សម្ដេច ស ខេង ថាគុណភាព នៃអគារទីស្ដីការក្រសួងមហាផ្ទៃថ្មី គឺសាងសង់ត្រឹមត្រូវតាមស្ដង់ដារសំណង់ ដោយបានសាងសង់ យ៉ាងយកចិត្តទុកដាក់បំផុត
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសង្កេតឃើញថា គុណភាព នៃអគារទីស្ដីការក្រសួងមហាផ្ទៃថ្មី គឺសាងសង់បានត្រឹមត្រូវតាមស្ដង់ដារសំណង់ ដោយបានសាងសង់យ៉ាងយកចិត្តទុកដាក់បំផុត ។
ក្នុងឱកាសអញ្ជើញជួបសំណេះសំណាល និងផ្ដល់អំណោយជូនក្រុមស្ថាបត្យករ វិស្វករ និងកម្មករ កម្មការិនី ដែលកំពុងសាងសង់អគារទីស្ដីការក្រសួងមហាផ្ទៃថ្មី នាថ្ងៃទី៣០ ខែធ្នូ ឆ្នាំ២០២២ សម្តេចក្រឡាហោម ស ខេង បានថ្លែងការកោតសរសើរចំពោះក្រុមហ៊ុនសាងសង់ និងកម្មករ-កម្មការិនីទាំងអស់ ដែលបានខិតខំប្រឹងប្រែង ដែលរហូតមកដល់ពេលនេះបានសាងសង់លឿនជាងផែនការដែលបានគ្រោងទុក ។
ឆ្លៀតឱកាសនោះដែរ សម្ដេចក្រឡាហោម ស ខេង បានលើកឡើងថា រាជរដ្ឋាភិបាលកម្ពុជា បានខិតខំប្រឹងប្រែងគ្រប់បែបយ៉ាង ដើម្បីដោះស្រាយបញ្ហាប្រឈមនានា ដែលបានកើតឡើងនៅក្នុងឆ្នាំ២០២២នេះ ជាពិសេស គឺការងារប្រយុទ្ធប្រឆាំងទៅនឹងជំងឺកូវីដ-១៩ រហូតដល់ទទួលបានជោគជ័យ ដែលធ្វើឱ្យប្រទេសកម្ពុជា ត្រូវបានអន្ដរជាតិកោតសរសើរ និងវាយតម្លៃខ្ពស់ចំពោះរាជរដ្ឋាភិបាល និងប្រជាពលរដ្ឋកម្ពុជាទាំងអស់ ដែលតែងតែយកចិត្តទុកដាក់ អនុវត្តទៅតាមសំណើរ សំណូមពរ ឬគោលការណ៍នានា ដើម្បីប្រយុទ្ធប្រឆាំងទៅនឹងកូវីដ-១៩។
សម្ដេចក្រឡាហោម បន្ដថា ទោះបីរាជរដ្ឋាភិបាលកម្ពុជា ដាក់ចេញវិធានការគ្រប់បែបយ៉ាងក៏ដោយ ប៉ុន្ដែបើប្រជាពលរដ្ឋមិនយកចិត្តទុកដាក់ ឬមិនបានគាំទ្រទេនោះ ការគ្រប់គ្រងជំងឺកូវីដ-១៩ ក៏មិនទទួលបានជោគជ័យដូចពេលនេះដែរ។
ជាងនេះទៅទៀត សម្ដេចក្រឡាហោម ស ខេង ក៏បានលើកឡើងពីការជោគជ័យរបស់ប្រទេសកម្ពុជា ក្នុងការរៀបចំធ្វើជាម្ចាស់ផ្ទះ នៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នាពេលកន្លងទៅនេះ។ សម្ដេចក្រឡាហោម បន្ដថា ទាំងនេះបានបញ្ជាក់ឱ្យឃើញថា ប្រទេសកម្ពុជា មានសុខសន្ដិភាព មានស្ថិរភាព ដោយការពារបានសន្ដិសុខយ៉ាងល្អប្រសើរ។
លើសពីនេះ សម្ដេចក្រឡាហោម ក៏បានរំលឹកថា នៅក្នុងឆ្នាំ២០២២នេះដែរ កម្ពុជា បានរៀបចំដំណើរការបោះឆ្នោតជម្រើសរើសក្រុមប្រឹក្សា ឃុំ-សង្កាត់ នាពេលកន្លងទៅ ក៏ទទួលបានជោគជ័យយ៉ាងត្រចះត្រចង់ ដោយមានប្រជាពលរដ្ឋចូលរួមបោះឆ្នោតយ៉ាងច្រើនកុះករ ដើម្បីជ្រើសរើសអ្នកដឹកនាំក្នុងមូលដ្ឋាន ដែលខ្លួនពេញចិត្ត។ សម្ដេច បន្ថែមថា នៅឆ្នាំ២០២២នេះ កម្ពុជា ក៏នៅមានកិច្ចការងារជាច្រើនទៀត ដែលកម្ពុជាបានធ្វើជាបន្ដបន្ទាប់ រហូតដល់ទទួលបានជោគជ័យយ៉ាងសន្ធឹកសន្ធាប់ផងដែរ។
សម្ដេច ក្រឡាហោម បានឱ្យដឹងទៀតថា ទោះបីយ៉ាងណាក៏ដោយ នៅក្នុងឆ្នាំ២០២៣ ខាងមុខនេះ ប្រទេសកម្ពុជា ក៏មានកិច្ចការងារជាច្រើន ដូចជា ការងារបោះឆ្នោតជ្រើសរើសតំណាងរាស្ដ្រ ជាដើម ដែលកម្ពុជាត្រូវរៀបចំ និងគិតគូរឱ្យបានម៉ត់ចត់។
ជាថ្មីម្តងទៀតក្នុងឱកាសបុណ្យចូលឆ្នាំសកល ២០២៣ ខាងមុខនេះ សម្ដេចក្រឡាហោម សូមជូនពរដល់ថ្នាក់ដឹកនាំ បុគ្គលិក កម្មករ-កម្មការិនី ទាំងអស់ ព្រមទាំងប្រជាពលរដ្ឋ សូមមានសិរីសួស្តី ជោគជ័យ សុខភាពល្អ សុភមង្គលក្នុងក្រុមគ្រួសារ និងទទួលបានជោគជ័យថ្មីៗថែមទៀតក្នុងឆ្នាំថ្មីខាងមុខនេះ។
បន្ទាប់ពីសំណេះសំណាលរួច សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញផ្ដល់អំណោយជូនក្រុមស្ថាបត្យករ វិស្វករ និងកម្មករ កម្មការិនី ចំនួន១៥០០នាក់ ជាសម្ភារ គ្រឿងបរិភោគ ឧបភោគ និងថវិកាមួយចំនួន ដោយក្នុងម្នាក់ៗទទួលបាន មី ៥កញ្ចប់, ត្រី ខ ៥កំប៉ុង, ទឹកសុទ្ធ ១កេស, ទឹកក្រូច ៥កំប៉ុង, សារ៉ុន ចំនួន០១, និងថវិកា ១០ម៉ឺនរៀលផងដែរ៕
