នាយឧត្តមសេនីយ៍ គៀត ច័ន្ទថារិទ្ធ អញ្ជើញបើកកិច្ចប្រជុំស្តាប់របាយការណ៍បច្ចុប្បន្នភាព ប្រព័ន្ធគ្រប់គ្រងព្រំដែនកម្ពុជា(CBMS)

ភ្នំពេញ ៖ ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ នាព្រឹកថ្ងៃចន្ទ ១១ កើត ខែបុស្ស ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២ ខែមករា ឆ្នាំ២០២៣នេះ បានអញ្ជើញបើកកិច្ចប្រជុំស្តាប់របាយការណ៍បច្ចុប្បន្នភាព ប្រព័ន្ធគ្រប់គ្រងព្រំដែនកម្ពុជា(CBMS) នៅអគ្គនាយកដ្ឋានអន្តោប្រវេសន៍។ កិច្ចប្រជុំក៏មានការអញ្ជើញចូលរួមពី ឯកឧត្ដម អគ្គនាយករង អនុប្រធាននាយកដ្ឋាន និងមន្រ្តីនៃអគ្គនាយកដ្ឋានអន្តោប្រវេសន៍ពាក់ព័ន្ធផ្សេងទៀត។

ជាបឋម ឯកឧត្តម ឧត្ដមសេនីយ៍ឯក សុខ វាសនា អគ្គនាយករង និងជាប្រធាននាយកដ្ឋានជនបរទេសមិនមែនអន្តោប្រវេសន្ត និងបច្ចេកវិទ្យា បានរាយការណ៍លំអិតអំពីរបាយការណ៍ទាក់ទង ការបណ្ដុះបណ្ដាលជំនាញបឋមលើការប្រើប្រាស់ប្រព័ន្ធ( CBMS ) ការប្រគល់-ទទួលគណនីលេខកូតសម្ងាត់លើប្រព័ន្ធពីក្រុមហ៊ុនជាដៃគូអភិវឌ្ឍប្រព័ន្ធCBMS បញ្ហារអាក់រអួលចំពោះការកំណត់ចំណាំខ្ចៅដៃរបស់អ្នកធ្វើដំណើរឆ្លងកាត់ច្រកទ្វារអន្តោប្រវេសន៍មួយចំនួន និងបញ្ហាប្រឈមមួយចំនួនទៀតជូនអង្គប្រជុំជ្រាប និងស្នើសុំគោលការណ៍ដើម្បីចាត់វិធានដោះស្រាយឲ្យបានសមស្រប។

ឆ្លៀតក្នុងឱកាសនោះឯកឧត្ដម នាយឧត្តមសេនីយ៍ គៀត ច័ន្ទថារិទ្ធ បានបញ្ជាក់ដាក់ចេញទិសដៅដល់អង្គប្រជុំ និងជាពិសេសចំពោះមន្រ្តីនៃនាយកដ្ឋានជំនាញដែលពាក់ព័ន្ធ ត្រូវសិក្សាលើបញ្ហាប្រឈមទាក់ទងបច្ចេកទេសទាំងនេះឱ្យបានច្បាស់លាស់ និងឆាប់រហ័ស ដើម្បីរាយការណ៍ជូនថ្នាក់ដឹកនាំក្រសួង សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីស្នើសុំគោលការណ៍អនុវត្តបន្ត៕