ២០២៣នេះ សម្តេចតេជោ ហ៊ុន សែន បានថ្លែងដូចនេះថា «មានមន្ត្រីខ្លះខ្ជិល ខ្ញុំចាំមើលមន្ត្រីខ្លះ ខ្ញុំនិយាយពីមន្ត្រីរបស់យើងបន្តិចចុះ ថ្នាក់រដ្ឋមន្ត្រីដែលបញ្ជូលក្នុងគ្រុប ពេលខ្ញុំបញ្ជូនសារចូលទៅក្នុងគ្រុបនឹង ជួនកាល ៧ថ្ងៃក្រោយបានឆ្លើយទទួលបាន សូមអរគុណ។ ប៉ុន្តែអ្នកខ្លះទៀតនិយាយពីលឿន ហើយលឿនេះជាងគេមានមនុស្ស ២នាក់ ទី១ បង ឯក សំអុល និងទី២ ឆាយ ថន លឿនជាងគេទាំងអស់ ដោយមិនទាន់បានមើលអត្ថន័យអីក៏ដោយ គាត់ឆ្លើយទទួលបានហើយ ប៉ុន្តែបើ កាញារីទ្ធ វិញ ជួនកាល ១៥ថ្ងៃក៏មាន»៕
