រដ្ឋមន្ដ្រីសុខាភិបាល អំពាវនាវដល់ក្រុមគ្រូពេទ្យ ត្រូវផ្ដល់សេវាជូនពលរដ្ឋ ប្រកបដោយសីលធម៌ មិនរើសអើង
ភ្នំពេញ៖ រដ្ឋមន្ត្រីក្រសួងសុខាភិបាល ឯកឧត្ដមសាស្ត្រាចារ្យ ម៉ម ប៊ុនហេង បានថ្លែងអំពាវនាវដល់មន្ដ្រីរាជការទាំងអស់ ពង្រឹងនូវបច្ចេកទេស ផ្លាស់ប្តូរ ឥរិយាបថពីទម្លាប់មិនល្អទៅជាអ្នកផ្តល់សេវាជូនប្រជាជនប្រកបដោយសីលធម៌ថ្លៃថ្នូរ មិនរើសអើងអ្នកជំងឺ ដែលស្របនឹងសុភាសិតលើកឡើងថា «គ្រូពេទ្យជាមាតាមានព្រហ្មវិហារធម៌ដ៏ល្អ របស់អ្នកជំងឺ»។
ការថ្លែងដូច្នេះរបស់លោករដ្ឋមន្ដ្រី ក្នុងឱកាសបើកទិវាវេជ្ជសាស្ត្រ-សល្យសាស្ត្រ លើកទី២៥ និងថែទាំវេជ្ជសាស្ត្រលើកទី១២ ដែលប្រព្រឹត្ដទៅនៅមន្ទីរពេទ្យ មិត្ដភាពខ្មែរ-សូវៀត នៅថ្ងៃទី៥ ខែមេសា ឆ្នាំ២០២៣នេះ។
ឯកឧត្ដមរដ្ឋមន្ដ្រី ម៉ម ប៊ុនហេង បានថ្លែងថា ការរៀបចំទិវាវេជ្ជសាស្ត្រ-សល្យសាស្ត្រ និងទិវាថែទាំវេជ្ជសាស្ត្រ បានពង្រឹងការធ្វើរោគវិនិច្ឆ័យទាន់ពេល និងការព្យាបាលប្រកបដោយបច្ចេកទេស និងគុណធម៌នាំមកនូវការកាត់បន្ថយអត្រាមរណភាពដែលបណ្តាលមកពីជំងឺបេះដូង ជំងឺប្រព្ទ័រំរលាយអាហារ និងប្រពន្ធ័ផ្លូវដង្ហើមនៅក្នុងមន្ទីរពេទ្យផ្ទាល់។
ក្នុងរយៈពេល២ថ្ងៃនេះ ទាំងគ្រូពេទ្យ គិលានុបដ្ឋាក-យិកាទាំងអស់នៅទីនេះ នឹងបានពិភាក្សាផ្លាស់ប្ដូរយោបល់គ្នាក្នុងការពិគ្រោះ ព្យាបាលជំងឺ ការស្រាវជ្រាវ ការរករោគវិនិច្ឆ័យជំងឺឲ្យកាន់តែមានគុណភាព និងប្រសិទ្ធភាពខ្ពស់ថែមទៀត ដែលជាកាតព្វកិច្ចចាំបាច់របស់យើងទាំងអស់គ្នា ជាអ្នកពិនិត្យព្យាបាល និងថែទាំជំងឺ ព្រមទាំងពង្រឹងការអនុវត្តក្រមសីលធម៌វិជ្ជាជីវៈរបស់ខ្លួនឲ្យកាន់តែប្រសើរឡើង ក្នុងគោលដៅកាត់បន្ថយអត្រាស្លាប់ដោយជំងឺបេះដូង ជំងឺប្រពន្ធ័រំលាយ អាហារ និងជំងផ្លូវដង្ហើម។
ឯកឧត្ដមរដ្ឋមន្ដ្រី បានបញ្ជាក់ថា “គ្រោះថ្នាក់ស្ទះសរសៃបេះដូង ជំងឺវិបត្តិចង្វាក់បេះដូង ជំងឺមហារីកប្រពន្ធ័រំលាយអាហារ មហារីកសួត ជាមូលហេតុ ឈានមុខគេក្នុងចំណោមមូលហេតុដទៃទៀត ដែលនាំឲ្យអត្រាមរណភាពខ្ពស់។ ដូច្នេះសូមជំរុញលើកទឹកចិត្ដដល់គ្រូពេទ្យយើងទាំងអស់ ខិតខំប្រឹងប្រែងបន្ដទៀត ធ្វើឱ្យប្រព័ន្ធសុខាភិបាលមានការរីកចម្រើន ក្នុងកម្រិតខ្ពស់ ដើម្បីជាគុណប្រយោជន៍ដល់ការមើលថែទាំ និងព្យាបាលជូនប្រជាពលរដ្ឋយើង”។
ឯកឧត្ដមរដ្ឋមន្ដ្រី ម៉ម ប៊ុនហេង បានបន្ដថា ការលើកកម្ពស់សុខភាពរបស់ប្រជាពលរដ្ឋនេះ គឺជាការវិនិយោគដ៏ធំរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិត របស់សម្ដេចតេជោ នាយករដ្ឋមន្ដ្រីកម្ពុជា។ ក្នុងឱកាសនេះយើងខ្ញុំក៏សូមគោរពថ្លែងអំណរគុណដល់សម្ដេចតេជោ ដែលតែងតែផ្ដល់នូវសុខសន្ដិភាព ស្ថេរភាពនយោបាយ។ ដូច្នេះយើងបានសុខសាន្ដទាំងអស់គ្នា ហើយអាចប្រកបវិជ្ជាជីវៈនេះបានយ៉ាងពោរពេញ ដើរទាន់សម័យទំនើប ដូចប្រទេសនៅក្នុងតំបន់ ជាតិ និងអន្ដរជាតិ។
ក្នុងឱកាសនោះ ឯកឧត្ដមក៏បានថ្លែងកោតសរសើរចំពោះការខិតខំប្រឹងប្រែងដល់ថ្នាក់ដឹកនាំ និងក្រុមគ្រូពេទ្យនៃមន្ទីរពេទ្យមិត្ដភាពខ្មែរ-សូវៀត និងស្នើឱ្យក្រុមគ្រូពេទ្យនៃមន្ទីរពេទ្យនេះ បន្ដបណ្ដុះបណ្ដាលពង្រីកនូវចំណេះជំនាញទៅតាមមូលដ្ឋាន៕
